¿MITSONPANOUANI se taman kemej Linda? Yejua semi kiyolkokoj tein kichiuilij nejon tokniuj. Tetayokoltij tikijtoskej ke seki tokniuan moijtakouani ininkuali uikalis iuan Jiova porin semi kinyolxokoliani tein oksekin tokniuan kichiuanij. ¿Mitsonpanouani nejon?

Keman se tokniuj techyolxokolia xa techouijmakas tiktapojpoluiskej porin komo kichiua kemej Cristo, tikchiaskiaj maj technextili netasojtalis (Juan 13:34, 35). Yejua ika, keman aksa itech nechikol techyolxokolia, nejon tein amo tikchiayaj maj kichiua tokniuj semi techyolkokoua (Salmo 55:12).

Biblia kijtoua ke kemansa se akin kichiua kemej Cristo, uelis kualanis iuan okse tokniuj porin kiyolxokolij (Colosenses 3:13). Sayoj ke keman tejuan tikpanouaj nejon, uelis techouijmakas tikixnamikiskej. ¿Toni techpaleuis? Titanemiliskej itech seki tayolmajxitilismej tein kitemaka Biblia. Maj tikitakan eyi.

ToTajtsin Dios nochi kiita. Jiova kiita nochi tein panoua hasta keman toka mauiltiaj uan nejon semi techijtakoua (Hebreos 4:13). Uan amo sayoj nejon: yejuatsin kimachilia tajyouilis tein tikpanouaj (Isaías 63:9). Amo kikaua maj kuejmolmej oso tajyouilis oso okse taman uan nion maj semej itekitikauan techxelo “itech in tetasojtalistsin de Totajtsin Dios” (Romanos 8:35, 38, 39). Ijkon kemej yejuatsin, tejuan no moneki maj amo tikauakan maj nion teyi uan maj nion akin techxelo itech inetasojtalis Jiova.

Tiktapojpoluiskej aksa amo kijtosneki ke kuali tikitaj tein kichiuak. Tiktapojpoluiskej aksa akin techyolxokolij amo kijtosneki ke tikitaj ke amo ueyi nepolol oso ke kuali tikitaj tein kichiuak. Jiova amo keman kiita ke kuali yetok se tajtakol, sayoj ke kemaj kitapojpoluia aksa komo kiita ke yekmelauj moyolnonotsa (Salmo 103:12, 13; Habacuc 1:13). Jiova “amo nochipa kisentokas kielnamikisok” tajtakolmej uan kemej kineki maj tikchiuakan kemej yejuatsin, techyoleua maj no titetapojpoluikan (Salmo 103:9, Mateo 6:14).

Amo tikualantoskej iuan aksa techpaleuia. ¿Keyej? Xikonnemili ke tikonajokui se tet tein etik kemej se kilo uan tikonpia momaixko. Xa amo mitsonouijmakas ijkon tikonkitskijtos seki minutos. Sayoj ke, ¿toni panoskia komo uejkaua ijkon tikonkitskijtok? Komo ijkon tikonpia seki minutos, se hora oso okachiok, tionmasiouiskia. Tet etik kemej ipa, sayoj ke, ijkon kemej okachi uejkaua tikonkitskijtok, tikonmachilia ke okachi etik. No ijkon panoua keman tiyolkualantokej: keman okachi uejkaua tikualantokej iuan aksa, maski amo ueyi tein techchiuilij, okachi techijtakoua. Yejua ika, Jiova techiluia maj amo tikualantokan iuan aksa, porin  kimati ke nejon techualkuilia tein kuali (Proverbios 11:17).

¿Toni kipaleuij Linda maj amo kualaniok iuan tokniuj siuat akin kiyolxokolijka? Se taman, tanemilis keyej Biblia kijtoua maj titetapojpoluikan (Salmo 130:3, 4). Tein okachi kimoujkaitak yejua keman kielnamikik ke komo tikintapojpoluiaj oksekin, Jiova no techtapojpoluis (Efesios 4:32–5:2). Keman kinemilia keniuj kiyololinijkej nejon tajkuilolmej, kijtoua: “Kemej yeskia Jiova nejua nechnojnotstoskia”.

Satepan, Linda moijkuanilij yolkualanyot. Senkis kitapojpoluij tokniuj uan axkan kuali mouikaj. Linda kisentoka kitekitilia Jiova. No ijkon, Jiova kineki xikontekitili nochipaya.