1. ¿Akoni sayoj ueli techiluia keniuj moneki tikueyichiuaskej Dios?

ITECH miak taneltokalismej kijtouaj ke tamachtiaj tein melauak keman ika tajtouaj Dios. Sayoj ke nejon amo melauj, porin tataman tamachtiaj keman ika tajtouaj akoni Dios uan keniuj moneki tikueyichiuaskej. Komo ijkon, ¿keniuj uelis tikmatiskej katiyejua taneltokalis tein melauak? Sayoj Jiova ueli techiluia keniuj moneki tikueyichiuaskej.

2. ¿Keniuj uelis tikonmatis keniuj moneki se kiueyichiuas Dios?

² Jiova techmakak Biblia porin kineki maj tikmatikan keniuj moneki tikueyichiuaskej. Yejua ika xionmomachti Biblia uan Jiova mitsonpaleuis xikonajsikamati uan xikonchiua tein tamachtia, porin yejuatsin yekmelauj kineki kuali xionnemi (Isaías 48:17).

3. ¿Toni kichia Dios maj tikchiuakan?

³ Miakej kijtouaj ke Dios kiyolpaktia tein tamachtiaj itech nochi taneltokalismej, sayoj ke nejon amo yejua tein Jesús tamachtij. Yejua kijtoj: “Totajtsin Dios de eluiyaktsinko amo kinyolyekanas ika iueyichikaualis nochi ne ten nechnotsaske sayo ika nintenxipal san ke Nejuatsin ni Nintekotsin. Ta, sayo [...] ten kichiuaj keme Notajtsin Dios ipakilis”. Nejin kinextia ke moneki tikmatiskej katiyejua itanejnekilis Dios uan maj tikchiuakan. Nejin moneki amo tikauilmatiskej, porin Jesús kijtoj ke akin amo kitakamatij Dios ‘tachiuanij ika tein amo kuali’ (Mateo 7:21-23).

4. ¿Toni kijtoj Jesús ke panos keman tikchiuaskej tein Dios kineki?

⁴ Jesús kijtoj ke kemansa ouij techkisas tikchiuaskej tein Dios kineki. Kijtoj ke inemilis akin kichiua kemej Cristo kemej yeskia se ojti tein amo patauak kampa amo miakej kinekiskiaj yaskej. Yejua kijtoj: “Xikalakikan itech ne ojtsin de Dios kampa ne kalteno amo patauak. Porin ne kalten uan  ne ueyi ojti semi patauke kampa yajtokke in tagayot para ajsitiue tech ne ixpoliuilis, uan miakke tagayot youe tech ne patauak ojti [...]. Uan amo patauak ne kalteno uan semi pitsauak ne ojti kampa yajtokke in taneltokani para ajsitiue tech ne yek nemilis. Uan amo miakke moajsitiue tech nijin ojti” (Mateo 7:13, 14). Ojti tein amo patauak kiixnextia taneltokalis tein melauak uan tepaleuia maj se nemi nochipaya. Ojti tein patauak kiixnextia taneltokalis tein amo melauak uan teuika itech mikilis. Sayoj ke Jiova amo kineki maj nion akin momikili, yejua ika kichiua maj nochin uelikan kiixmatikan (2 Pedro 3:9).

5. ¿Keniuj uelis tikonmatis akonimej moajsij itech taneltokalis tein melauak?

⁵ Jesús kijtoj ke uelis tikmatiskej akonimej moajsij itech taneltokalis tein melauak. Yejua kijtoj: “Namejuan kuali nankinyekixmatiske [...] ika ne tachiualis ten yejuan kichiutinemij”. No kinextij ke taneltokalis tein melauak kemej yeskia se kuali kouit keman kijtoj: “Nochi in kuouit ten kuali, yejua ne kitemaka kuali takilome” (Mateo 7:16, 17). Nejin amo kijtosneki ke itekitikauan Dios amo tajtakolejkej. Sayoj ke yejuan nochipa mochikauaj kichiuaskej tein kuali. Axkan maj tikitakan keniuj uelis tikmatiskej katiyejua taneltokalis tein melauak.

6, 7. 1) ¿Keyej itech taneltokalis tein melauak tamachtiaj sayoj tein kijtoua Biblia? 2) ¿Toni techmachtia tein kichiuaya Jesús?

