Jiova amo kinkauas taltikpakneminij tein amo yolkualmej maj kijtakokan Xochital. Ompa sayoj nemiskej itasojikniuan Dios. ¿Toni kinpanos taltikpakneminij tein amo yolkualmej? Uelis tikmatiskej tanankililis komo tikitaj tein yekneli kipanok Noé. Noé nemik ne tel uejkaua. Katka se takat yolkuali, yej nochipa mochikauj ika nochi iyolo kitakamatis Jiova. Uan oksekin taltikpakneminij kichiuayaj tein amo kuali. Yejika, Jiova kiiluij Noé ika kiualkuiskia se tetsaujkakiouit tein ika kinixpoloskia taltikpakneminij tein amo yolkualmej. No kinauatij maj kichijchiua se arca, uan keman ualaskia Tetsaujkakiouit ikalyetouanij uan yej amo mikiskiaj (Génesis 6:9-18).

Noé uan ikalyetouanij kichijchiujkej se arca. Noé kininejmachtij taltikpakneminij ika ualaskia se tetsaujkakiouit, sayoj ika amo akin kikakilij. Kisentokayaj kichiujtoyaj tein amo kuali. Keman Noé kitamichijchiuj arca kinkalakij tapialmej, uan ompa no kalakik yej uan ikalyetouanij. Satepan, Jiova kiualkuik se tetsaujkakiouit. Omepoual tonal uan omepoual youal kioujtoya, uan at pexonik itech Taltikpak (Génesis 7:7-12).

 Taltikpakneminij tein amo yolkualmej kipolojkej imin nemilis, sayoj Noé uan ikalyetouanij makiskej. Jiova kininejmachpiak keman tetsaujkakioujtoya uan kinojtokaltij itech se Taltikpak kampa amo onkayaok tein amo kuali (Génesis 7:22, 23). Biblia kijtoua ika oksepa ejkoti tonal keman Jiova kinixpolos tein amo kinekij kichiuaskej tein kuali. Taltikpakneminij tein yolkualmej amo eskij taixpololmej. Nemiskej nochipaya itech Taltikpak tein eski se Xochital (2 Pedro 2:5, 6, 9).

Axkan tonalmej, miakej taltikpakneminij kichiuaj tachiualismej tein amo kuali. Taltikpakneminij kipiaj miak nekuejmololmej. Jiova miakpa kintitani iTaixpantijkauan maj kininejmachtikan taltikpakneminij, sayoj ika miakej amo kinekij kikakiskej itajtoluan Jiova. Amo kinekij kipataskej imin tachiualisuan niono maj kinilui Dios toni kuali uan toni amo kuali. ¿Toni kinpanos nejin taltikpakneminij? ¿Iksa mopataskej? Miakej amo keman mopataskej. Ajsitoka tonal keman taltikpakneminij tein amo yolkualmej eskij taixpololmej nochipaya (Salmo 92:7).

Taltikpak amo eski taixpolol; eski se xochital. Tein mochiuaskej itasojikniuan Dios nemiskej nochipaya itech Xochital nikan Taltikpak (Mateo 5:5).