Itech Biblia motajtoua ika ome oloch takamej akin kichiuaj tekimej itech nechikol: “tayekananij uan tapaleuianij” (Filipenses 1:1, TNM). Itech miak nechikolmej moajsij sekin nejin tokniuan. ¿Keniuj techpaleuiaj tokniuan akin tekitij kemej tapaleuianij itech nechikol?

Kinpaleuiaj oloch tayekananij. Tapaleuianij kipiaj se kuali uikalis iuan Dios, uelis iniuan se takuaujtamatis uan kichiuaj inintekiuj ika miak nejmachkayot, sekin telpochmejok uan oksekin xiuejkejya. Yejuan tapaleuiaj ika tekimej tein motelnekij uan tein nochipa mochiuaj itech nechikol uan itech Kali kampa tiMosentiliaj. Ijkon, tayekananij okachi uelij tamachtiaj uan kinyolchikauaj tokniuan.

Tapaleuiaj itech miak taman tein moneki. Seki tapaleuianij tekitij kemej tayektalianij uan kinseliaj nochin akin youij nechikolmej. Oksekin kitaliaj nekuikatilmej uan kiitaj maj kuali kakisti tepos, kixejxelouaj amaixmej, kiamataliaj nochi tomin tein motekitiltia uan kiixtaliaj itech katiyejua xolalmej moneki tanojnotsaskej akin pouij itech nechikol. No ijkon, tapaleuiaj maj chipauak uan maj kuali moita Kali kampa tiMosentiliaj uan kinpaleuiaj tokniuan akin xiuejkejya ijkon kemej kinnauatiaj tayekananij. Tapaleuianij kichiuaj tein yeski tekimej tein kiniluiskej maj kichiuakan, uan nochin kinpoujkaitaj porin tekitij chikauak uan ika miak pakilis (1 Timoteo 3:13).

Temakaj se kuali neskayot ika ininkuali uikalis iuan Dios. Tapaleuianij kinixpejpenaj porin kipiaj kualneskayomej tein kinextia ke kipiaj se kuali uikalis iuan Dios. Tamachtilismej tein kitemakaj itech nechikol kichikauaj totakuaujtamatilis. Kemej kikauaj se kuali neskayot itech tanojnotsalis, techpaleuia maj titanojnotsakan ika yolchikaualis, uan porin yejuan kuali kinpaleuiaj tayekananij kichiuaj maj onka yolpakilis uan maj kuali timouikakan (Efesios 4:16). Satepan, yejuan no uelis mochiuaskej tayekananij.

• ¿Toni kualneskayomej kipiaj tapaleuianij?

• ¿Keniuj kichiuaj tapaleuianij maj kuali motekiti itech nechikol?