⁶ Itech taneltokalis tein melauak tamachtiaj tein Biblia kijtoua. Biblia kijtoua: “Nochi in Tajkuilolamatsitsin nochi yejuan Dios kichiuak ika ichikaualisuan. Ika ya nojon [...] uelis se kuitinemis para ika se tamachtijtinemis uan no para ika se kintaneltoktijtinemis in tagayot ma kikautiyakan nintajtakoluan. Uan [...] para ika se kinmachtijtiyas in taneltokani de  keniu chipaukanemiske. Uan ika nijin Tajtoltsin in tekitike de Dios mochiuaki yek yolmajsitok [...], uan ijkon uelis kichiutiyas miak tataman den kuali tekit” (2 Timoteo 3:16, 17). Tatitanil Pablo kinijkuilouilij itatojtokakauan Cristo: “Namejuan nankiselijke ya in Tajtoltsin de Dios tenika tamechnojnotske, [...] amo keme kuak tagayot tamechnojnotstinemiaj san. Ta, nankiselijke totanojnotsalis keme kuak Dios namechnojnotstok” (1 Tesalonicenses 2:13). Itech taneltokalis tein melauak tamachtiaj sayoj tein kijtoua Biblia, porin yejua iTajtol Dios. Amo tamachtiaj tein kinemiliaj taltikpakneminij nion tein ipa uejkaujya kichiuaj.

⁷ Nochi tein Jesús tamachtij kikixtij itech iTajtol Dios (xikonixtajtolti Juan 17:17). Nochipa kijtouaya tein ompa ijkuiliujtok (Mateo 4:4, 7, 10). Tiitekitikauan Dios tikchiuaj kemej Jesús uan nochi tein titamachtiaj tikixtiaj itech Biblia.

8. ¿Toni tamachtij Jesús kemej moneki tikueyichiuaskej Jiova?

⁸ Moneki sayoj tikueyichiuaskej Jiova. Salmo 83:18 kijtoua: “Maj taltikpakneminij kimatikan ke motokay Jiova, ke sayoj tejua okachi tiUeyichiujkej itech nochi taltikpak”. Jesús kinekia maj nochin kimatinij akoni Dios akin melauak. Yejua ika kiteixmatiltij itokay Dios (xikonixtajtolti Juan 17:6, TNM). Jesús kijtoj: “Xikmouistiliti in Totekotsin to Dios uan sayo Yejuatsin xikmouiskatekitilijtinemi” (Mateo 4:10). Yejua ika tiitekitikauan Dios tikchiuaj kemej Jesús. Tikueyichiuaj sayoj Jiova, tikuij itokay uan tikteixmatiltiaj. No tikinmachtiaj oksekin tein Dios toka kichiuas.

9, 10. ¿Keniuj tiknextiaj ke tikintasojtaj oksekin?

⁹ Moneki yekmelauj tikintasojtaskej oksekin. Jesús kinmachtij itatojtokakauan maj motasojtakan (xikonixtajtolti Juan 13:35). Nejon netasojtalis moneki kichiuas maj timoitakan kemej yeskia tiiknimej, maski tikayomej itech tataman altepemej oso tikpiaj tomin oso amo (Colosenses 3:14). Yejua ika, amo titapaleuitij kampa mochiujtok neteuilis  nion titemiktiaj. Biblia kijtoua: “Moixmatij nekes den melau ikonetsitsin de Dios ijkuin: [...] yejuan nojonkes kitakamatinemij ten Dios kimonekiltia uan kintasojtatinemij nintasojikniuan. Uan no moixmatij ne den ikoneuan den amokuali Satanás porin yejuan nojonkes amo ijkon kichiutinemij”. Uan no kijtoua: “Ma timosenpantasojtakan se uan okse. Uan ma amo xikchiuakan keme ne tagat Caín kichiuak. Yejua pouiaya iuan in amokuali Satanás; ika ya nojon kimiktij iikniu” (1 Juan 3:10-12; 4:20, 21).

¹⁰ Tikuij totiempo, tochikaualis, totomin uan okseki taman tein tikpiaj uan ika tikinpaleuiaj uan tikinyolchikauaj oksekin (Hebreos 10:24, 25). Tikchiuaj tein kuali tein ika tikinpaleuiskej nochin (Gálatas 6:10).

