Dauda kijtoj: “Nimoskaltij itech se xolalkonet tein pouia Sierra Leona norte. Se tonal keman nikonetok katka, nokalyetouanij motalkuiliayaj iuan okse kalyetouanij. Nochin ome kalyetouanij kijtouayaj ke nejon tal imin axka katka. Kinotsatoj se naual maj kinpaleuiani maj kimelauakan nejon kuejmol. Naual kimakak se teskat okse takat uan kitsontsakuak ika se istak taken. Tepitsin satepan, takat tein kitsontsakkej peuak uiuiyoka uan mitonia. Kiitak teskat uan kijtoj chikauak: ‘¡Nikita se takat ueuentsinya tein motokijtiuits! Takentok ika istak taken. Uejkapantik uan kuapochiktik uan nejnemi tepitsin tomotstik’.

”¡Yejua noueyitat kiitstoya! Kemej moujkauiuiyokatoya kintsajtsilij: ¡Komo amo nankineltokaj tein nikijtojtok, xiualakan uan namejuan xikitakan itech teskat! Sayoj ke ¡amo akin moixeuij kichiuas nejon! Naual kiyolseuij takat keman kipijpisuilij seki xiujpaj tamanelol tein yejua kikui uan at tein kiuikaya itech se tekomat.

”Itenkopa nejon takat tein maktoya teskat, ‘noueyitat’ kijtoj ke tal toaxka katka. Kiiluij noueyinan maj tatokani itech tal uan maj amo motekipachouani. Okse kalyetouanij kijtojkej ke kuali yetok. Momelauak kuejmol”.

 Nejin motelita itech altepet África occidental. Kemej ompa uan itech nochi taltikpak, tel miakej kineltokaj ke mikemej youij nemitij kampa yetokej espíritus, uan ompa uelij kinitaj taltikpakneminij uan kinpaleuiaj oso kinijtakouaj itech imin nemilis. ¿Melauak nejon tein kineltokaj? ¿Yekmelauj yoltokej mikemej? Uan komo amo, ¿akonimej kichiuaj maj se kinemili ke yejuan imin espíritus mikemej? Motelneki maj se kimati tein yekmelauj itanankililuan nejin netajtanilmej, ta komo tikajsikamatij techuikas itech nemilis, uan komo amo techuikas itech mikilis.