Komo tejuatsin tionmomachtia Biblia iuan se itaixpantijkauj Jiova, xa achto tionmomachtia sejse tamachtilis. No ijkon moneki tikchiuaskej keman tiyaskej nechikolmej, ijkon tikseliskej okachi nepaleuil. Okachi kuali yeski komo tikonixtalia kemanian tionmomachtis.

Xikonixtali kemanian uan kani kuali tionmomachtis. ¿Kemanian ueli okachi kuali tionmomachtia? ¿Kualkan achto ke tionpeuas tiontekitis, oso tayouaya keman konemej kochitijya? Maski amo semi tionkemanti, xikonixtali tein tionuejkauas tionmomachtis uan maj amo teyi mitsontsakuili. Xikontemo kampa taseujtok uan maj amo teyi mitsontapololti, yejua ika monekis tikonseuis radio, teposixyekauil oso teléfono. Tikonchiuas netataujtil achto ke tionmomachtis mitsonpaleuis xikonelkaua netekipacholmej tein tikonpia uan okachi kuali tikonpias motanemilil itech iTajtol Dios (Filipenses 4:6, 7).

Xikontemo tajtolmej tein tayekantokej uan xiontanankili. Yekinika xikonixmati nochi tamachtilis. Xikonita itokay tamachtilis uan keniuj mouika iuan kemej moxejxeloua tamachtilis, xikonyekita taixkopimej uan xikonixtajtolti netajtanilmej tein ika moelnamiki tanemililmej tein tayekantokej. Satepan, xikonixtajtolti sejse párrafo uan xikontemo itanankilil netajtanil tein kipia. Xikontemo itech Biblia taxelolmej tein ompa ixnesij uan xikonita keniuj kipaleuiaj tamachtilis (Hechos 17:11). Keman tikonajsis tanankilil, xikonchajkuilo seki tajtolmej tein tayekantokej uan tein mitsonpaleuis xikonelnamiki. Ijkon, itech nechikol komo tikonneki uelis tionmomaajokuis uan tiontanankilis ika tein tikonajsikamatis.

Keman tikonitas tataman tamachtilismej tein motemakaskej sejse semana itech nechikolmej, tikonpias okseki tanemililmej uan ijkon okachi tikonixmatis Biblia (Mateo 13:51, 52).

• ¿Toni uelis tikonixtalis uan ijkon tionmomachtis tein moitas itech nechikolmej?

• ¿Keniuj uelis tionmomachtis uan ijkon tiontanankilis itech nechikol?