Itech nochi taneltokalismej moajsij akin kinekij kiyolpaktiskej Dios. Uan moajsi se kuali tanauatil: Dios kinpoujkaita nejon taltikpakneminij uan ininka motekipachoua. Sayoj ke, tetayokoltij, miakej kichiuaj tein amo kuali uan ika mopaleuiaj inintaneltokalis (2 Corintios 4:3, 4; 11:13-15). Itech tanauatilmej tikakinij ke seki taneltokalismej tapaleuiaj keman taixnamikij tamojmoujtianij, itech temiktilis, neteuilis uan keman ininka mauiltiaj konemej. ¡Nejin semi kinyolxokolia akin yekmelauj kineltokaj Dios! Xikonixtajtolti Mateo 24:4, 5, 11, 12.

Taneltokalis tein melauak kiueyichiua Dios, sayoj ke taneltokalis tein amo melauak kiixnamiki. Amo tamachtia akoni yekmelauj Dios uan keniuj moajsij mikemej, uan miak taman tein amo moajsi itech Biblia. Sayoj ke Jiova kineki maj taltikpakneminij kimatikan akoni yekmelauj yejuatsin. Xikonixtajtolti Ezequiel 18:4 uan 1 Timoteo 2:3-5.

Dios amo kikaua maj kikajkayauakakn taltikpakneminij tein kijtouaj ke kitasojtaj, sayoj ke tein melauj kitasojtaj nochi tein onkak itech nejin taltikpak kampa Satanás taixyekantok (Santiago 4:4). Itech iTajtol Dios moixmatij nochi taneltokalismej tein amo melaujkej kemej ‘Ueyi Babilonia’, ta nejon tokayit kiixnextia xolal kampa peuak taneltokalis tein amo melauak satepan keman mochiuak Tetsaujkakiouit itech itonaluan Noé. Amo uejkaua, Dios ijsiujka kinixpolos taneltokalismej tein kinkajkayauaj uan kintajyouiltiaj taltikpakneminij. Xikonixtajtolti Apocalipsis 17:1, 2, 5, 16, 17 uan 18:8.

Moajsij okseki kuali tanauatilmej. Jiova amo kinelkaua taltikpakneminij akin kipiaj kuali ininyolo uan pouij itech taneltokalismej tein amo melaujkej semanauak taltikpak. Kinsentilijtok nejon taltikpakneminij keman kinmachtia tein melauak. Xikonixtajtolti Juan 6:45.

Jiova ininka motekipachoua akin kinekij kiixmatiskej tein melauak uan kinekij kichiuaskej tein kuali. Yejua ika kinnauatia maj kikauakan taneltokalis tein amo melauak. Komo kitasojtaj Dios, ika miak pakilis kichiuaskej nochi tein monekis uan ijkon kiyolpaktiskej. Xikonixtajtolti Apocalipsis 18:4.

Itech yekinika siglo, akin kinekiaj kiyolpaktiskej Dios kuali kikakkej tein tamachtiayaj itatitaniluan Jesús. Jiova kinmachtij keniuj kipiaskej nemilis ika yolpakilis, maj kimatikan keyej nemiaj nikan taltikpak uan maj kichiakan se taman tein kuali. Kemej yejuan, tejuan no moneki tikseliskej kuali tanauatilmej tein moajsij itech Biblia uan maj tiktayekanaltikan itech tonemilis tein kineki Jiova. Xikonixtajtolti 1 Tesalonicenses 1:8, 9 uan 2:13.

Jiova kinselia ika miak pakilis akin kikauaj taneltokalis tein amo melauak uan kiseliaj tein melauak. Komo tejuatsin tikonselia itayoleualis Jiova, kuali tionmouikas iuan, tikonselis ininnetasojtalis akin no kiueyichiuaj Jiova uan no nemilis nochipaya. Xikonixtajtolti Marcos 10:29, 30 uan 2 Corintios 6:17, 18.

Keman Jiova kiixpolos taneltokalis tein amo melauak, onkas miak yolseuilis. Amo keman oksepa takajkayauas nion kichiuas maj moxexelokan taltikpakneminij. Nochin kiueyichiuaskej Dios akin melauak. ¿Melauj ke nejon se kuali tanauatil? Xikonixtajtolti Apocalipsis 18:20, 21 uan 21:3, 4.