1, 2. ¿Toni xa timotajtaniaj?

KONEMEJ kinekij kimatiskej miak taman. Miakpa, keman tikinnankiliaj, techtajtaniaj: “¿Keyej?”. Uan maski timochikauaj tikinnankiliskej, yejuan kisentokaj tajtanij: “¿Uan keyej?”.

² Tinochin tikchiuaj netajtanilmej, yeski titelpochmej oso tiuejueykejya. Xa titajtanij keniuj tiajsiskej se xolal oso toni horajya. Oso xa timotajtaniaj keyej semi titajyouiaj uan keniuj yeski tonemilis satepan.

3. ¿Keyej miakej amo kitemouaj tanankililmej?

³ Miakej motajtaniaj miak taman tein semi moneki. Sayoj ke amo kitemouaj tanankililmej. ¿Keyej? Sekin kimatij ke itech Biblia kemaj monankiliaj ininnetajtaniluan, sayoj ke kinemiliaj ke semi ouij se kiajsikamati tein kijtoua. Xa kinemiliaj ke sayoj tiopixkamej oso taixyekananij itech taneltokalismej kimatij tanankililmej. Uan oksekin nion kitemouaj, porin pinauaj kijtoskej ke amo kimatij tanankilil.

4, 5. 1) ¿Toni netajtanilmej tionmochiuiliani tejuatsin? 2) ¿Keyej moneki tikonsentokas tikontemos tanankililmej?

⁴ Xa tejuatsin tionmotajtaniani: “¿Keyej semi mochiua tein amo kuali? ¿Keyej nesij okachi kokolismej? ¿Titajyouiaj porin Dios techtatsakuiltia?”. Jesucristo, akin katka okachi kuali tamachtijkej, kijtoj: “Xitajtanilikan Dios uan namechmaktis ne ten moneki. Ijkon keme tensa se kiyektemoa de se kipoloa, no ijkon xiktatatautilikan Dios uan Yejuatsin namechseliltis. Uan no ijkon kuak se takakalatsa ma tatapoukan, no ijkon xiksentokakan xikilikan Dios ten moneki uan Dios namechmakas” (Mateo 7:7). Yejua ika, amo xionmosenkaua. Xikonsentoka xikontemo hasta tikonajsis se kuali tanankilil.

 ⁵ Komo tikonsentoka tikontemoua tanankililmej, tikonajsis itech Biblia (Proverbios 2:1-5). Tikonitas ke amo ouij se kiajsikamati nejon tanankililmej. Uan no, tein tionmomachtis mitsonpaleuis okachi xionyolpaki axkan uan xikonchia kualtsin tionnemis satepan. Maj tikitakan se taman tein kintanemililtia miakej.

6. ¿Keyej miakej kinemiliaj ke Dios amo kiita tein techpanoua?

⁶ Miakej kinemiliaj ke Dios amo kiita tein techpanoua. Kinemiliaj ke komo kiitaskia, amo ijkon tinemiskiaj. Miakkan onkak neteuilismej, netauelitalis uan tatasojtilis. Tinochin tikokolispeuaj, titajyouiaj uan timomikiliaj. Yejua ika, sekin motajtaniaj: “Komo Dios yekmelauj kiita tein techpanoua, ¿keyej amo kiixpoloua tajyouilis?”.

7. 1) ¿Keyej miakej kinemiliaj ke Dios amo yolkuali? 2) ¿Keyej tikyekmatij ke Dios amo keman kichiua maj mochiua tein amo kuali?

⁷ Taixyekananij itech taneltokalismej kemansa kichiuaj maj miakej kinemilikan ke Dios semi amo yolkuali. Keman mochiua teisa tein semi tetajyouiltia, kemej ijkuak momikilia se taltikpaknenkej, kijtouaj ke yejua nejon tein Dios kinekia. Ijkon, kitajtakoltiaj yejuatsin. Sayoj ke Dios amo keman kichiua maj pano tein amo kuali. Yejuatsin amo kitemoua kiitas toni kichiuas se taltikpaknenkej keman kipanos tein amo kuali. Biblia kijtoua: “Kuak aksame taneltokani kimachiliaj ke kinyoltilana in tajtakol, ma amo kijtokan ke Totajtsin Dios kinyoltilana ma motajtakolmakakan” (Santiago 1:13). Maski Dios amo kitsakuilia tein amo kuali, amo keman kichiua maj pano (xikonixtajtolti Job 34:10-12). Maj tikitakan se neskayot tein techpaleuis maj tikajsikamatikan nejin.

