Akin pouij iniuan kalyetouanij Betel kichiuaj tataman tekimej uan ijkon tapaleuiaj maj motanojnotsa itech se oso miak uejueyi altepemej; uelis kampa kikepaj amaixmej itech okse tajtol, kampa kikixtiaj itech amat, kampa kiitaj maj nochipa onka amaixmej oso kampa kichijchiuaj ika audio uan video, uan okseki tamanok.

Taixyekananij itech Sucursal kiixyekanaj tekit. Oloch Taojtokaltianij kinixpejpenaj eyi tayekananij oso okachi akin takuaujtamachmej maj taixyekanakan itech se kali Betel. Nejin tokniuan kinnauatiaj Oloch Taojtokaltianij nochi kuali tekit tein mochiujtok itech altepemej kampa taixyekanaj uan kuejmolmej tein mochiuaj, ijkon ueli kimatij toni tamachtilis kiualkuis itech amaixmej tein kisas satepan, ijkon kemej tamachtilis tein motemakas itech nechikolmej uan uejueyi nechikolmej. Oloch Taojtokaltianij kititanij se tokniuj akin tajtoua inintenkopa, maj takalpano itech kalmej Betel uan maj kinpaleui Taixyekananij itech Sucursal maj kuali kichiuakan inintekiuj (Proverbios 11:14). Keman kinkalpanoua mochiua se nechikol uan kitemaka se tanojnots tein ika kinyolchikaua tokniuan akin pouij itech altepemej kampa motaixyekana itech kali Betel.

Temakaj nepaleuil itech nechikolmej. Itech kali Betel kijtouaj uan kiamataliaj keman mochiua se yankuik nechikol. No ijkon, kinixyekanaj akin kichiuaj tekit kemej precursor, akin kichiuaj tekit kemej misionero uan tokniuan takalpanouanij itech circuito. Kiixtaliaj kani uan kemanian mochiuaskej uejueyi nechikolmej, kiixyekanaj tachijchiualis ika Kalmej kampa tiMosentiliaj uan kititanij amaixmej itech nechikolmej. Nochi tein mochiua itech se kali Betel tapaleuia maj okachi kuali motanojnotsa (1 Corintios 14:33, 40).

• ¿Keniuj Taixyekananij itech Sucursal kinpaleuiaj Oloch Taojtokaltianij?

• ¿Toni tekimej mochiua uan moixyekana itech se kali Betel?