Tanojnots 78

Tajkuilol itech tepamit

¿TONI mochiujtok nikan? Nejin taltikpakneminij kipiaj se ueyi iluit. Tein tekiuajti Babilonia kiniyoleuak tel miakej taltikpakneminij uejueyi chiuanimej. Uan kikuitokej tatayilonimej tachijchiuj ika oro uan plata, tein kinkixtijkej itech itemplo Jiova tein moajsia Jerusalén. Sepasaj, imajpiluan se takat monextij ejekaixko uan peuak tajkuiloua itech tepamit. Uan nochin momoujtijkej.

Belsasar, iixuiuj Nabucodonosor, yejua katka tekiuaj. Kijtoj chikauak maj kiniuikilianij tamatinij. Kiniluij: ‘Akin uelis kixtajtoltis nejin tajkuilol uan nechiluis toni kijtosneki, kiselis miak netetayokolilmej, uan yejua mochiuas expatika tekiuaj itech tekiuajyot’. Sayoj ika, niose tamatkej uelik kixtajtoltij tajkuilol, niono uelik kijtoj toni kijtosnekia.

Imomaj tekiuaj kikakik tein mochiujtoya uan kalakito takualoyan. Kiiluij tekiuaj: ‘Ika kualtakayot, amo ximotelmoujti. Itech motekiuajyo yetok se takat tein kipia imin tamatilis diosmej. Keman moueyitat Nabucodonosor katka tekiuaj, kichiuak tayekankej inpan nochin tamatinij. Motokaytia Daniel. Xiktatitaui, uan yej mitsiluis nochi tein kijtosneki’.

Yejika Daniel kiuikakej iixpan tekiuaj. Satepan keman Daniel kijtoj ika amo kiseliskia netetayokolilmej, kiiluij Belsasar keyej Jiova kikuilij tekiuajyot iueyitat. Daniel kiiluij: ‘Yej motelueyichiuaya, uan Jiova kitatsakuiltij’.

Daniel kiiluij Belsasar: ‘Uan tej tikmattok nochi tein kipanok, uan tiksentoka timoueyichiua kemej katka Nabucodonosor. Tikuitok tatayilonimej tein yetoyaj itech itemplo Jiova uan ika titatayitok. Uan no tikiniueyichiua tiotsitsin tachijchiuj ika kuouit uan tet, uan amo tikueyichiua toUeyi Dios tein techmakatok tonemilis. Yejika Dios kichiuak maj se mayit kijkuilouani nejin tajtolmej’.

Daniel kiiluij: ‘Tein ijkuiliujtok yejua nejin: MENÉ, MENÉ, TEQUEL uan PARSÍN’.

‘MENÉ kijtosneki ika Dios kipouak itonaluan motekiuajyo uan kitalij itamilis. TEQUEL kijtosneki ika mitstamachiuak itech balanzas uan mitsitak ika amo ti yolkuali. PARSÍN kijtosneki ika motekiuajyo kinimakati medos uan persas’.

Keman Daniel tajtojtoyaok, medos uan persas peuak kinteuiaj tein nemiaj Babilonia. Moaxkatilijkej altepet uan kimiktijkej Belsasar. ¡Tein ijkuiliujtoya itech tepamit mochiuak nejon youak! Sayoj ika, ¿toni kinpanoskia israelitas axkan? Satepan tikitaskej, sayoj ika yekinika maj tikitakan toni kipanok Daniel.

Daniel 5:1-31.