8, 9. ¿Keyej amo kinamiki maj tiktajtakoltikan Dios keman tikpiaj kuejmolmej? Xikonijto se neskayot.

 ⁸ Xiontanemili itech se telpoch akin nemi iniuan itatuan. Itat oso ipopaj semi kitasojta uan kinextilia maj kichiua tein kipaleuis maj kuali nemi. Sayoj ke, telpoch peua amo kitakamatiok uan nemiti okseko. Peua kichiua tein amo kuali uan mokuejmolkalakia. ¿Tikonijtoskia ke itajtakol itat oso ipopaj porin kikauak maj youi? Amo (Lucas 15:11-13). No ijkon, miakej kemansa kiixnamikij Dios uan kichiuaj tein amo kuali. Uan ijkon kemej nejon tetat, Dios kinkaua maj taixnamikikan. Yejua ika, keman mochiua teisa tein amo kuali, moneki tikelnamikiskej ke Dios amo kichiuak maj pano. Amo kinamiki maj tiktajtakoltikan yejuatsin keman tikpiaj kuejmolmej.

⁹ Onkak keyej Dios kikaua maj kisentoka mochiua tein amo kuali. Itech tamachtilis 11 tikonitas tein Biblia kijtoua. Sayoj ke uelis tikonyekmatis ke Dios techtasojta uan ke amo kichiua maj tikpiakan kuejmolmej. Tein melauj, sayoj yejuatsin uelis kinixpolos (Isaías 33:2).

10. ¿Keyej ueli tikyekmatij ke Dios kiyektalis nochi tein kichiuaj akin amo yolkualmej?

¹⁰ Dios yektik (Isaías 6:3). Nochi tein yejuatsin kichiua chipauak uan kuali. Yejua ika uelis iuan titakuaujtamatiskej. Sayoj ke amo ijkon panoua touan. Kemansa, tikchiuaj tein amo kuali. Hasta maski se tekiuaj yekmelauj kinekiskia tapaleuis, amo ueli kiyektalia nochi tein kichiuaj akin amo yolkualmej. Sayoj Dios ueli kiyektalia nejon. Yejua ika, uelis tikyekmatiskej ke yejuatsin ueli uan kineki kiyektalis nochi tein kichiuaj akin amo yolkualmej. Dios senkis kiixpolos tein amo kuali tein mochiua (xikonixtajtolti Salmo 37:9-11).

11. ¿Keniuj momachilia Dios keman kiita ke titajyouiaj?

¹¹ ¿Keniuj momachilia Dios keman kiita nochi tein mochiua itech taltikpak uan kuejmolmej tein tikpiaj? Biblia tamachtia ke Dios tayokoya keman taltikpakneminij kichiuaj tein amo kuali, uan kiniknelia akin tajyouiaj (Salmo 37:28). Uan no kijtoua ke Dios “semi motayokoltij” keman ne uejkauj kichiuayaj tein amo kuali (Génesis 6:5, 6). Uan Dios ijkon kisentoka momachilia keman kiita tein panoua (Malaquías 3:6). Biblia kijtoua ke Dios yekmelauj toka motekipachoua (xikonixtajtolti 1 Pedro 5:7).

12, 13. 1) ¿Keyej titetasojtaj? 2) ¿Keniuj timomachiliaj keman tikitaj ke taltikpakneminij semi tajyouiaj? 3) ¿Keyej ueli tikneltokaj ke Dios kiixpolos nochi tein amo kuali?

¹² Biblia no kijtoua ke Dios techchijchiuak kemej yejuatsin (Génesis 1:26). Nejin kijtosneki ke techchijchiuak kemej uelis tiknextiskej netasojtalis uan okseki tamanok. Kemej neskayot, Biblia techmachtia ke Dios “tetasojtatinemi” (1 Juan 4:8). Nochipa kichiua teisa porin tetasojta. Nejin kinextia ke titetasojtaj porin yejuatsin tetasojta. Yejua ika, komo techtayokoltia tikitaskej keman tajyouiaj akin yolkualmej, Dios okachiok motayokoltia.

