Amo kuali tachiualismej tein mochiujtok nikan Taltikpak, kinextia ika Xochital amo uejka yetok. Ne uejkauj, Biblia kijtoj ika tikitaskiaj tonalmej semi ouijkej, tepitsin achto keman ualas Xochital. ¡Axkan tinentokej itech nejon tonalmej! Tikitatij seki tachiualismej tein Biblia kijtoj ika mochiuaskia:

Uejueyi neteuilismej. «Peuas moajokuiskej pueblojuanij uan moteuiskej se uan okse pueblojuanij, uan in takayot den se país moajokuiskej uan moteuiskej se uan okse takayot.» (Mateo 24:7.) Nejin tanauatil mochiuaka. Peuak itech xiuit 1914, uan mochiuaka ome neteuilismej semanauak taltikpak uan miak okseki neteuilismej tein amo semi uejueyi. Tel miakej taltikpakneminij mikkejya itech nejon neteuilismej.

Kokolismej motelmoyaujtok. «Uan itech miakkan pueblojmej mochiuati [...] tetsaujkakokolisti.» (Lucas 21:11.) ¿Mochiuaka nejin neskayot? Kemaj. Kemej cáncer, kokolismej itech yolomej, uakkatataxis, tonauis, sida uan okseki kokolismej kinimiktijya tel miakej taltikpakneminij.

Amo ajsi takual. Noyampa taltikpak onkak taltikpakneminij tein amo kinajsi tein kikuaskej. Nochi xiujmej tel miakej taltikpakneminij mayamikij. Nejin okse neskayot ika Xochital niman nikan yetos. Biblia kijtoua: «Uan onkas mayanti» (Marcos 13:8).

 Talolinilis. «Uan onkas [...] talolinilis [...] noyampa.» (Mateo 24:7.) Uan nejin no mochiuaka itech totonaluan. Panoua se millón taltikpakneminij tein mikkejya itech talolinilis, uan nejin peuak itech xiuit 1914.

Taltikpakneminij amo yolkualmej. Taltikpakneminij «xijxikuintinemiskej ika tomin san» uan «motasojtatinemiskej yejuan san». «Uan yejuan sayoj kitemojtinemij keniuj moyolpaktijtinemiskej pero amo kitemojtinemij keniuj para kiyolpaktijtinemiskej Dios.» Uan pipilmej «amo kintakamatiskej ok nintatuan» (2 Timoteo 3:1-5). Axkan tonalmej onkak miakej taltikpakneminij amo yolkualmej, ¿amo ijkui timoluia? Amo kipoujkaitaj Dios uan kintakuejmolchiuiliaj tein mochikauaj momachtiskej tein Dios kijtoua.

Amo kuali tachiualismej. No onkas «miak tein amo kuali tachiualismej» (Mateo 24:12). Acha no ijkui tikitstok, tachiualismej tein amo kuali motelmiakilijya itech nejin xiujmej. Noyampa, taltikpakneminij uelis kintachtekiskej, kinkajkayauaskej oso kinchiuiliskej teisa tein amo kualtsin.

Nochi nejin kinextia ika iTekiuajyo Dios amo uejka yetok. Biblia kijtoua: «Keman nankitaskej mochiujtoka nejin tachiualismej, xikmatikan ika itekiuajyo Dios amo uejka yetok» (Lucas 21:31, NM). Sayoj ika, ¿toni iTekiuajyo Dios? Itayekanalis Dios tein yetok iluikak uan kichiuati Taltikpak se xochital. Kintakuiliti nochin taltikpaktekiuajyomej (Apocalipsis 11:15).