EYI tonal satepan ke Jesús momikilij, sekin imomachtijkauan siuamej yajkej kampa Jesús kipachojkaj. Uan kiajsitoj tapotok tekoyok uan amo teyi kipiayaok. Aksa kiixkepak tet tein ika tentsaktoya.

Ompa, ome ángeles kinmonextilijkej. Uan se kiniluij: “Nankitemoaj Jesús nazareno [...]. Yejuatsin pankisak ya yoltok” (Marcos 16:6). Nejon siuamej motalojkej kiniluitoj tatitanilmej. Itech ojti moitakej iuan Jesús uan kiniluij: “Amo ximomoujtikan. Ta; xiyakan xikinnejmachtitij nokniuan de ke moneki maj xiyakan [...] Galileajkopaka uan ompa nannechitaskej” (Mateo 28:​10).

Satepan, keman ome imomachtijkauan kiskej Jerusalén uan yajtoyaj Emaús, kinajsito se takat tein amo kiixmatiaj uan kintajtanij toni ika tajtojtiayaj. Nejon takat katka Jesús, sayoj ke amo kiixmatiaj porin moixpataka. Ika tayokol kinankilijkej ke ika tajtojtiayaj imin Tamachtijkauj, uan yejua peuak kinmelauilia nochi tein Biblia kijtojka ke kipanoskia Mesías. Tein melauj, nochi itech mochiuak Jesús tein achtook moijtojka ke kipanoskia Mesías. * Keman kimatkej ke iuan tajtojtoyaj Cristo, tein kipiayaya nemilis kemej se espíritu, amo uelikok kiitakej.

Nejon ome imomachtijkauan Jesús mokepkej Jerusalén uan yajkej kinitatoj tatitanilmej tein monechikojtoyaj itech se kali kampa tatsaktoya. Keman kijtojtoyaj tein mochiuak, Jesús oksepa kinmonextilij nochin tein ompa yetoyaj uan semi kimoujkaitakej. Yejua kintajtanij: “¿Keyej no semi nantanemiliaj eliuis?”. Uan ompa kiniluij: “Ijkuiliujtok tech in Tajtoltsin de Dios ke Nejuatsin ni Cristo [...], semi moneki[a] nitajyouis uan nimikis. Uan no moneki[a] ke nipankisas niyoltok [...] ipan eyi tonalika” (Lucas 24:​38, 46).

Itech 40 tonalmej Jesús miakpa kinmonextilij imomachtijkauan. Se tonal, kinmonextilij panoua 500 imomachtijkauan. Xa ijkuak kinmakak nejin tekit tein motelneki: “Xiyakan [...] uan xikinnextilikan nochi in taltikpakuanij [...] maj mochiuakan nomomachtijkauan. [...] Uan xikinmachtikan de ke maj tatakamatikan nochi ika in tanextililismej ten namechnajnauatiaj maj no xikchiuakan. Uan xikmatikan ke Nejuatsin [...] nachipa namouan [niyetos]” (Mateo 28:​19, 20).

Keman Jesús sayojya monechikoj imiuan 11 itatitaniluan tein amo kikaujkej, motenkauak imiuan ijkon: ‘Kuak Yektikatsin Espíritu nankiseliskej namejuan, nantetapouijtinemiskej de Nejuatsin nonouiyampa de nochi senmanauak’ (Hechos 1:8). Ompa, peuak pankisa iluikak uan se mixti kikemik uan amo uelikok kiitakej.

​(Motaksaltia itech Mateo capítulo 28, Marcos capítulo 16, Lucas capítulo 24, Juan capítulos 20 uan 21 uan 1 Corintios 15:​5, 6.)