Moneki tikixmatis Dios uan ijkon uelis timochiuas tiitasojikniuj. Motasojikniuan kimattokej motokay uan kikuij, ¿amo neli? Dios no kineki xikixmati uan xikui itokay. Itokay Dios, Jiova (Salmo 83:18, Mateo 6:9). Uan no, moneki tikmatis toni kiuelita uan toni amo kiuelita, akonimej itasojikniuan uan akonimej kiteltauelitaj. Kemej uejkaua se kiyekixmati aksa, Biblia kijtoua ika semi motelneki maj tikxelokan tepitsin den tonalmej uan ijkon tikixmatiskej Jiova (Efesios 5:15, 16).

Itasojikniuan Dios kichiuaj tein kiuelita. Xitanemili itech motasojikniuan. Komo tej tikineliuisuia uan tikchiua tein amo kiuelitaj, ¿kisentokaskej mochiujtoskej motasojikniuan? Amo. No ijkui komo tikneki timochiuas tiitasojikniuj Dios, moneki tikchiuas tein kiuelita (Juan 4:24).

Amo nochin taneltokalismej techpaleuiaj maj timochiuakan tiitasojikniuan Dios. Jesús, tein iteltasojikniuj Dios, kijtoj ika onkak ome ojti. Se patauak, uan ompa youij miakej taltikpakneminij. Nejin ojti techojtokaltia itech ixpoliuilis. Okse pitsauak, uan ompa amo miakej youij. Nejin ojti techojtokaltia itech nemilis nochipaya. Nejin kijtosneki komo tikneki timochiuas tiitasojikniuj Dios, moneki tikmatis keniuj tikueyichiuas kemej kiuelita (Mateo 7:13, 14).