1. Xikonijto keniuj nochin momachiliaj itech iluit Pentecostés.

 NOCHIN semi yolpaktokej ompa Jerusalén. a Itech altar tein yetok templo pankistok pokti uan levitas cantarouaj Hallel (Salmos 113 hasta 118). Xa sekin cantarouaj uan oksekin kinnankiliaj. Uan itech nochi Jerusalén moajsij miakej akin ualeujkej de okseki altepemej kemej Elam, Mesopotamia, Capadocia, Ponto, Egipto uan Roma. b ¿Keyej nochin ompa moajsij? Yajkej iluit tein itokay Pentecostés, oso “tonal keman motemaka yekinika takilot” (Núm. 28:26). Nejin iluit tein mochiua xijxiujtika yejua keman kitamiajokuij cebada uan peua kisentiliaj trigo. Nejon tonal nochin yolpaktokej.

2. Itech nejon iluit Pentecostés itech xiuit 33, ¿toni mochiuak tein semi kimojkaitakej?

² Nejon tonal itech xiuit 33, kemej chiknaui hora kualkan, mochiuak se taman tein amo keman kielkauaskiaj. “Sepasan mokakik ke chikauak takakistik ne iluikak, kemej keman chikauak taijkoyoka, uan takomonik kalijtik” (Hech. 2:2). Kemaj, chikauak takomonik kalijtik kampa mosentilijtoyaj 120 imomachtijkauan Jesús. Uan mochiuak se taman tein semi kimojkaitakej. Neskej kemej yeskia seki titsitsin tein moxejxelojtiajkej, uan sejse tit motalij inintech sejse. c Ompa yejuan kiselijkej ichikaualis Dios uan peujkej tajtouaj itech tataman tajtolmej. Keman imomachtijkauan Jesús kalankiskej, takalpanouanij semi kimojkakakiaj maj uelinij kinnojnotsanij “itech inintajtol” (Hech. 2:1-6).

3. 1) ¿Keyej tein mochiuak itech Pentecostés xiuit 33 semi monekia para akin kiueyichiuaj Jehová? 2) ¿Keniuj kikuik Pedro yekinika llave itech Pentecostés?

³ Nejin taman tein mochiuak tein semi kinyolpaktij, semi monekia para  akin kiueyichiuaj Jehová porin nejon tonal peuak kinixpejpenaj “akin pouij itech Israel tein iaxka Dios” oso tokniuan taixpejpenalmej (Gál. 6:16). Uan no mochiuak okse taman. Nejon tonal keman Pedro kinnojnotsak miakej akin ompa moajsiaj, kikuitoya yekinika llave “tein ika tatapoui itech iTaixyekanalis Dios”. Ijkon tataman grupos ueliskia kipiaskej tatiochiualismej tein Dios kinmakaskia (Mat. 16:18, 19). Ika nejon yekinika llave kemej yeskia kintatapouilijkej judíos uan akin kiselijkej inintamachtilis judíos d para maj uelinij kiueyichiuanij Jehová uan maj Dios kinixpejpenani ika ichikaualis. Ijkon pouiskiaj iuan Israel tein iaxka Dios, uan ueliskia kichiaskej yaskej iluikak kampa yeskij tekiuanij uan tiopixkamej itech iTaixyekanalis Dios (Apoc. 5:9, 10). Ompa nejon tatiochiualis no kiseliskiaj samaritanos uan satepan kiseliskiaj akin amo katkaj judíos. ¿Toni techmachtia tein mochiuak itech nejon iluit Pentecostés?

4. ¿Keyej tikijtouaj ke itech xiuit 33 peuak moajsij tokniuan uan ijkon kisentoka hasta axkan?

⁴ Kemej tikitakej, peuak moajsij tokniuan keman kiselijkej ichikaualis Dios kemej 120 imomachtijkauan Jesús akin “senyetoyaj kalijtik” (Hech. 2:1). Sayoj ke nejon tonal keman tiotakik miles moauijkajya. Ijkon peuak momiakiliaj tokniuan tein kisentoka miakiaj hasta axkan. Itech nejin tonalmej, tokniuan takamej uan siuamej akin kitasojtaj Dios moajsij noyampa taltikpak. Yejuan kiteixmatiltiaj “itech nochi taltikpak [...] kuali tanauatilmej tein ika tajtoua iTaixyekanalis Dios” achto ke tatamis (Mat. 24:14).

