Tanojnots 77

Amo teyi kichiuak maj motankuaketsanij

¿TIKELNAMIKI maj ika motajto nejin eyi telpochmej? Kemaj, yejuan itasojikniuan Daniel tein kixtopeujkej takual tein amo kuali yetoya maj kikuanij. Babilonios kintokaytiayaj Sadrac, Mesac uan Abednego. Sayoj ika, axkan xikinita. ¿Keyej amo motankuaketstokej iixpan ueyi tiotsin kemej oksekin? Tikitatij keyej.

¿Tikelnamiki tanauatilmej tein Jiova kijkuilojka, tein motokaytiaj Majtakti Tanauatilmej? Yekinika kijtoua: ‘Amo xikiniueyichiua oksekin tiotsitsin, ta sayoj nejua’. Nikan telpochmej kitakamattokej nejon tanauatil, maski semi ouij kichiuaskej nejon.

Nabucodonosor, tein tekiuajtia Babilonia, kinsentilij miakej taltikpakneminij uejueyi chiuanimej, maj kiueyichiuanij nejin tiotsin tein kichijchiujka. Yekin kintamiiluijka taltikpakneminij: ‘Keman kikakistiltiskej kuaomimej, arpas uan okseki manamikmej tein ika se tatsotsona, ximotankuaketsakan uan xikueyichiuakan nejin tiotsin tachijchiuj ika oro. Akin amo kichiuas, niman kipantamotaskej itech ueyi tikomit kampa taxotatok’.

Keman Nabucodonosor kikakik ika Sadrac, Mesac uan Abednego amo motankuaketskej, tel kualanik. Tanauatij maj kiniuikilianij. Uan ika ojpa kiniluij maj motankuaketsanij. Sayoj ika, telpochmej takuaujtamatkej iuan Jiova, uan kiiluijkej: ‘ToDios akin tiktekitiliaj uelis techmakixtis. Uan maski amo, tejuan amo timotankuaketsaskej iixpan motiotsin tachijchiuj ika oro’.

Keman Nabucodonosor kikakik nejin, okachiok kualanik. Yetoya se ueyi tikomit ompakauin, uan tanauatij: ‘¡Xitaxotaltikan itech ueyi tikomit, amo kemej ipa, ta chikojpa okachiok!’ Ompa, kininauatij seki itateuijkauan tein okachi chikaujkej maj kinilpianij Sadrac, Mesac uan Abednego, uan maj kinpantamotanij itech ueyi tikomit. Kemej tel taxotatoya, timeyot kinimiktij takamej tel chikaujkej. Uan ¿toni kinpanok eyi telpochmej tein kinpantamotkej tikoijtik?

Tekiuaj naltachiak tikoijtik, uan motelmoujtij. Tajtanik: ‘¿Amo tikinilpijkej eyi takamej uan tikinpantamotkej tikoijtik?’

Itakeualuan tanankilijkej: ‘Kemaj, yejua nejon tikchiujkej’.

Tekiuaj kijtoj: ‘Sayoj ika nej nikinita naui takamej nenentokej itech tit. Uan amo ilpitokej, niono teyi kinchiuilia tit. Uan naujpatika takat tamati kemej se dios’. Tekiuaj motokij itenoj ueyi tikomit uan kijtoj chikauak: ‘¡Sadrac, Mesac uan Abednego! ¡Xikisakan, itekitikauan Dios Ueyichiujkej!’

Keman kiskej, nochin taltikpakneminij kinitakej ika amo kinpanok nion teyi. Ompa tekiuaj kijtoj: ‘¡Maj taueyichiual imin Dios Sadrac, Mesac uan Abednego! Ta kititanik se iángel uan kinimakixtij porin amo motankuaketskej niono kiueyichiujkej niose tiotsin, ta sayoj imin Dios’.

¿Melauj ika nejin techkauilia se tel kuali neskayot tein technextilia ika moneki sayoj tiktakamatiskej Dios?

Éxodo 20:3; Daniel 3:1-30.