¹³ Axkan xikonnemili nejin: komo tionueliskia tikonixpolos tajyouilis uan tein amo kuali tein techiuiliaj taltikpakneminij, ¿tikonixpoloskia? Tikyekmatij ke kemaj, porin tikontasojta oksekin. Dios ueli kiixpoloua, uan kemej techtasojta, kiixpolos tajyouilis uan tein amo kuali tein techiuiliaj taltikpakneminij. Uelis senkis tikonneltokas ke yekmelauj mochiuas nochi tein moijtoua itech ipeujyan nejin amatajkuilol. Sayoj ke, moneki okachi kuali tikixmatiskej Dios uan ijkon tikneltokaskej ke yekmelauj kichiuas tein kijtoua.

14. ¿Keniuj monotsa Dios, uan keniuj tikmatij ke kineki maj tikuikan itokay?

¹⁴ Komo tikonneki tikonixmatis se takat oso se siuat uan satepan kuali iuan tionmouikas, ¿toni tikoniluia achto? Xa tikoniluia motokay. ¿Uan Dios? ¿Kipia itokay? Itech miak taneltokalismej kijtouaj ke yejuatsin monotsa Dios oso toTeko, sayoj ke nejon amo tokaymej. Nejin kemej yeskia ijkuak tikijtouaj ke se takat tekiuaj, sayoj ke ayamo tikmatij itokay. Dios techiluia ke monotsa Jiova. Biblia kijtoua: “Maj taltikpakneminij kimatikan ke motokay Jiova uan ke sayoj tejua okachi tiUeyichiujkej itech nochi taltikpak” (Salmo 83:18 [82:19 itech seki Biblias]). Dios kineki maj tikixmatikan itokay uan maj tikuikan. ¿Keniuj tikmatij? Porin akin kijkuilojkej Biblia kikuikej panoua 7,000 (Éxodo 3:15; 6:3). Dios techmatiltia itokay porin kineki maj kuali timouikakan iuan.

15. ¿Toni kijtosneki tokayit Jiova?

¹⁵ Tein kijtosneki tokayit Jiova kipia miak ipatiuj. Kijtosneki ke Dios ueli kichiua nochi tein kijtoua uan tein kiixtalia. Amo teyi ueli kitsakuilia. Sayoj Jiova kinamiki ijkon motokaytis. *

16, 17. 1) ¿Toni kijtosneki Biblia keman kijtoua ke Jiova kipia “nochi uelilis” uan “Totayekankau [...] sen nachipa”? 2) ¿Keniuj no moixmati Jiova?

 ¹⁶ Biblia kikui okseki tajtolmej keman ika tajtoua Jiova. Kemej neskayot, Apocalipsis 15:3 kijtoua: “Totekotsin Dios tikompia nochi uelilis. Uan timitsonueyichiuaj uan timitsonmouiskapouaj nochi motachiualisuan”. ¿Toni kijtosnekij tajtolmej “tikompia nochi uelilis”? Kijtosnekij ke sayoj Jiova nochi ueli kichiua. Uan 1 Timoteo 1:17 kijtoua ke Jiova yejua “Totayekankau [...] sen nachipa”. Nejin kijtosneki ke Jiova nochipa nemi. Uan no,  Salmo 90:2 kijtoua ke Dios nochipa nemis. ¿Melauj ke semi kualtsin se kimatis nejin?

¹⁷ Biblia no tamachtia ke sayoj Jiova kichijchiuak nochi tein onkak. Apocalipsis 4:11 kijtoua: “Totekotsin Dios, Tejuatsin mitsonnamiki xikselijto nochi ne mouistililis uan ne ueyipanchiualis uan ne chikaukakualtsiyo. Porin sayo Tejuatsin tikonchijchiuak nochi ten ongak. Uan Tejuatsin tikonmonekiltij ma taonka nochi ten tikitaj uan ma mochiua nochi”. Kemej tikitaj, Jiova kichijchiuak nochi tein onkak: ángeles uan sitalimej uan tein onkak itech ueyiat uan koujtakilomej.

18. 1) ¿Keyej sekin kinemiliaj ke amo keman uelis kuali mouikaskej iuan Dios? 2) Sayoj ke ¿toni kijtoua Biblia?