5. ¿Keniuj kinpaleuiaya tokniuan itech yekinika siglo keman mosentiliayaj uan keniuj no ijkon techpaleua axkan?

 ⁵ Semi kinpaleuiskia uan kinyolchikauaskia tokniuan taixpejpenalmej uan satepan “okseki ichkamej” keman mosentiliskiaj (Juan 10:16). Pablo kinextij keniuj semi kitasojkamatia maj tokniuan mopaleuianij se iuan okse. Yejua ika kinijkuilouilij tokniuan akin nemiaj Roma: “Semi nikneki namechitas uan namechpaleuis okachi kuali ximouikakan iuan Dios para namechyolchikauas, oso para maj timosenyolchikauakan se iuan okse porin titakuaujtamatij” (Rom. 1:11, 12).

6, 7. ¿Keniuj axkan tokniuan tanojnotskej itech nochi taltikpak?

⁶ Axkan tokniuan no kipiaj tekit kemej tein kipiayaj tokniuan itech yekinika siglo. Jesús kinnauatij imomachtijkauan maj kichiuanij nejin tekit tein ouij sayoj ke semi kinyolpaktiskia: “Xikinmachtikan akin nemij itech nochi taltikpak para maj nechtojtokakan. Xikinauikan itokaykopa toTajtsin, iKoneuj uan ichikaualis Dios. Xikinmachtikan maj kitakamatikan nochi tein namechnauatij” (Mat. 28:19, 20).

⁷ Tokniuan akin moteixmatiltiaj kemej itaixpantijkauan Jehová kichiujtokej nejin tekit kemej Dios kineki. Maski ouij kiteixmatiltiskej itajtol Dios itech miak tataman tajtolmej, kemaj uelinij kichiuanij. Kiteixmatiltiaj amaixmej itech panoua 1,000 tataman tajtolmej. ¿No tionmosentilia iniuan tokniuan uan tiontanojnotsa uan tiontamachtia? Semi kuali komo ijkon tikonchiujtok. Tejuatsin semej akin kipiaj tatiochiualis kiteixmatiltiskej itokay Jehová.

8. ¿Keniuj techpaleuia keman timosentiliaj iniuan tokniuan?

⁸ Jehová no techpaleuia inintechkopa tokniuan para maj tiksentokakan tiyolpakikan uan maj amo timosenkauakan itech nejin tonalmej tein semi ouijkej. Pablo kinijkuilouilij tokniuan hebreos: “Maj inintech titanemilikan oksekin uan ijkon okachi timotasojtaskej se iuan okse uan tikchiuaskej tein kuali, uan maj amo tiksenkauakan tonechikoluan, kemej sekin momattokej.  Okachi kuali, maj timoyolchikauakan se iuan okse, okachiok porin tikitaj ke motokia nejon tonal” (Heb. 10:24, 25). Kemej tikitaj, se tatiochiualis maj moajsikan tokniuan akin uelis techyolchikauaskej uan tikinyolchikauaskej. Yejua ika, maj nochipa tiakan nechikolmej uan maj tietokan iniuan tokniuan.

9, 10. ¿Toni kichiuanij sekin para kinixmatiltiskej itajtol Dios akin tajtouaj okseki tajtolmej?

⁹ Maj tiknemilikan keniuj judíos uan akin kiselijkaj inintamachtilis judíos semi yolpakiaj. Xa miakej monojnotsayaj itech se tajtol tein miakej kikuiaj, xa griego oso hebreo. Sayoj ke axkan “sejse kikakia ke [imomachtijkauan Jesús] tajtouayaj itech inintajtol” (Hech. 2:6). Tikyekmatij ke semi kinyolpaktij kikakiskej kuali tanauatilmej itech inintajtol. Maski axkan Dios amo kichiuaok maj itekitikauan sepasan tajtokan tataman tajtolmej, miakej tokniuan mochikauaj kinixmatiltiskej iTaixyekanalis Dios akin kayomej itech okseki altepemej. ¿Keniuj kichiuaj? Sekin momachtiaj okse tajtol para tapaleuiskej itech se nechikol kampa tanojnotsaj itech okse tajtol oso youij tapaleuitij itech okse altepet. Uan kiitanij ke nejon tein kichiuaj tokniuan, kimojkaitaj miakej akin kinnojnotsaj.