11. ¿Keyej tiktakamatij Jesús?

¹¹ Moneki tiktakamatiskej Jesús, porin sayoj itechkopa uelis tikixmatiskej Dios. Biblia kijtoua: “Amo aken ok uelis temakixtis [...] porin Totajtsin Dios amo techmaka ok okse tokaytsin tenika se tagat nikan taltikpak uelis momakixtis” (Hechos 4:12). Itech tamachtilis 5 timomachtijkej ke Jiova kiualtitanik Jesús maj kitemakaki inemilis ininka akin tatakamatij (Mateo 20:28). Jiova kiixpejpenak Jesús maj tekiuajti itech taltikpak. Yejua ika, Biblia kijtoua ke moneki tiktakamatiskej Jesús komo tiknekij tinemiskej nochipaya (xikonixtajtolti Juan 3:36).

12. ¿Keyej amo tikinixtaliaj nion tikinixnamikij tekiuanij?

¹² Moneki amo tikinixtaliskej nion tikinixnamikiskej tekiuanij. Jesús amo kinpaleuij nion kinixnamikik tekiuanij. Keman tekiuanij kinemilijtoyaj keniuj kitajyouiltiskej, kiluij tekiuaj romano Pilato: “NoTekiuajyo amo moajsi nikan taltikpak” (xikonixtajtolti Juan 18:36, TNM). Ijkon kemej Jesús, tiknekij maj sayoj taixyekana iTekiuajyo Dios. Yejua ika amo tikinixtaliaj nion tikinixnamikij tekiuanij, itech tein yeski xolal kampa tinemiskej. Sayoj ke Biblia kemaj  technauatia maj tikintakamatikan (Romanos 13:1). Tiktakamatij tanauatilmej tein kiixtaliaj kampa tinemij. Sayoj ke, keman se tanauatil kiixnamiki itanauatiluan Dios, tikchiuaj kemej itatitaniluan Jesús. Yejuan kijtojkej: “Moneki ke ma tiktakamatikan Totajtsin Dios uan ma amo achto tikintakamatikan in tagayot” (Hechos 5:29; Marcos 12:17).

13. ¿Toni tikteixmatiltiaj keman ika titajtouaj iTekiuajyo Dios?

¹³ Moneki tikteixmatiltiskej ke sayoj iTekiuajyo Dios kiixpolos nochi kuejmolmej. Jesús kijtoj ke “moneki ma mojmoyaua in kuali Tajtoltsin de Dios nonouiyan nochi tech senmanauak” (xikonixtajtolti Marcos 13:10). Nion se tekiuajyot uelis kichiuas maj amo tikpiakan kuejmolmej nion maj tiyolseujkanemikan, ta sayoj iTekiuajyo Dios (Salmo 146:3). Jesús techmachtij maj titajtanikan maj taixyekana iTekiuajyo Dios keman tikchiuaskej netataujtil. Yejua kijtoj: “Maj uiki moTekiuajyo. Maj mochiua motanejnekilis, ne iluikak uan no nikan taltikpak” (Mateo 6:10, TNM). Biblia techiluia ke iTekiuajyo Dios kinixpolos nochi tekiuajyomej tein moajsij nikan taltikpak uan “sayoj yejua yetos nochipaya” (Daniel 2:44).

14. ¿Itech katiyejua taneltokalis kichiujtokej tein Dios kijtoua?

¹⁴ Tikitakejya tein kichiuaj itekitikauan Dios. Nochipa kikixtiaj itech Biblia tein tamachtiaj, kiteixmatiltiaj itokay Dios uan yekmelauj motasojtaj. Uan no, itekitikauan Dios kitakamatij Jesús, amo kinixtaliaj nion kinixnamikij tekiuanij uan kiteixmatiltiaj ke sayoj iTekiuajyo Dios kiixpolos kuejmolmej uan kichiuas maj tiyolseujkanemikan. ¿Akonimej kichiujtokej nochi nejin? Sayoj itaixpantijkauan Jiova (Isaías 43:10-12).

15. ¿Toni moneki tikchiuaskej komo tiknekij maj Dios kiyolpakti kemej tikueyichiuaj?