¹⁸ Keman sekin kiixmatij Jiova, mouij uan kinemiliaj ke amo kiita tein techpanoua porin yejuatsin semi  chikauak, semi ueyi uan amo ueli tikitaj. Sayoj ke Dios amo kineki maj ijkon timomachilikan. Yejuatsin kineki kuali mouikas touan. Biblia kijtoua ke Dios “amo uejka yetika de cada senme de tejuan” (Hechos 17:27). Dios kineki xikonixmati. Komo ijkon tikonchiua, yejuatsin kijtoua ke “motokis” mouan uan kuali mouikas mouan (Santiago 4:8).

19. 1) ¿Keniuj uelis kuali tionmouikas iuan Dios? 2) ¿Toni tein Jiova kinextia okachi tikonuelita?

¹⁹ ¿Keniuj uelis kuali tionmouikas iuan Dios? Jesús kijtoj: “Nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan in taltikpakuani ma nechixmatikan Nejuatsin ke ni Jesucristo ten Tejuatsin tinechonualtitanik” (Juan 17:3). Komo tikonsentoka tionmomachtia Biblia, okachi tikonixmatis Jiova uan Jesús uan okachi kuali tionmouikas iniuan. Kemej neskayot, tejuatsin tionmomachtijya ke “Totajtsin Dios tetasojta” (1 Juan 4:16). Sayoj ke yejuatsin kinextia okseki taman. Biblia tamachtia ke Jiova “se Dios teiknelijkej uan teyoliknelijkej, amo niman kualani uan kipia ueyi netasojtalis tein amo tami uan nochipa kijtoua tein melauak” (Éxodo 34:6). No tamachtia ke Jiova yolkuali uan “niman tetapojpoluia” (Salmo 86:5). Uan no, Dios amo yolijsiui uan amo tekaua (2 Pedro 3:9; Apocalipsis 15:4, TNM). Okachi tikonixmatis kualtsitsin taman tein Jiova kinextia keman tionmomachtis Biblia.

20, 21. ¿Keniuj uelis kuali tionmouikas iuan Dios komo amo ueli tikonita?

²⁰ ¿Keniuj tejuatsin uelis kuali tionmouikas iuan Dios komo amo ueli tikonita? (Juan 1:18; 4:24; 1 Timoteo 1:17.) Keman tikonixtajtoltis Biblia, okachi tikonmatis keniuj tanemilia Jiova uan tein kimachilia (Salmo 27:4;  Romanos 1:20). Komo okachi tikonixmati Jiova, okachi tikontasojtas uan okachi kuali tionmouikas iuan.

²¹ No tikonmatis ke Jiova yejua toTajtsin akin techtasojta (Mateo 6:9). Yejuatsin techmakak tonemilis uan kineki maj kuali tinemikan. Yejua nejon tein kineki se tetat akin kintasojta ikoneuan (Salmo 36:9). Biblia tamachtia ke tejuatsin uelis kuali tionmouikas iuan Jiova (Santiago 2:23, TNM). ¡Sayoj xikonnemili! Akin kichijchiuak nochi kineki maj kuali timouikakan iuan.

22. ¿Toni moneki tikonchiuas komo sekin amo kinekij xikonsentoka xionmomachti Biblia?

²² Sekin xa kinekiskej amo xikonsentoka xionmomachti Biblia. Xa amo kinekij xikonpata motaneltokalis. Sayoj ke amo xikonkaua maj nion teyi mitsontsakuili kuali xionmouika iuan Jiova. Amo moajsi okse akin uelis okachi mitsonpaleuis.

23, 24. 1) ¿Keyej moneki tikonsentokas tikonchiuas netajtanilmej? 2) ¿Toni tikitaskej itech okse tamachtilis?

²³ Keman tionmomachtis Biblia, tikonajsis seki taman tein amo tikonajsikamatis. Nochipa keman monekis, xikonchiua netajtanilmej uan xiontajtani maj mitsonpaleuikan. Jesús kijtoj ke moneki tiyeskij tiyolyemankej kemej konemej. Kemej tikitakej ipeujyan tamachtilis, konemej kinekij kimatiskej miak taman (Mateo 18:2-4). Uan Dios kineki no xikonajsi itanankililuan monetajtaniluan. Yejua ika, xionmomachti Biblia ika miak nejmachkayot uan ijkon tikonitas ke tein tionmomachtijtok yejua tein melauak (xikonixtajtolti Hechos 17:11).

²⁴ Komo timomachtiaj Biblia okachi kuali tikixmatiskej Jiova. Itech okse tamachtilis tikitaskej keyej amo onkak okse amatajkuilol kemej Biblia.