Tokniuantsitsin akin nankiteixmatiltiaj iTaixyekanalis Dios:

Maj tiknemilikan ke tejuan tiitatitaniluan Jesús uan timoajsij itech Olivojtepet. Jesús yekin monextij toixpan uan techiluijteua: “Keman Dios namechmakas ichikaualis, nanyeskij nanchikaujkej. Uan nanechteixmatiltiskej ompa Jerusalén, itech nochi Judea uan Samaria, uan itech nochi taltikpak” (Hech. 1:8). ¿Keniuj timomachiliskiaj?

Xa tikmachiliskiaj ke techiluijtok maj tikchiuakan se tekit tein amo uelis tikchiuaskej uan timotajtaniskiaj: “Amo timiakej, ¿keniuj titanojnotsatij ‘itech nochi taltikpak’?”. Xa tikelnamikiskiaj tein Jesús kijtoj youal achto ke momikiliskia: “Takeual amo okachi ueyichiujkej ke iteko. Komo yejuan nechtajyouiltianij, no namechtajyouiltiskej namejuan; komo yejuan kichiuaj tein nikijtoua, no kichiuaskej tein nankijtoskej. Kemej nantakuaujtamatij itech notokay, yejuan namechchiuiliskej nochi nejon, porin amo kiixmatij akin nechualtitanik” (Juan 15:20, 21). Yejua ika xa timotajtaniskiaj: “¿Keniuj uelis tikteixmatiltiskej iTaixyekanalis Dios komo miakej techixnamikiskej?”.

Axkan tiitaixpantijkauan Jehová no ijkon timoajsij. Moneki tikinixmatiltiskej iTaixyekanalis Dios “akin nemij itech nochi taltikpak” (Mat. 28:19, 20). Sayoj ke axkan no miakej techixnamikij, yejua ika ¿keniuj uelis tikteixmatiltiskej itajtol Dios?

Amatajkuilol Hechos techiluia keniuj Jehová kinpaleuij tatitanilmej uan imomachtijkauan Jesús para maj uelinij tanojnotsanij. Nejin amaix techpaleuis maj timomachtikan tein kipanokej nejon tokniuan uan keniuj momachilijkej keman noyampa peuak tanojnotsaj. Tikitaskej ke kemej kichiujkej tekit tokniuan akin nenkej ne uejkauj, no ijkon tikchiuaj tejuan. Uan tikitaskej ke amo sayoj titanojnotsaj kemej yejuan tanojnotsayaj, ta no moixyekana nejin tekit kemej yejuan kiixyekankej. Keman timomachtijtiaskej keniuj tanojnotsayaj ne uejkauj uan keniuj mochiua axkan, techpaleuis maj senkis titakuaujtamatikan ke Jehová kisentoka kiixyekana inechikol nikan taltikpak.

Keman timomachtiskej amatajkuilol Hechos, tiktataujtiaj Jehová maj namechpaleui senkis xitakuaujtamatikan ke Jehová ika ichikaualis namechpaleuis xitaxikokan. Uan tikmatij ke nejin nemachtil namechpaleuis xiksentokakan ‘xikteixmatiltikan iTaixyekanalis Dios’ uan nankinpaleuiskej oksekin maj no uelikan momakixtikan (Hech. 28:23; 1 Tim. 4:16).