¹⁵ Amo sayoj moneki tikneltokaskej ke nemi Dios. Hasta amokuali ejekamej kineltokaj ke nemi, sayoj ke amo  kitakamatij (Santiago 2:19). Komo tiknekij maj Dios kiyolpakti kemej tikueyichiuaj, amo sayoj moneki tikneltokaskej ke nemi, ta no moneki tikchiuaskej tein technauatia.

16. ¿Keyej moneki tikauaskej taneltokalis tein amo melauak?

¹⁶ Komo tiknekij maj Dios kiyolpakti kemej tikueyichiuaj, no moneki tikauaskej taneltokalis tein amo melauak. Tatitanil Pablo kijkuiloj: “Xikisakan uan [...] amo ximokalakijtinemikan ok tech ninpitsotiknemilis” (2 Corintios 6:17). Jiova kiita taneltokalis tein amo melauak kemej se taman tein pitsotik. Yejua ika moneki tikixtopeuaskej nochi tein mouika ika taneltokalis tein amo melauak.

17, 18. 1) ¿Toni ‘ueyi Babilonia’? 2) ¿Keyej moneki nimanya tikonkauas?

¹⁷ ¿Toni taneltokalis tein amo melauak? Ompa moajsij nochi taneltokalismej kampa amo tamachtiaj maj se kiueyichiua Dios kemej kijtoua iTajtol. Itech Biblia, nochi taneltokalismej tein amo melaujkej moixmatij kemej ‘ueyi Babilonia’ (Apocalipsis 17:5). ¿Keyej? Satepan ke taapexonik oso taatemik itech itonaluan Noé, itech xolal Babilonia peuak motamachtia miak taman tein amo melauak. Nochi nejon tamachtilis peuak kineltokaj itech nochi taltikpak. Kemej neskayot, akin nemiaj Babilonia kinueyichiuayaj ejeyi tiotsitsin. Itech nejin tonalmej, itech miak taneltokalismej tamachtiaj ke Dios se trinidad, sayoj ke Biblia kiyeknextia ke sayoj Jiova yejua Dios akin melauak uan ke Jesús yejua iKonetsin (Juan 17:3). Akin nemiaj Babilonia no kineltokayaj ke se teisa kisentoka yoltok satepan ke se momikilia uan ke tajyouia nochipaya itech tit. Sayoj ke nejon amo melauak. (Xikonita tajtolmelaualis 14 uan 17.)

¹⁸ Dios kijtojya ke amo uejkaua nochi taneltokalismej tein amo melaujkej ixpoliuiskej (Apocalipsis 18:8). ¿Tikonajsikamati keyej moneki nimanya tikonkauas taneltokalis tein amo melauak? Jiova kineki xikonkaua taneltokalis tein amo melauak axkan ke ueliok (Apocalipsis 18:4).

19. ¿Keniuj mitsonpaleuis Dios komo tikonixtalia tikontekitilis?

 ¹⁹ Komo tejuatsin tikonkaua taneltokalis tein amo melauak uan tikontekitilia Jiova, xa seki mochankauan oso akin kuali iniuan tionmouika amo kiajsikamatiskej uan hasta uelis mitsonixnamikiskej, mitsonpijpinaujtiskej oso amo mitsonnotsaskejok. Sayoj ke Jiova mitsonpaleuis. Itech nochi taltikpak nemij miakej millones akin yekmelauj motasojtaj. Yejuan mochiuaskej kemej motatuan uan mokniuan. No uelis tikonchias tionnemis nochipaya itech Xochital (Marcos 10:28-30). Seki mochankauan oso akin kuali iniuan tionmouika akin axkan mitsonixnamikij xa satepan no kinekiskej momachtiskej Biblia.

20. ¿Keyej moneki xionmoajsi itech taneltokalis tein melauak?

²⁰ Amo uejkaua, Dios kiixpolos nochi tein amo kuali, uan iTekiuajyo taixyekanas itech taltikpak (2 Pedro 3:9, 13). Semi kualtsin tinemiskej. Nochin kiueyichiuaskej Jiova kemej yejuatsin kineki. Yejua ika axkan moneki xikonueyichiua Jiova kemej kiyolpaktia uan xionmoajsi itech taneltokalis tein melauak.