Tepamit tein kiyoualouaya Jericó
Tanojnots 46
Tepamit tein kiyoualouaya Jericó
¿TONI kichiujtok maj xitini tepamit tein kiyoualoua Jericó? Kemej eskia se ueyi bomba ipan uetsiskia. Sayoj ika itech nejon tonalmej amo onkayaj bombas, niono uejueyi tepostatopomej. ¡Nejin okse mouiskatekit tein Jiova kichiuak! Tikitatij keniuj mochiuak.
Yejua nejin tein Jiova kiiluij Josué: ‘Tejua uan motateuijkauan xitayoualokan itech altepet. Xitayoualokan sepa tonal, uan ijkon xikchiujtokan chikuasen tonal. No xikuikakan kaxon tein kixnextia netenkaualis, uan chikome tiopixkamej moneki yaskej iixpan kaxon uan kipitstiaskej kuaomimej.
’Itech chikometika tonal, xitayoualokan itech altepet chikojpa. Satepan, uejkauak xikpitstokan kuaomimej, uan nanochin xitsajtsikan chikauak maj kinexti ika namoteuitij. ¡Uan tepamit xitinis!’
Josué uan israelitas kichiujkej tein Jiova kiniluijka. Keman yejuan tayoualouayaj, amo akin tajtouaya. Tein sayoj mokakia keniuj tapitstiayaj uan keniuj nejnemiaj. Acha momoujtijkej taixnamikinij tein nemiaj Jericó. ¿Ueli tikita nejon mekat chichiltik tein pilkatok itech ventana? ¿Akoni iventana? Kemaj, Rahab kichiuak tein kiiluijkaj ome tapijpianij. Nochin ichankauan iuan yetoyaj, uan kiitayaj toni mochiuaya.
Keman ajsik chikometika tonal, satepan keman tamalakachojkej itech altepet chikojpa, kipitskej kuaomimej uan tsajtsikej chikauak, tepamit xitinik. Ompa Josué kiniluij: ‘Xikinimiktikan taltikpakneminij uan xikchichinokan altepet iuan nochi tein kipia. Sayoj xikauakan plata, oro, cobre uan hierro, nejin tikeuaskej itech tabernáculo’.
Josué kiniluij ome tapijpianij: ‘Xikinkixtitij Rahab uan nochin ichankauan’. Nejin kalyetouanij momakixtijkej ijkon kemej motenkaujkaj tapijpianij.
