Keman Jiova kichiuak maj onka nemilis kemej kalyetouanij, kinkauilij tetatmej maj kinyekpiakan ininkoneuan (Colosenses 3:20). Kemej tepopaj oso temomaj, tejuatsin moneki tikonmachtis mokoneuan maj kitasojtakan Jiova uan maj kuali moojtokaltikan keman moskaltiskej (2 Timoteo 1:5; 3:15). Uan no, moneki tikonitas toni kipiaj itech ininyolo. Tein melauj, yejuan okachi kiitaj tein tejuatsin tikonchiua. Komo tikontasojta iTajtol Dios ika nochi moyolo mitsonpaleuis okachi kuali tikonmachtis mokoneuan (Salmo 40:8).

TEIN BIBLIA KIJTOUA: “Ximoijsiuilikan para xikakikan [...,] xiyolikachiakan para xitajtokan uan no xiyolikachiakan para xikualanikan” (Santiago 1:19). Kemej tikmatij, tejuatsin tikonneki maj mokoneuan kuali momachilikan ijkuak mouan tajtoskej. Sayoj ke, moneki tikonnextis ke ika miak pakilis tiontajtos iniuan nochipa keman yejuan kinekiskej. Xikontemo maj kuali momachilikan, ijkon uelis kijtoskej tein kinemiliaj (Santiago 3:18). Komo yejuan kiitaj ke amo tikonajsikamatis oso amo tikonuelitas tein kijtoskej, xa amo mitsontapouiskej tein kimachiliaj. Amo xionyolijsiui uan miakpa xikonilui mokoneuan ke tikontasojta (Mateo 3:17; 1 Corintios 8:1, TNM).

TEIN UELIS TIKONCHIUAS:

• Keman mokoneuan kinekiskej tajtoskej mouan, xikonkaua tein tikonchiujtos uan xikonkaki

• Nochipa xiontajto iniuan mokoneuan, amo sayoj keman onkas kuejmolmej

TEIN BIBLIA KIJTOUA: “Akin kinextijtok taajsikamatilis itech se taman kiajsis tein kuali” (Proverbios 16:20). Kemansa monekis tikonitas amo sayoj toni mitsoniluiaj ta no keniuj tajtouaj, nejon mitsonpaleuis xikonmati tein yekmelauj kimachiliaj. Telpochmej uan ichpochmej miakpa kijtouaj tein amo taixejekol oso tein amo yekmelauj kinemiliaj. “Keman aksa tanankilia achto ke kitamikakis teisa, kinextia ke amo tamati.” (Proverbios 18:13.) Yejua ika amo niman xionkualani (Proverbios 19:11).

TEIN UELIS TIKONCHIUAS:

• Xionmochikaua amo tikontajtolkotonas mokoneuj nion tionkualanis keman mitsontapouis teisa, yeski tein yeski

• Xikonelnamiki keniuj tionmomachiliaya uan toni tikonitaya ke motelnekia keman tikonpiaya xiujmej tein yejua kipia

TEIN BIBLIA KIJTOUA: “Xikaki, nokonetsin, keman mitsmelaua mopopaj, uan amo xikaua itanauatil momomaj” (Proverbios 1:8). Jiova kimaka tanauatil tepopaj uan temomaj tein ika kinyekanaskej ininkoneuan. Tetatmej moneki kinmachtiskej maj tapoujkaitakan uan maj tatakamatikan (Efesios 6:1-3). Konemej kiitaj keman tetatmej amo kipiaj sayoj se tanemilil (1 Corintios 1:10). Yejua ika, komo tikonita ke tein kiixejekoua monamik amo kuali yetok, amo ximotajtolteuikan ininixpan nanmokoneuan, porin nejon uelis kichiuas maj amo namechpoujkaitakan.

TEIN UELIS TIKONCHIUAS:

• Xikixtalikan keniuj nankinmelauaskej nanmokoneuan

• Komo monamik taman kinemilia kemej moneki nankinmachtiskej konemej, xikontemo tikonajsikamatis itanemilil

TEIN BIBLIA KIJTOUA: “Xikmachti konetsin itech ojti kampa moneki yas” (Proverbios 22:6). Komo tikonneki maj kuali monejnemiltikan mokoneuan, amo xikonkaua ininselti. Moneki tikonixtalis keniuj tikonojtokaltis uan keniuj tikonmelauas (Salmo 127:4; Proverbios 29:17). Se kinmelauas amo kijtosneki sayoj se kintatsakuiltis, ta se kinpaleuis maj kiajsikamatikan keyej moixtalia seki tanauatilmej (Proverbios 28:7). No xikonmachti mokoneuan maj kitasojtakan iTajtol Dios uan maj kiajsikamatikan keniuj kikuiskej tein tamachtia (Salmo 1:2). Nejon kinpaleuis maj kipiakan se kuali tanemilil (Hebreos 5:14).

TEIN UELIS TIKONCHIUAS:

• Xionmochikaua tikonpaleuis mokoneuan maj kiitakan Dios kemej akin yekmelauj nemi uan akin iuan uelis takuaujtamatiskej

• Xikonpaleui mokoneuan maj kimatikan toni uelis kijtakos ininchipaujkanemilis uan maj kiixtopeuakan, kemej seki taman tein ixnesi itech Internet oso itech redes sociales. Xikonmachti maj kiixtopeuakan akin kitemouaj auilnemiskej iniuan konemej