¹⁰ Yejua nejon tein kipanok Christine, akin momachtij tajtol gujaratí iniuan okseki chikome tokniuan. Keman moajsik iuan se ichpoch akin iuan tekiti, kitajpaloj itech itajtol. Nejin ichpoch semi kimojkaitak uan kitajtanij keyej momachtijtoya nejon tajtol tein semi ouij se uelis. Christine uelik kimelauilij keyej tikchiuaj. Ompa ichpoch kiluij: “Xa semi moneki tein nantechiluisnekij”.

11. ¿Toni uelis tikchiuaskej para uelis tikinnojnotsaskej oksekin itech inintajtol?

¹¹ Maski amo tinochin uelis timomachtiskej okse tajtol, kemaj uelis tikchiuaskej  seki taman para tikinixmatiltiskej iTaixyekanalis Dios akin tajtouaj okseki tajtolmej. ¿Kemej toni uelis tikchiuaskej? Uelis tikuiskej aplicación JW Language^® para timomachtiskej keniuj titetajpaloskej itech okse tajtol tein mokui kampa tinemij. Oso uelis timomachtiskej tikijtoskej seki taman tein kichiuas maj kineki kimatis tein kijtoua Biblia akin tiknojnotsaj. No uelis tikiniluiskej maj kalakikan itech sitio jw.org, oso tejuan maj tikinnextilikan videos uan amaixmej itech inintajtol. Maj tikuikan nejin taman itech tanojnotsalis. Ijkon semi tiyolpakiskej kemej nejon tokniuan itech yekinika siglo.

12. 1) ¿Keniuj tein kitematiltijka tanauatijkej Joel mochiuak itech Pentecostés? 2) ¿Keyej imomachtijkauan Jesús kichiayaj maj mochiua itech yekinika siglo nejon tein kitematiltijka Joel?

¹² Maj tiksentokakan tikitakan tein panok. “Pedro moketsak” uan kinnojnotsak miakej akin ompa yetoyaj akin seseko kayomej (Hech. 2:14). Kinmelauilij ke imomachtijkauan Jesús ueliaj tajtouayaj itech tataman tajtolmej porin Dios kichiujtoya ijkon kemej kitematiltijka tanauatijkej Joel: “Nikinmakas nochikaualis akin pouij itech tataman xolalmej” (Joel 2:28). Tein melauj, yejuan kichiayaj maj mochiuani nejon porin Jesús kiniluijteujka imomachtijkauan: “Nejua niktataujtis noTajtsin uan yejua namechmakas okse tapaleuijkej” uan nejin yejua “ichikaualis Dios” (Juan 14:16, 17).

13, 14. ¿Keniuj kinnojnotsak Pedro akin kikaktoyaj para kinpaleuis maj moyolpatakan, uan keniuj no ijkon uelis tikchiuaskej?

¹³ Pedro matamik ika nejin tajtolmej tein kintanemililtij: “Maj nochin itech xolal Israel kiyekmatikan ke Dios kiixtalij kemej toTekotsin uan Cristo nejin Jesús akin namejuan nankikoujpampilojkej” (Hech. 2:36). Maski miakej amo ompa moajsiaj keman kimiktijkej Jesús, kemej yeskia no tapaleuijkej porin pouiaj itech xolal akin kimiktijkej Jesús. Sayoj ke kemej Pedro kinnojnotsak iikniuan judíos, kinextij ke kintakachiuaya uan kinekia kinyololinis maj kichiuanij tein  monekia. Amo kinekia kintajtakoltis, kinekia kinpaleuis maj moyolpatakan. Uan yejuan amo kualankej, ta “semi moyolkokojkej” uan yejua ika tajtankej: “¿Toni moneki tikchiuaskej?”. Uelis tikijtoskej ke kemej Pedro kinnojnotsak akin ompa moajsiaj, tapaleuij maj miakej moyolpatanij (Hech. 2:37).

