Tanojnots 87

Telpoch Jesús moajsik templo

XIKITA telpoch tein tajtoua imiuan takamej tein xiuejkejya. Yejuan tamachtiaj itech itemplo Dios tein moajsi Jerusalén. Uan telpoch yejua Jesús. Nesi ika moteliskaltijya. Kipia 12 xiujmej.

Tamachtianij kitelmojkaitayaj Jesús maj kitelmatini tein Dios tamachtia uan nochi tein ijkuiliujtok itech Biblia. Sayoj ika, ¿keyej amo yetokej nikan José uan María? ¿Kani yetokej? Maj tikitakan.

Xijxiujtika José kiniuikaya ichankauan Jerusalén, uan ompa teuantiaj itech se ueyi iluit tein motokaytiaya Pascua. Tel uejka nejnemiaj keman kisayaj Nazaret uan yayaj Jerusalén. Amo onkayaj tepostamamanij niono tepospataninij. Yejika tel miakej taltikpakneminij nejnemiaj, uan yejuan kiniuikiliaya eyi tonal ajsiskej Jerusalén.

Itech nejon xiujmej, José kipiaya miakej ikoneuan. Uan monekia kinitas ikniuan Jesús okichpipil uan siuapipil tein okachi konemej katkaj. Itech nejon xiuit, José uan María mokeptoyajya Nazaret imiuan konemej. Moluiayaj ika Jesús yetoya imiuan okseki taltikpakneminij tein no mokeptoyajya. Sayoj ika keman motsakuilijkej kampa yaya mokauatij, amo kiajsikej. ¡Kitemojkej kampa yetoyaj imin chankauan uan imin tasojikniuan, uan amo no kiajsikej! Yejika mokepkej Jerusalén kitemotoj.

Satepan kiajsikej nikan itech templo. Kinkaktoya tamachtianij uan kinchiuilijtoya netajtanilmej. Uan nochin taltikpakneminij kimojkaitayaj tamatilis tein kipiaya Jesús. Sayoj ika María kiiluij: ‘Nokonetsin, ¿keyej ijkon titechchiuak? Mopopaj uan nejua timotekipachojtoyaj uan timitstemojtinemiaj’.

Jesús tanankilij: ‘¿Keyej nanechtemojtinemiaj? ¿Amo nankimatiaj ika monekia niyetos ichan noPopaj?’

Kemaj, Jesús kiuelitaya yetos kampa okachi kimatiskia tein Dios tamachtia. Tejuan no ijkon moneki timochiuaskej, ¿melauj? Ompa Nazaret, Jesús nochipa yaya nechikolmej kampa taueyichiuayaj. Uan kemej kuali kikakia tein moijtouaya, kimatik miak taman tein Biblia kijtoua. Maj tiktojtokakan ineskayo Jesús.

Lucas 2:41-52; Mateo 13:53-56.