Itech inintonaluan yekinika itatojtokakauan Cristo, seki amo ueyi oloch taltikpakneminij kampa pouiaj “tatitanilme de Cristo uan inuan [...] ueuentsitsin” akin yetoyaj Jerusalén kichiuayaj tekit kemej taixyekananij, yejuan kiixejekouayaj seki taman tein motelnekia uan tein kinpaleuiskia nochin taixpejpenalmej akin kichiuayaj kemej Cristo (Hechos 15:2). Yejuan kitemouayaj tein kijtoua iTajtol Dios uan kikauayaj maj iespíritu kinixyekana, ijkon ueliaj kisepanixejekouayaj uan moyektenkauayaj ika tein momachtiayaj (Hechos 15:25). Itech totonaluan no ijkon kichiuaj Oloch Taojtokaltianij.

Ika nejin Dios kichiua itanejnekilis. Tokniuan taixpejpenalmej akin pouij itech Oloch Taojtokaltianij kitelpoujkaitaj iTajtol Dios uan kitelmatij keniuj kiixyekanaskej tekit uan tamachtiskej. Monechikouaj sejse semana uan kiitaj keniuj okachi uelis kinpaleuiskej tokniuan semanauak taltikpak. Ijkon kemej mochiuaya itech inintonaluan yekinika itatojtokakauan Cristo, kitemakaj tanauatilmej tein mokixtiaj itech Biblia, uelis ika amat oso iniuan tokniuan takalpanouanij uan okseki tokniuan. Nejin tapaleuia maj nochin kipiakan sayoj se tanemilil uan maj sentekitikan itech ixolal Dios (Hechos 16:4, 5). No ijkon, kiixyekanaj nochi tamachtilis tein tikseliaj, kinyolchikauaj nochin maj kitayekanaltikan tanojnotsalis uan kiitaj keman kinixtaliaj tokniuan maj kichiuakan tataman tekimej itech inechikol Dios.

Mokauaj maj kinixyekana Dios ika iespíritu. Oloch Taojtokaltianij kitemouaj inepaleuil okachi Ueyi Taixyekankej itech iluikak uan taltikpak, Jiova, uan akin taixyekana itech nechikol, Jesús (1 Corintios 11:3; Efesios 5:23). Nejon tokniuan ika miak pakilis taixyekanaj itech ixolal Dios, sayoj ke amo kitemouaj moueyichiuaskej. Kemej kichiuaj taixpejpenalmej, ‘kitoktiliaj Cristo tein tamati kemej ichkatsin uan kiseuikaj kampa yeski yas’ (Apocalipsis 14:4). Oloch Taojtokaltianij kiteltasojkamatij keman tiktajtaniaj Dios maj kinpaleui uan maj kitiochiua tekit tein kiixyekanaj.

• Itech inintonaluan yekinika itatojtokakauan Cristo, ¿akonimej taixyekanayaj?

• ¿Keniuj Oloch Taojtokaltianij axkan mokauaj maj Dios kinixyekana?