¹⁴ No ijkon moneki titanojnotsaskej kemej Pedro para uelis tikinpaleuiskej maj moyolpatakan. Keman techiluiaj seki taman tein kineltokaj tein amo tamachtia Biblia, amo nochi tikiniluiaj ke amo kuali yetok. Okachi kuali tiktemouaj ika titajtoskej tein kineltokaj tein tikmatij ke kuali yetok, ijkon uelis tikinpaleuiskej maj kiajsikamatikan tein kijtoua Biblia. Moitani ke keman tiknextiaj ke tikintakachiuaj akin tikinnojnotsaj ijkon kemej Pedro, akin kipiaj kuali ininyolo kinekij momachtiskej tein kijtoua Biblia.

15. 1) ¿Toni kiniluij Pedro judíos uan akin kiselijkaj inintamachtilis judíos, uan toni kichiujkej? 2) ¿Keniuj tikmatij ke nejon miles akin moauijkej ipa kichiujtoyajya tein monekia para ueliskia moauiskej?

¹⁵ Nejon tonal, Pedro kiniluij judíos uan akin kiselijkaj inintamachtilis judíos: “Ximoyolpatakan, uan nansejsemej ximoauikan” (Hech. 2:38). Yejua ika moauijkej kemej tres mil itech seki uejueyi tanques tein moajsiaj ompa Jerusalén oso ompaka. e ¿Kinemilijtiuetskej moauiskej? ¿Kijtosneki nejin tajkuilol ke moneki nimanya moauiskej akin tikinmachtijtokej ika Biblia uan ininkoneuan tokniuan maski kinpolouaok kichiuaskej seki taman? Amo. Maj tikelnamikikan ke judíos uan akin kiselijkaj inintamachtilis judíos akin moauijkej nejon tonal, ipa achto momachtiayaj itajtol Dios uan pouiaj itech xolal kampa nochin motemaktijkaj iuan Jehová. No kinextiayaj ke kitakamatiaj Dios porin yajkej itech nejon  iluit Pentecostés maski semi uejka katka. Sayoj kinpolouaya kineltokaskej ke melauak tein kijtoua Biblia, ke sayoj itechkopa Jesucristo ueli mochiua tein Dios kiixtalij. Keman kineltokakej nejon, ueliskia kisentokaskej kitekitiliskej Dios, sayoj ke axkan kemej imomachtijkauan Cristo akin moauijkejya.

16. ¿Keniuj kinextijkej tokniuan itech yekinika siglo ke kiuelitayaj kitemakaskej tein kipiayaj?

¹⁶ Moyekita ke Jehová kintatiochiuijtoya nejon tokniuan. Ijkon kinextia Biblia: “Nochin akin peuayaj taneltokayaj senyetoyaj uan momamakayaj nochi tein kipiayaj, uan kinamakayaj inintal uan tein kipiayaj, uan tomin tein kisentiliayaj kinmakayaj sejse ijkon kemej kinpolouaya” (Hech. 2:44, 45). f Tejuan no ijkon moneki tiknextiskej ke tikintasojtaj tokniuan uan tikinpaleuiskej ika tein tikpiaj.

17. ¿Toni seki taman moneki kichiuas akin kineki moauis?

¹⁷ Biblia kinextia ke moajsi seki taman tein aksa moneki kichiuas achto ke uelis motemaktis iuan Jehová uan moauis. Yekinika, moneki momachtis tein kijtoua itajtol Dios (Juan 17:3). No moneki kinextis ke takuaujtamati uan moyolpatas, uan kinextis ke yekmelauj kiyolkokoua tein achto kichiuaya (Hech. 3:19). Uan ompa, moneki mokepas, uan peuas kichiuas tein Jehová kichia maj kichiuakan itekitikauan (Rom. 12:2; Efes. 4:23, 24). Keman kichiujtosya nejin, monekis kichiuas se netataujtil, motemaktis iuan Jehová uan moauis (Mat. 16:24; 1 Ped. 3:21).

18. ¿Toni tatiochiualis kipiaj akin moauiaj?

¹⁸ Uan tejuatsin, ¿tionmotemaktijya iuan Jehová uan tionmoauijya? Komo kemaj, toDios mitsonpaleuis ijkon kemej kinpaleuij imomachtijkauan Jesús itech yekinika siglo. Mitsonmakas ichikaualis para uelis ajsitok tikonteixmatiltis iTaixyekanalis uan tikonchiuas itanejnekilis. ¡Nejon se ueyi tatiochiualis!