Itech Kalmej kampa tiMosentiliaj tikseliaj tamachtilis ika Biblia tein ika tajtoua iTekiuajyo Dios, tein Jesús nochipa ika tajtoj keman nemia nikan taltikpak (Lucas 8:1, TNM).

Ompa tikueyichiuaj Dios itech toxolal. Itech nejon kali moixyekana tanojnotsalis ika kuali tanauatilmej (Mateo 24:14). Kalmej kampa tiMosentiliaj tataman chijchiujtokej, sayoj ke nochin kualtsitsin uan amo tel uejueykej; miakkan ompa mosentiliaj miak nechikolmej. Itech nejin xiujmej tikchijchiuanij tel miak (kemej makuil itech se tonal), ijkon uelis mosentiliskej nochin tokniuan akin momiakilijtokej itech nochi nechikolmej. ¿Keniuj ueli mochiua nejin? (Mateo 19:26.)

Mochijchiuaj ika tomin tein mosentilia tein taltikpakneminij kitemakaj ika nochi ininyolo. Tomin tein mosentilia motitani itech kali Betel uan uelis mokuis keman tokniuan itech se nechikol monekis kichijchiuaskej se yankuik kali oso kiyekchijchiuaskej tein kipiajya.

Kichijchiuaj tapaleuianij akin kimatij kichiuaskej tataman tekimej uan amo kintaxtauiaj. Itech miak altepemej kinixtalijkej Oloch Tokniuan akin Kichijchiuaj Kalmej kampa tiMosentiliaj. Nejin tokniuan akin nochipa tapaleuiaj uan sekin sayoj seki tonalmej, youij kampa moajsij tataman nechikolmej itech ininueyi altepeuj, maski tel uejuejka, uan kinpaleuitij tokniuan keman kichijchiuaj Kali kampa Mosentiliaj. Itech okseki uejueyi altepemej, kinixtaliaj seki tokniuan maj kiixyekanakan tekit keman mochijchiua oso moyekchijchiua se Kali kampa tiMosentiliaj itech xolalmej kampa kinixtalijtokej. Maski miakej akin kimatij kichiuaskej miak taman tekit tapaleuiaj keman mochijchiua se kalnechikoloyan uan amo kitanij tomin, akin okachi miak tekit kichiuaj keman mochijchiua se Kali kampa tiMosentiliaj, yejuan akin ompa monechikoskej. Nejin ueli mochiua ika iespíritu Jiova uan nepaleuil tein itekitikauan kitemakaj ika nochi ininyolo (Salmo 127:1; Colosenses 3:23).

• ¿Keniuj ueli tikchijchiuaj Kalmej kampa tiMosentiliaj noyampa taltikpak?