Satanás kineki maj tiktekitiltikan naualot. Miakej taltikpakneminij kintakachiuaj imin uejkaujtatuan tein momikilijkejya, porin amo kinekij maj kinijtakokan. Kichiuaj porin kinimouiliaj mikemej. Onkak taltikpakneminij tein kinimailpiliaj imin pilkoneuan se listón, yejuan moluiyaj ika kipia chikaualis. Sekin kiitatij naual maj kinpajti ika teisa xiujmej. Sekin kipixtokej teisa oso kitaatijtokej porin yejuan moluiyaj ika kipia chikaualis tein kinpaleuis. Oksekin kitkitinemij kuixij iisti oso okse teisa, porin yejuan moluiyaj kinpaleuia itech imin tanamakalis, oso kiitatij naual maj kinpaleui itech nekuejmololmej tein kipiaj kemej namikuanij.

Se taman kemej uelis tikixtopeuas tein Satanás kitekitiltia, moneki ximochiua xiitasojikniuj Jiova. Jiova Dios uan iánjeles okachi kipiaj uelilis, amo ijkui Satanás uan iamokuali ejekauan (Santiago 2:19; Apocalipsis 12:9). Jiova tel senka kinejneki kikuis iuelilis uan ika kinpaleuis sayoj itasojikniuan tein amo kikauaj (1 Pedro 3:12).

ITajtol Dios kijtoua: «Maj amo tiktekitiltikan naualot». Jiova amo nenken kiuelita naualot, porin nejin tachiualismej uelis techtalis imaixko Amokuali Satanás (Levítico 19:26, NM; Gálatas 5:20).