Toknitsin:

Kemej tejuatsin tikonmati, Biblia ininka tajtoua taltikpakneminij akin yekmelauj nenkej. Ompa tikajsij miak tanojnotsmej tein techtapouia tein kipanokej takamej uan siuamej akin amo kikaujkej Dios akin kiixnamikkej ouijkayomej kemej tein tejuan tikixnamikij uan kimachilijkej tein tejuan tikmachiliaj (Santiago 5:17). Sekin amo kuali momachilijkej porin kipiakej kuejmolmej uan netekipacholmej oso porin kinyolkokoj tein kichiujkej okseki itekitikauan Dios. Miakej tajyouiayaj porin kinyolkokouaya nepololmej tein kipiakej.

¿Senkis kikaujkej Jiova nejon takamej uan siuamej? Amo. Miakej tanemiliayaj kemej akin kijkuiloj Salmo, akin kitataujtij Jiova: “Ninentinemi kemej se ichkat tein poliujtok. Xiktemo motekitikauj, porin amo nikelkauani motanauatiluan” (Salmo 119:176). ¿Kemansa ijkon tionmomachiliani?

Jiova amo keman kinelkaua itekitikauan akin amo monechikouajok. Ta yejuatsin youi kintemoti; kemansa kichiua inintechkopa tokniuan itech nechikol. Kemej neskayot, xionmonemili keniuj Jiova kipaleuij Job, akin kipiak miak ouijkayomej: kipoloj tein kipiaya, momikilijkej akin kintasojtaya uan kipiak se ueyi kokolis. Job no kiyolkokoj tajtolmej tein kiluijkej akin monekiskia maj kipaleuikan. Maski amo keman kiixtopeuak Jiova, seki tonalmej kinemilij seki taman tein amo melauak (Job 1:22; 2:10). ¿Keniuj kipaleuij Jiova maj oksepa kuali tanemili?

Se taman kemej kipaleuij yejua itechkopa okse itekitikauj, Elihú. Ijkuak Job kijtojtoya tein kitekipachouaya, Elihú yekinika kikakik uan satepan kiluij tein kinemiliaya. ¿Toni kiluiskia, kijijtoskia? ¿Kitemoskia kimelauas ika tajtolmej tein ika kichiuaskia maj kimachili ke katka itajtakol oso kipinaujtiskia? ¿Kinextiliskia ke yejua okachi kimatia? Amo. Ika inepaleuil iespíritu Dios, Elihú kiyekiluij: “Nejua nimoajsi kemej tejua timoajsi iixpan Dios akin melauak, porin nejua no nitachijchiuj ika sokit”. Satepan kiluij maj amo kimouiliani uan maj amo yolijsiuini ika tein yaya kiluiti (Job 33:6, 7). Elihú amo okachi kiyolkokoj Job, ta ika netasojtalis kiyolmajxitij uan kiyolchikauak.

Tiknekij xikonmati ke tikchijchiujkej nejin amaix porin timomachiliaj ijkon kemej Elihú. Yekinika tikinkakkej ika nejmachkayot miakej tokniuan akin amo monechikouajok uan tikitakej tein kipanotoyaj (Proverbios 18:13). Satepan, ika netataujtil tikitakej tajkuilolmej tein kinextiaj keniuj ne uejkauj Jiova kinpaleuij itekitikauan keman kipanotoyaj se taman kemej nejon. Uan ika tami, tikitakej tein yejuan kipanokej uan tein kipanouaj seki tokniuan itech nejin tonalmej. Ijkon tikchijchiujkej nejin amaix tein timitsonyoleuaj xikonixtajtolti ika nejmachkayot. Xikonmati ke semi timitsontasojtaj.

Oloch Taojtokaltianij akin kinixyekanaj iTaixpantijkauan Jiova