1, 2. ¿Toni motajtaniaj miakej?

MOJMOSTAJ tikakij ke mochiua miak taman tein amo kuali: ke itech se altepet chikauak talolinik uan miakej momikilijkej, ke se taltikpaknenkej kimiktijkej oso ke se temomaj akin kipiaya cáncer momikilij uan makuil ikoneuan mokaujkej ininselti.

² Keman mochiua teisa kemej nejin, miakej motajtaniaj keyej sekin semi tetauelitaj uan keyej semi titajyouiaj. ¿Kemansa no tionmotajtaniani nejin?

3, 4. 1) ¿Toni Habacuc kitajtanij Jiova? 2) ¿Toni kinankilij Jiova?

³ Biblia kijtoua ke seki itekitikauan Dios akin semi iuan takuaujtamatiaj no motajtanijkej nejon. Kemej neskayot, Habacuc kitajtanij Jiova: “¿Keyej tinechitaltia miak taman tein amo kuali? ¿Keyej tikaua maj tetajyouiltikan? ¿Keyej tauejuelouaj uan tateuiaj noixpan? ¿Uan keyej semi motajtolteuiaj uan keyej semi moteuiaj?” (Habacuc 1:3).

⁴ Biblia kijtoua ke Jiova kiluij Habacuc ke kiyektaliskia nochi tein mochiujtoya (Habacuc 2:2, 3). Jiova semi techtasojta. Biblia kijtoua: “Yejuatsin semi [kineki] namechyekpixtinemis” (1 Pedro 5:7). Tejuan techyolkokoua tikitaskej ke miakej tajyouiaj, sayoj ke Dios okachiok kiyolkokoua (Isaías 55:8, 9). Komo ijkon, ¿keyej semi titajyouiaj? Maj tikitakan.

5. 1) ¿Toni kijtouaj miakej tiopixkamej uan pastores keman mochiua teisa tein amo kuali? 2) ¿Uan toni kijtoua Biblia?

⁵ Keman mochiua teisa tein amo kuali, miakej kijtouaj ke ixyetoyaya maj ijkon pano. Uan keman se taltikpaknenkej tajyouia, tiopixkamej, pastores uan oksekin  akin taixyekanaj itech taneltokalis no kijtouaj ke Dios ijkon kinekia maj pano. Oksekin kijtouaj ke timomikiliaj porin tiyetotij iuan Dios ne iluikak. Kemej neskayot, keman se konetsin momikilia, miakej kijtouaj ke Dios kiuikak porin kinekia okse ángel. Sayoj ke nejon amo melauj. Jiova amo keman kichiua maj pano tein amo kuali. Biblia kijtoua: “¡Nion ueli tiknemiliaj maj akin yekmelauj Dios kichiua tein amo kuali, maj akin kipia nochi uelilis kichiua tein amo kinamiki!” (Job 34:10).

6. ¿Keyej miakej kitajtakoltiaj Dios tajyouilis tein tikpanouaj?

⁶ Miakej kijtouaj ke Dios itajtakol maj tajyouikan, porin kinemiliaj ke yejuatsin taixyekantok nikan taltikpak. Sayoj ke itech tamachtilis 3 tikitakej ke akin taixyekana nikan taltikpak yejua Satanás.

7, 8. ¿Keyej semi titajyouiaj?

⁷ Biblia kijtoua ke “nochi in taltikpakuani kinyekana ok yejua in amokuali Satanás” (1 Juan 5:19). Akin taixyekana nikan taltikpak yejua Satanás, akin semi amo yolkuali uan tetajyouiltia. Yejua “kinkajkayautinemi nochi in taltikpakuani” (Apocalipsis 12:9). Miakej kichiuaj tein Satanás kichiua. Nejin yejua yekinika taman tein kichiua maj miakej takajkayauakan, maj tetauelitakan uan maj tetajyouiltikan.

⁸ Maj tikitakan ojpatika taman tein kichiua maj semi titajyouikan. Satepan ke Adán uan Eva amo kitakamatkej Dios, kinpanoltilijkej tajtakol ininkoneuan. Yejua ika taltikpakneminij kichiuaj tein amo kuali uan kintajyouiltiaj oksekin. Miakpa kinekij yeskij okachi ueyichiuanimej, moteuiaj, youij tateuitij itech uejueyi neteuilis uan kinchiuiliaj tein amo kuali oksekin (Eclesiastés 4:1; 8:9). Expatika taman tein kichiua maj kemansa titajyouikan yejua “porin ejko tonal keman nochin kinpanoua tein  amo kuali uan tein amo kichiayaj” (Eclesiastés 9:11). Kemej neskayot, xikonnemili ke tionnejnentiuj uan se ueyi kouit uetsi uan mitsonpechia. ¿Tikonijtoskia ke Satanás kichiuak maj mitsonpano nejon oso ke mitsonpanok porin tiontajtakolej? Amo. Nejin kinextia ke uelis techpanos teisa tein amo kuali sayoj porin timoajsij kampa mochiua teisa tein amo momattoya.

