Majtakti chauismej
Tanojnots 32
Majtakti chauismej
XIKITA taixkopimej. Se taixkopin kinextia se chauis tein Jiova kititanilij Egipto. Yekinika tikita Aarón kiuitektok ika ikuouj ueyiat Nilo. Uan at niman mokepak esti, mikkej amichimej, uan ueyiat peuak tsojyaya.
Satepan, Jiova kichiuak maj kisanij kalamej itech ueyiat Nilo. Yetoyaj itech tikomimej, itech tapalkamej kampa kimanelouayaj tixti, itech imin tapechuan uan kampa yeski. Keman kalamej mikkej, egipcios kinsejsentilijkej uan peuak tatsojyaya itech altepet.
Satepan Aarón kiuitekik talnex ika ikuouj uan mokepak chakismej, moyotsitsin tein patanij uan tetipiniaj. Nejin katka expatika chauis.
Okseki chauismej amo kijyouijkejok israelitas, ta sayoj egipcios. Naujpatika chauis katka uejueyi moyomej tein kalakkej itech imin chajchan egipcios. Makuiltika chauis kinimiktij tapialmej. Tel miakej kuakuejmej, ichkamej uan cabras mikkej tein katka iminaxka egipcios.
Satepan Moisés uan Aarón kiajkopixojkej miak tamatsol kuoujnex, uan taltikpakneminij uan tapialmej kinkuik kokomej. Nejin katka chikuasentika chauis.
Satepan Moisés momaajokuik, uan Jiova kichiuak maj tatitikuini uan maj uetsini tesiuit. Amo keman ijkon tesiuia Egipto kemej nejon tonal.
Chikueyitika chauis katka tel miakej chapolimej. Amo keman ijkon onkatoya tel miak chapolimej, niono satepan ijkon onkatokok. Nochi kikuajkej tein tesiuit kikauak.
Chiknauitika chauis katka tatayouayanilot. Eyi tonalika tel tatayouayantiak itech nochi altepet, sayoj kampa israelitas yetoyaj amo tatayouayantiak.
Ika tamik, Dios kiniluij israelitas, maj kikuijkuiltianij iesyo se cabrajkonet oso se ichkakonet itech imin kajkaltenkuouj. Ompa, iángel Dios panok Egipto. Keman ángel kiitaya esti, amo akin kimiktiaya kalijtik. Sayoj ika, kampa amo kiitaya esti kimiktiaya tayekankakonet, ijkon kemej tayekankatapial. Nejin katka majtaktika chauis.
Keman panok nejin chauis, Faraón kinkauak israelitas maj yanij, uan kemej ipa motakuijkuilijkajya, niman nejon youak kiskej Egipto.
