Keman tikpiaj se totasojikniuj tein tikuelitiliaj itachiualis uan tikpoujkaitaj, no tiknekij timochiuaskej kemej yej. Biblia kijtoua «Tejuatsin [Jiova] tion Yolmelauaktsin uan tiontachiujtinemi sayoj ika tein melauj» (Apocalipsis 15:3). Komo tiknejnekij timochiuaskej tiitasojikniuan Dios, moneki timochiuaskej tiyolkualmej uan tiyolmelaujkej. Biblia kijtoua: «Porin nekes tein kichiujtinemij tein Dios kimonekiltia, yejuan ne yekyolmelaujkej ya ijkon kemej Yejuatsin Yolmelauaktsin» (1 Juan 3:7). Tikitatij seki tachiualismej tein uelis tikchiuaskej kemej Jiova kichiua:

Maj tikinpaleuikan oksekin. «Maj tikinpaleuijtiyakan nochi takayot.» (Gálatas 6:10.)

Timochiujtoskej kuali tekitinij. «Uan akin tachtektinemia, yejua ne maj kikaujtiuj ya nitachtekilis. Uan okachi kuali maj motekitilti ika imauan itech se kuali tekit.» (Efesios 4:28.)

Maj tikchipaujtokan tonakayo uan totachiualisuan. «Xichipaujkanemikan uan xikyolpaktijtinemikan Dios. Uan nochi nejin taman chipaujkanemilis, yejua nejon monekis xikchiujtiyakan para ijkon nankimouistilijtiyouij Dios.» (Romanos 12:1.)

 Maj tikintasojtatokan uan maj tikinpoujkaitstokan tokalyetouanij. «Ke kada se teyokich moneki kitasojtas isiuauj ijkon kemej in teyokich mopialijtinemi [...] tetasojtalis. Ika ya nojon kada se tesiuauj moneki maj momouiskauika iuan iyokich. Namejuan tein nankonetsitsin, moneki xikintakamattiyakan namotatuan.» (Efesios 5:33–6:1.)

Maj tikintasojtatokan oksekin. «Moneki maj timosepantasojtakan se uan okse porin ne tetasojtalis ualeujtok de toTajtsin Dios.» (1 Juan 4:7.)

Maj tiktakamattokan imin tanauatiluan tekiuanij. «Uan nochi namejuan moneki xikintakamattiyakan nochi nejon tekiuanij [...]. Uan no ximoxtaujtiyakan nochi tataman [...] impuestos tein in tekiuanij namechtopaluiaj.» (Romanos 13:1, 7.)