9. ¿Kineki Dios maj titajyouikan? Xikonmelaua.

⁹ Jiova amo kichiua maj titajyouikan. Amo kichiua maj onka uejueyi neteuilis, tateuilis oso okseki taman tein amo kuali. Amo no kichiua maj talolini, maj chikauak kiouaejeka, maj taapexoni oso maj taatemi nion maj mochiua okseki taman kemej nejon. ToTajtsin Dios semi techtasojta. Maski yejuatsin amo kineki maj titajyouikan, tiksentokaj titajyouiaj. Yejua ika itech okseki párrafos timomachtiskej keyej yejuatsin kikaua maj titajyouikan (1 Juan 4:8).

10. ¿Toni kichiuak Satanás maj kineltokanij Adán uan Eva?

¹⁰ Itech xochital tein moajsia Edén, Satanás kinkajkayauak Adán uan Eva. Kichiuak maj kineltokanij ke Dios amo kuali taixyekana. Kijtoj ke onkaya teisa tein kuali tein Dios amo kinekia kinmakas. Satanás kinekia kichiuas maj kineltokanij ke yejua okachi kuali taixyekanaskia ke Jiova uan ke amo monekia maj Dios kinixyekanani (Génesis 3:2-5). (Xikonita tajtolmelaualis 26.)

11. ¿Toni kinemilijkej Adán uan Eva keman kiixnamikkej Jiova?

¹¹ Adán uan Eva amo kitakamatkej Jiova uan kiixnamikkej. Kinemilijkej ke yejuan kinnamikia kiixtaliskej toni kuali uan toni amo kuali. ¿Keniuj ueliskia kinextis Jiova ke Adán uan Eva mopolojtoyaj uan ke sayoj yejuatsin kimati toni okachi techpaleuis?

12, 13. 1) ¿Keyej Jiova amo niman kinixpoloj Adán uan Eva? 2) ¿Keyej kikaua Jiova maj Satanás taixyekana nikan taltikpak uan maj taltikpakneminij ininselti moixyekanakan?

 ¹² Jiova kinekia maj taltikpak mochiuani se xochital uan maj ompa neminij ininkoneuan Adán uan Eva. Uan Jiova kichiuas tein kiixtalijtok maski Satanás kitemoua kitsakuilis (Génesis 1:28; Isaías 55:10, 11). Yejua ika Jiova amo niman kinixpoloj Adán uan Eva, ta kinkauak maj kinpianij konemej. Ijkon, ininkoneuan ueliskiaj kiixpejpenaskej akoni kinekiaj maj kinixyekana, Satanás oso Jiova.

¹³ Satanás kijtoj ininixpan nochin ángeles ke Jiova amo kuali taixyekana (Job 38:7; Daniel 7:10). Yejua ika Jiova kikauak maj panokan xiujmej. Ijkon Satanás ueliskia kinextis ox melauj tein kijtouaya uan taltikpakneminij no ueliskia kinixtaliskej tataman tekiuajyomej tein moajsiskiaj imako Satanás. Ijkon, ueliskiaj kinextiskej ox yekmelauj amo moneki maj Dios kinpaleui, ta ke ueli ininselti moixyekanaj.

14. ¿Toni monextiani miak xiujmejya?

¹⁴ Tataman tekiuajyomej miak xiujmejya taixyekananij, sayoj ke amo keman ueli kichiuaj tein kiixtaliaj. Ijkon monextiani ke Satanás takajkayaua uan ke taltikpakneminij kemaj moneki maj Dios kinpaleui. Semi melauj tein se itekitikauj Dios akin monotsaya Jeremías kijtoj: “Jiova, nejua kuali nikmati ke takat amo kinamiki iselti moojtokaltis. Nion kinamiki takat akin nejnentok kiyekanas itaksalis” (Jeremías 10:23).

15, 16. 1) ¿Keyej Jiova ayamo kiixpoloua tajyouilis? 2) ¿Keyej Jiova amo kiyektaliani tein Satanás kichiuani?

