Dios kinyoleua nochin tataman taltikpakneminij maj iuan motokikan ika netataujtil (Salmo 65:2). Sayoj ke amo kikaki, oso kiselia, nochi netataujtilmej. Kemej neskayot, keman se takat kichiua netataujtil sayoj ke amo kipoujkaita inamik, Dios amo kikakis (1 Pedro 3:7). Uan no keman israelitas kisentokayaj kichiuayaj tein amo kuali, Dios amo kinkakiliaya ininnetataujtiluan. Uan no, komo se aksa ueyitajtakoj sayoj ke moyolnonotsa, Dios kikakilia inetataujtiluan. Ika nejin tikitaj ke tikchiuaskej netataujtil se ueyi tatiochiualis. Xikonixtajtolti Isaías 1:15 uan Hechos 3:19.

Xikonita video ¿Kikaki Dios nochi netataujtilmej?

Ika netataujtil no tikueyichiuaj Dios, yejua ika moneki sayoj tikchiuiliskej netataujtil Jiova (Mateo 4:10; 6:9). Uan no, kemej titajtakouanij, moneki tikchiuaskej netataujtil itokaykopa Jesús, ta yejua toka momikilij (Juan 16:23, 24). Jiova amo kineki maj sayoj se taman tikiluikan itech se netataujtil, yeski tikelnamiktoskej oso tikixtajtoltiskej, ta maj tikijtokan tein tikmachiliaj uan tein tiknemiliaj. Xikonixtajtolti Mateo 6:7 uan Filipenses 4:6, 7.

ToTajtsin ueli kikaki tonetataujtiluan tein tikijtouaj sayoj itech totanemilil, maski amo tikijtouaj chikauak (1 Samuel 1:12, 13). Yejuatsin techyoleua maj tikchiuakan netataujtil keman yeski, keman yekin tanesi uan keman tami tonal, keman titakuaj uan keman tikpiaj kuejmolmej. Xikonixtajtolti Mateo 15:36 uan 1 Pedro 5:7.

Techyoualouaj taltikpakneminij akin amo takuaujtamatij iuan Dios uan mokejkelouaj keman kikakij ke onkas yolseuilis nikan taltikpak. Nejin kichiua maj ouij timotokikan iuan Dios (2 Timoteo 3:1, 4; 2 Pedro 3:3, 13). Yejua ika, techpaleuia maj techyolchikauakan  oksekin akin kichiuaj kemej Cristo, uan yejuan no kinpaleuia maj tikinyolchikauakan. Xikonixtajtolti Hebreos 10:24, 25.

Ijkuak timonechikouaj iniuan akin kitasojtaj Dios techpaleuia maj iuan timotokikan yejuatsin. Itech nechikolmej tein kipiaj itaixpantijkauan Jiova ueli techyolchikaua ininneskayo oksekin akin kinextiaj takuaujtamatilis. Xikonixtajtolti Romanos 1:11, 12.

Uelis tionmotokis iuan Dios ijkuak tikonnemilis ika nejmachkayot itech nochi tein tionmomachtia itech iTajtol. Xionmonemili itech nochi tein kichiujtok, itech tein techyolmajxitia uan itech tein motenkaujtok. Komo tiontanemilia ika nejmachkayot uan tikonchiua netataujtil, okachi tikonajsikamatis iueyi netasojtalis Dios uan itamatilis. Xikonixtajtolti 1 Timoteo 4:15, 16.

Uelis tionmotokis iuan Dios sayoj komo iuan tiontakuaujtamati. Sayoj ke takuaujtamatilis uelis se kineskayotis kemej se xochit tein moneki se kiatekis mojmostaj, uan ijkon mochiua keman titanemiliaj itech keyej tikneltokaj tein timomachtiaj. Xikonixtajtolti Mateo 4:4 uan Hebreos 11:1, 6.

Jiova ininka motekipachoua akin kitasojtaj. Yejuatsin ueli kinmatampauia maj amo kipolokan inintakuaujtamatilis nion ininnemilis nochipaya tein kichiaj (Salmo 91:1, 2, 7-10). Technejmachtia maj amo tikchiuakan tein uelis techkokolispeualtis uan techkuilis toyolpakilis. No techmachtia keniuj okachi kuali tinemiskej. Xikonixtajtolti Salmo 73:27, 28 uan Santiago 4:4, 8.