Ichankauan José mokaltalitoj Egipto
Tanojnots 25
Ichankauan José mokaltalitoj Egipto
JOSÉ amo moxikojok. Kiniluij nochin itakeualuan maj kisanij kampa yetoyaj. Keman yetoya iselti iuan ikniuan, José peuak choka. Ueli timonemiliaj keniuj kimojkaitayaj ikniuan, porin amo kimatiaj keyej chokaya. Satepan, yej kiniluij: ‘Nejua ni José. ¿Nemiok nopopaj?’
Kemej ikniuan kitelmojkaitayaj, niono ueliaj tajtouayaj, uan momoujtiayaj. Sayoj ika, José kiniluij: ‘Ximotokikan, ika kualtakayot’. Keman motokijkej, kiniluij: ‘Nejua ninamokniuj José, akin nankinamakakej Egipto’.
José kisentokak kininojnotsak ika yemankayot: ‘Amo ximotajtakoltikan keyej nanechnamakakej nikan. Tein melauj, Dios nechualtitanik nikan Egipto maj nikinimakixtiki taltikpakneminij. Faraón nechixtalij maj nitekiuajti itech nochi altepet. Yejika, ximokepakan uan xikiluikan nopopaj nochi nejin. Uan xikiluikan maj nemiki nikan’.
Ompa, José kininauaj ikniuan uan nochin kinpitsoj. Keman Faraón kikakik ika ikniuan José ompa yetoyaj, kiiluij José: ‘Maj kiuikakan carretas uan maj kikuitij mopopaj uan ichankauan uan maj nemikij nikan. Nikinimakas tein okachi kuali tal itech nochi Egipto’.
Yejua nejon tein kichiujkej. Ueli tikita nikan itech taixkopin, José kitajpalojtok ipopaj keman ajsik Egipto iuan nochin ichankauan.
Ichankauan Jacob motelmiakilijkaya. Senochimejya katkaj 70 keman mokaltalitoj Egipto, tapoualmej iuan Jacob, ikoneuan uan iixuiuan. Sayoj ika no ompa yetoyaj imin namik, uan acha iuan miakej takeualmej. Nochin nejin peuak nemij Egipto. Kintokaytijkej israelitas, porin Dios kitokaypatak Jacob, uan kitalilij Israel. Mochiujkej itekitikauan Dios tein yej kinijitaka, kemej tikitaskej satepan.