¹⁵ ¿Keyej Jiova ayamo kiixpoloua tajyouilis? ¿Keyej kikaua maj mochiua tein amo kuali? Yejuatsin kikauani  maj panokan xiujmej uan ijkon uelis monextis ke Satanás amo ueli taixyekana. Taltikpakneminij tataman kemej kiixtalianij taixyekanaskej, sayoj ke amo ueli kichiuaj tein kiixtaliaj. Uan no, maski axkan onkak okachi kuajkuali pajti, teposmej uan okseki taman, no okachi miakej tetajyouiltiaj, onkak okachi tatasojtilis uan neteuilismej. Amo ueli kuali timoixyekanaj komo amo techpaleuia Dios.

¹⁶ Sayoj ke, Jiova amo kiyektaliani tein amo kuali tein Satanás kichiuani. Komo kiyektaliskia, kipaleuijtoskia itaixyekanalis Satanás, uan Dios amo keman kichiuaskia nejon. Uan no, taltikpakneminij kinemiliskiaj ke uelis kuali moixyekanaskej ininselti. Sayoj ke Dios amo ueli tapaleuia maj moita ke nejon melauj porin se takajkayaualis, uan yejuatsin amo keman takajkayaua (Tito 1:2).

17, 18. ¿Keniuj kiyektalis Jiova nochi tein amo kuali tein kichiuani Satanás?

¹⁷ Jiova ueli kiyektalia nochi tein amo kuali tein kichiuanij Satanás uan taltikpakneminij. Yejuatsin nochi ueli kichiua uan kimati kemanian kiixpolos tajyouilis. Kichiuas maj amo titajyouikanok keman monextis ke Satanás takajkayauak. Ompa kichiuas maj nochi taltikpak mochiua se xochital, kemej ipa kiixtalijtoya. Nochin mikemej oksepa nemiskej (Juan 5:28, 29). Amo akin kokolispeuas nion momikilis. Jiova kichiuas maj Jesús kiuejuelo “in chikaualisme den amokuali Satanás”, tein kijtosneki ke kiixpolos nochi tein Satanás kichiuani (1 Juan 3:8). Tiktasojkamatiliaj Jiova maj ayamo kiixpolo tein amo kuali. Nejon techpaleuia maj tiuelikanok tikixmatikan uan maj ueli tiknemilikanok ox tiknekij maj yejuatsin techixyekana (xikonixtajtolti 2 Pedro 3:9). Uan no, keman titajyouiaj, yejuatsin techpaleuia maj titaxikokan (xikonixtajtolti 2 Tesalonicenses 3:3).

 ¹⁸ Jiova amo techchikaujkauia maj tikauakan maj yejuatsin techixyekana. Yejuatsin techtayokolij se taman tein kipia miak ipatiuj: techkaua maj toselti tikixtalikan toni tikchiuaskej. Maj tikitakan keniuj techpaleuia nejin netetayokolil.

19. 1) ¿Toni kualtsin netetayokolil techmakak Jiova? 2) ¿Keyej moneki tiktasojkamatiliskej nejon netetayokolil?

¹⁹ Jiova techkaua maj toselti tikixtalikan toni tikchiuaskej. Ika nejin kualtsin netetayokolil tein techmakak, ueli tiknemiliaj toni tikchiuaskej uan ox tiktekitiliskej Jiova oso amo. Jiova amo ijkon kinchijchiuak tapialmej, yejuan amo kimatij toni kuali uan toni amo kuali (Proverbios 30:24-28). Amo no tichijchiujtokej kemej teposmej tein ixyetokya keniuj se kinkuis. Tejuan ueli tikixtaliaj keniuj tiknekij tiyeskij, akonimej iniuan timouikaskej uan toni tikchiuaskej. Jiova kineki maj tiyolpakikan.

20, 21. ¿Toni tein okachi kuali uelis tikonchiuas axkan?

²⁰ Jiova kineki maj tiktasojtakan ika nochi toyolo (Mateo 22:37, 38). Yejuatsin kemej yeskia se tetat akin yolpaki keman ikonetsin kiluia ke kitasojta porin yekmelauj kimachilia, uan amo porin kiluiaj maj kilui nejon. Jiova techkaua maj tiknemilikan ox tiknekij tiktekitiliskej oso amo. Satanás, Adán uan Eva kiixnamikkej Jiova. Uan tejuatsin, ¿toni tikonchiuas?

²¹ Tein okachi kuali tein uelis tikonchiuas axkan yejua tikontekitilis Jiova. Miak millones taltikpakneminij kiixtalijkejya kitekitiliskej Dios uan kiixtopeuaskej Satanás (Proverbios 27:11). Kemej tikitakejya, Dios kiixpolos tajyouilis uan kichiuas maj nochi taltikpak mochiua se xochital. ¿Toni uelis tikonchiuas komo tikonneki tionnemis ompa? Tikitaskej tanankilil itech okse tamachtilis.