JIOVA kimatia ke se tonal iKonetsin tein okachi kitasojta monekia kitemakas inemilis. Tein moijtojka itech Génesis 3:15 ijkon kiteajsikamatiltiaya. Dios kinekia maj taltikpakneminij kuali kiajsikamatinij keniuj kiyolkokoskia keman momikiliskia iKonetsin, yejika kichiuak maj moijkuilo itech Biblia tein panok keman Abrahán ­kiiluij maj kitemakani itasojkonetsin Isaac.

Moneki tikelnamikiskej ke Dios motenkauak ke Temakixtijkej ualeujtoskia itechkopa Isaac. Abrahán senkis kineltokaya nejon netenkaualis uan kimatia ke komo monekiskia, Dios kiajokuiskia ikonetsin. Yejika tatakamatik uan ika miak pakilis yaya kitemakati, sayoj ke Jiova kititanik se iángel maj kitsakuiliani. Satepan kiiluij ke tel ueyi takuaujtamatilis kinextijtoya uan oksepa kiiluij tein iuan motenkaujka achto.

Seki xiujmej satepan, Isaac kinpiak ome konemej: Esaú uan Jacob. Esaú amo kipatiuitaya tein ualeua imako Dios, sayoj ke Jacob kemaj, yejika kitatiochiuijkej. Dios kipatilij itokay uan kitalilij Israel. Yejua kinpiak 12 ikoneuan. Uan ompa ualeujkej uejueyi kalyetouanij israelitas. Sayoj ke ¿keniuj motelmiakilijkej?

Nochi nejin peuak keman ikniuan José tein tayekanayaj, peuak kitelnexikoluiaj uan kinamakakej kemej se takeual. Takouanij kiuikakej Egipto kampa kipanok miak ouijkayomej. Sayoj ke Dios kipaleuij nejon telpoch yolchikauak uan melauak, uan se tonal, faraón kimakak se ueyi tanauatil. Ika nejin uelik kinpaleuij ichankauan keman se mayan kichiuak maj Jacob kintitanini seki ikoneuan maj kikouatij takual itech altepet Egipto. ¿Akoni imako moajsia takual? ¡Yejua José! Semi kinyololinij keman oksepa moitak imiuan ikniuan. Yejua kintapojpoluij porin kinitak ke moyolnonotskajya, uan kinnauatij maj kinkuitij oksekin ichankauan. Faraón kinmakak okachi kuali talmej. Uan keman ompa moajsiaj nejin kalyetouanij, peuak momiakiliaj uan kualtsin moajsiaj. José kiajsikamatik ke Jiova kikauak maj panouani nejon tein tapaleuiskia maj mochiuani tein motenkaujka.

Jacob nemik Egipto imiuan nochin ichankauan hasta keman momikilij. Keman yaya momikilitia, kijtoj ke Temakixtijkej eskia se ueyi tekiuaj tein itech ualeujtoskia ikonetsin Judá. Seki xiujmej satepan, José kijtoj ke Dios kinkixtiskia ichankauan Jacob itech altepet Egipto.

​(Motaksaltia itech Génesis capítulos 20 a 50 uan Hebreos 11:​17-​22.)