Satanás uan iamokuali ejekauan amo miak tonalmejok kinkajkayaujtoskej taltikpakneminij. Jiova kiniualpantamotakya nikan taltikpak (Apocalipsis 12:9). Amo uejkaua, Dios kinchiuiliti okse taman Satanás uan iamokuali ejekauan. Tatitanil Juan kijtoj tein Dios kiitaltij: “Nikitak ke se ángel ualpantemoaya ne eluiyaktsinko. Uan yejua maaktiualaj se llave tenika tatapoa kampa ne ueyi taltekoch [...]. Uan no maaktiualaj se ueyak tepos cadena. Uan ne ángel kikitskij ne ueyi tekuani uan kiilpij uan kitsakuato para se mil xiuit. [...] Yejua ne in achtopa kouat ten nentiualaya. Uan no yejua itokay in amokuali Satanás. Uan ijkon in ángel kipantamotak in Satanás kampa ne ueyi taltekoch uan kipantsakuak [...]. Uan ijkon in amokuali Satanás amo uelis ok kinkajkayaujtinemis ok in taltikpakuanij hasta maj panokan nojon se mil xiujmej” (Apocalipsis 20:1-3). Satepan, Amokuali Satanás uan iamokuali ejekauan senkis kinixpoloskej (Apocalipsis 20:10).

 Taltikpakneminij akin amo yolkualmej no kinixpoloskej (Salmo 37:9, 10; Lucas 13:5).

Satepan keman Satanás uan iamokuali ejekauan kintsakuaskej, Jiova kinteltatiochiuis taltikpakneminij. Xikonelnamiki ke mikemej amo yoltokej. Jesús kijtoj ke mikemej kemej eskia kuali kochtokej, sayoj ke amo takochitaj (Juan 11:11-14). Kijtoj nejin porin kimatia ke ejkoskia tonal keman oksepa nemiskiaj tein kochtokej itech mikilis. Yejua kijtoj: “Ejkos ok in tonal keman nochi in animajmej [oso mikemej] [...] ual kisaskej” (Juan 5:28, 29; no xikonita Hechos 24:15).

Yejuan oksepa nemiskej nikan taltikpak. Ijkuak, amo tikakiskejok ke aksa momikilij, ¡ta tikakiskej akonimej moajokkejya! ¡Titelyolpakiskej tikinseliskej totasojikniuan uan tochankauan tein moajokuiskej!