Yekinika mixkosantsin
Tanojnots 11
Yekinika mixkosantsin
¿TIKMATI toni yekinika kichiuak Noé keman kisak iuan ichankauan itech arca? Yej kimakak Dios se netetayokolil. Xikita itech taixkopin keniuj kichiujtok. Noé kitayokolij Dios nejin tapialmej uan ika kitasojkamatilij porin kinimakixtij ichankauan itech se tetsaujkakiouit.
¿Timoluia ika kiyolpaktij Jiova nejon netetayokolil? Kemaj kiyolpaktij. Yejika moyektenkauak iuan Noé ika amo sepaok kinixpoloskia tein nemij nikan Taltikpak ika se tetsaujkakiouit.
Keman tal senkis uakik mokauak, Noé uan ichankauan kipeualtijkej se yankuik nemilis keman kiskej itech arca. Dios kintiochiuak uan kiniluij: ‘Xikinpiakan miakej konemej. Ximomiakilikan uan maj pexonikan ika taltikpakneminij noyampa’.
Sayoj ika satepan keman taltikpakneminij kikakiskiaj ika mochiuak se tetsaujkakiouit, acha momoujtiskiaj uan moluiskiaj ika oksepa mochiuaskia okse tetsaujkakiouit. Yejika Dios kinimakak taltikpakneminij teisa, uan maj ika kielnamikinij keman moyektenkauak ika amo sepaok kinixpoloskia ika at. ¿Tikmati toni kinimakak uan maj ika kielnamikinij? Se mixkosantsin.
Satepan keman takisa uan moixtapoua Tonaltsin nesi mixkosantsin. Mixkosantsin uelis kipias miak kualtsitsin tapalmej. ¿Tikitakaya se? ¿Tikita tein yetok itech nejin taixkopin?
Yejua nejin tein Dios kijtoj: ‘Nimoyektenkaua ika amo sepaok nikinixpolos taltikpakneminij uan tapialmej ika se tetsaujkakiouit. Niktalijtok nomixkosantsin. Uan keman nesis mixkosantsin, nikitas uan nikelnamikis tein nimoyektenkauak’.
Yejika, keman tikitas se mixkosantsin, ¿toni moneki tikelnamikis? Kemaj, tein Dios moyektenkauak ika amo sepaok kinixpolos ika se tetsaujkakiouit tein nemij nikan Taltikpak.
