SATEPAN ke Pablo mochiuak itatojtokakauj Cristo, peuak kiteixmatiltia iTekiuajyo Dios ika ueyi tanejnekilis. Sayoj ke axkan yejua kiteltajyouiltiskiaj. Nejin tatitanil yolchikauak uejuejka kitetapouito iTekiuajyo Dios, se taixyekanalis tein kichiuaskia maj taltikpakneminij nemikan ijkon kemej Dios kinekia yekinika.

Keman yekinika kisak tamachtito itech altepemej, panok Listra uan kipajtij se takat tein yolik koxoj. Nochin tein kiitakej peuak chikauak kijtouaj ke Pablo uan Bernabé katkaj dioses. Ouij kinkisak kichiuaskej maj amo kinueyichiuanij ika nemaktilmej. Sayoj ke satepan taltikpakneminij kinneltokilijkej imin takajkayaualis tein kitauelitayaj Pablo uan kitetenkej hasta keman kinemilijkej ke kimiktijkej. Sayoj ke Pablo ixpetanikok, uan tepitsin satepan oksepa ompa yajki kinyolchikauato imomachtijkauan Jesús.

Satepan, sekin judíos tein katkaj itatojtokakauan Cristo, kijtouayaj ke taneltokanij tein amo katkaj judíos, monekia kitakamatiskej seki taman tein kijtouaya Tanauatil tein kiselij Moisés. Pablo kinixpantilito kuejmol tatitanilmej uan tayekananij tein moajsiaj Jerusalén. Keman yejuan kuali kiitakej Biblia uan kitajtanijkej Dios maj kinpaleui ika iespíritu, kintajkuilouilijkej nechikolmej uan kinnauatijkej maj amo kinueyichiuanij tiotsitsin, maj amo kikuanij esti niono nakat tein kipiaya esti uan maj amo auilneminij. Nejon tein kiniluijkej kemaj ‘monekia’, sayoj ke kichiuaskiaj nejon amo kijtosnekia ke monekia kitojtokaskej nochi Tanauatil tein kiselij Moisés (Hechos 15:​28, 29).

Keman Pablo ojpatika kisak tamachtito itech altepemej, panok Berea, se altepet tein axkan poui Grecia. Judíos tein ompa nemiaj kiselijkej iTajtol Dios ika nochi imin yolo, uan mojmostaj kitemouayaj itech Biblia ox melauak katka tein momachtijtoyaj. Tepitsin satepan, taixnamikinij kinekiaj kijtakoskej Pablo yejika yajki Atenas. Ompa moajsik imin ixpan sekin takamej uejueyi taixmatinij tein ompa kayomej katkaj, uan kitemakak se tel kuali tamachtilis ika ueyi poujkaitalis uan tein kintaneltoktij.

Satepan ke Pablo expatika kisak tamachtito itech altepemej, yajki Jerusalén. Keman ajsik itech templo, taixnamikinij kinekiaj kimiktiskej. Sayoj ke soldados romanos kipaleuijkej uan kiuikakej imin ixpan tekiuanij. Kemej Pablo katka romano kikaujkej maj yani iixpan tekiuaj Félix uan maj ompa motenpaleuiani. Judíos amo keman uelkej kinextijkej ke yekmelauj kichiujtoya tein amo kuali. Maski ijkon, Festo —akin kiixpatak tekiuaj Félix⁠— yaya kitemakati imiuan judíos. Sayoj ke Pablo tajtanik maj kiuikanij iixpan tekiuaj romano, uan tekiuaj Festo kinankilij: “Tiyas axkan iixpan ne ueyi chiujkej” (Hechos 25:​11, 12).

Yejika ompa Roma kiitaskiaj tein Pablo kipantiayaj. Yejua mokalakij itech barco tein yaya Italia, sayoj ke pankalakik, uan mokauak Malta itech tonalmej keman taseseyaya. Keman ajsik Roma, itech se kali kipixtoyaj ome xiuit. Maski ijkon, Pablo ika ueyi tanejnekilis kisentokaya kinmachtiaya iTekiuajyo Dios nochin akin kikalpanouayaj.

(Motaksaltia itech Hechos 11:​22–​28:​31.)