1. ¿Akoni techmakak tonemilis?

JIOVA yejua “Dios ten nachipa yoltika” (1 Tesalonicenses 1:9). Yejuatsin techchijchiuak uan techmakak tonemilis. Biblia kijtoua nejin ika tein kichiuak Jiova: “Tejuatsin tikonchijchiuak nochi ten ongak. Uan Tejuatsin tikonmonekiltij ma taonka nochi ten tikitaj” (Apocalipsis 4:11). Tiyoltokej porin Jiova ijkon kinekik. Tonemilis se netetayokolil tein Dios techmakak tein kipia miak ipatiuj (xikonixtajtolti Hechos 17:24, 25).

2. ¿Toni moneki tikchiuaskej komo tiknekij maj kuali kisa tein tikchiuaskej?

² Jiova techmaka nochi tein techpaleuia maj tiyoltokan, kemej takual uan at (Hechos 17:28). Uan no, yejuatsin kineki maj tiyolpakikan (Hechos 14:15-17). Komo tiknekij maj kuali kisa nochi tein tikchiuaskej, moneki tiktakamatiskej Dios (Santiago 1:25).

3. ¿Toni kichiuak Jiova keman Caín kimiktij Abel?

³ Biblia techmachtia ke Jiova semi kipatiuita tonemilis. Maj tikitakan tein kipanok Caín, yekinika ininkoneuj Adán uan Eva. Caín semi kualanik iuan iikniuj, Abel. Yejua ika Jiova kinejmachtij Caín uan kiluij maj amo kualantinemi. Sayoj ke Caín amo kitajtolkakik. Kemej semi kualantoya kimiktij Abel (Génesis 4:3-8). Jiova kitatsakuiltij Caín porin kimiktij iikniuj (Génesis 4:9-13). Nejin techmachtia ke se kualanis uan se tetauelitas tamouilil porin uelis kichiuas maj se tateui oso maj se tetajyouilti. Akin ijkon kichiuaj amo uelis nemiskej nochipaya (xikonixtajtolti 1 Juan 3:15). Komo tiknekij tikyolpaktiskej Jiova, moneki timochikauaskej tikintasojtaskej nochin (1 Juan 3:11, 12).

4. ¿Toni techmachtia semej Majtakti Tanauatilmej?

 ⁴ Miak xiujmej satepan, Jiova kimakak Moisés Majtakti Tanauatilmej. Semej nejon tanauatilmej kijtoua: “Amo xitemikti” (Deuteronomio 5:17; Santiago 2:11). Akin kimiktiaya se taltikpaknenkej porin ijkon kiixtalijka monekia mikis. Nejon techmachtia ke Jiova semi kipatiuita se inemilis.

5. ¿Keniuj kiita Jiova keman kimiktiaj oso kitamotaj se konetsin akin ayamo yoli?

⁵ ¿Keniuj kiita Jiova keman kimiktiaj oso kitamotaj se konetsin akin ayamo yoli? Jiova no semi kipatiuita inemilis nejon konetsin. Yejuatsin senkis kinextij nejon itech Tanauatil tein kinmakak israelitas. Jiova kiixtalijka maj kimiktikan akin kikokouaya se siuat akin yaya kipiati se konetsin uan ikonetsin momikiliaya (xikonixtajtolti Éxodo 21:22, 23; Salmo 127:3). Nejin techmachtia ke amo kuali yetok maj kimiktikan oso kitamotakan se konetsin akin ayamo yoli. (Xikonita tajtolmelaualis 27.)

6. ¿Keniuj tiknextiliaj Jiova ke tikpatiuitaj tonemilis uan ininnemilis oksekin?

⁶ ¿Keniuj tiknextiliaj Jiova ke tikpatiuitaj tonemilis uan ininnemilis oksekin? Keman amo tikchiuaj nion teyi tein uelis kichiuas maj teisa techpano tejuan oso oksekin. Yejua ika amo titachichinaj, amo titauanaj, amo tikijyotilanaj tíner nion tikuij drogas, kemej marihuana oso okseki taman, porin nochi nejin uelis kichiuas maj tikokolispeuakan uan uelis techmiktis.

7. ¿Keyej moneki amo tikchiuaskejok tein amo kuali tein timomattoyaj tikchiuaskej?

⁷ Kemej Dios techmakak tonemilis, moneki tikuiskej kemej yejuatsin kineki. Yejua ika moneki tikchiuaskej tein techpaleuis maj kuali tiyetokan. Komo amo ijkon tikchiuaj, Dios techitas ke amo tichipaujkej (Romanos 6:19; 12:1; 2 Corintios 7:1). Amo uelis tikueyichiuaskej Dios komo  amo tikpatiuitaj tonemilis, porin yejuatsin techtayokolij. Maski semi ouij techkisas tikauaskej tein timomattoyaj tikchiuaskej, Jiova techpaleuis komo tikpatiuitaj tonemilis uan timochikauaj tikauaskej nejon tein amo kuali.

8. ¿Toni uelis tikchiuaskej uan ijkon amo teyi techpanos?

⁸ Tikitakejya ke tonemilis se netetayokolil tein kipia miak ipatiuj. Jiova kichia maj amo tikchiuakan tein ika uelis timokokoskej oso hasta timomikiliskej tejuan oso oksekin. Yejua ika, amo eliuis tiktsikuinaltiaj carro oso motocicleta. Amo no timauiltiaj kemej uelis timokokoskej oso timikiskej (Salmo 11:5). Tochan no moneki yekchijchiujtos uan ijkon amo teyi techpanos. Keman israelitas kichijchiuayaj se kali, Jiova kinnauatijka maj kalkuako kitentatsakuianij ika se tepamit tein amo uejkapan. ¿Keyej? Yejuatsin kiniluij ke ijkon amo inintajtakol yeskia maj mimiloui oso toyaui esti komo se taltikpaknenkej meualtiaya oso panuetsia (Deuteronomio 22:8).

9. ¿Toni moneki amo tikinchiuiliskej tapialmej?

⁹ Jiova no kipatiuita ininnemilis tapialmej. Yejuatsin techkaua maj tikinmiktikan tapialmej komo tikinkuaskej. No techkaua maj tikmiktikan se tapial komo uelis techkokos oso techmiktis (Génesis 3:21; 9:3; Éxodo 21:28). Sayoj ke moneki amo tikintajyouiltiskej nion tikinmiktiskej oso tikchiuaskej maj moteuikan sayoj porin tiknekij ika timoixpetaniskej (Proverbios 12:10).

10. ¿Keniuj tikmatij ke esti kiixnextia tonemilis?

¹⁰ Jiova kipatiuita esti porin kiixnextia tonemilis. Yejua ika, kitatsakuiltij Caín porin kitoyauak oso kimimiloj iesyo Abel, tein kijtosneki ke kimiktij (Génesis 4:10). Uan satepan ke taapexonik oso taatemik itech itonaluan Noé, Jiova oksepa kinextij ke esti yejua tonemilis. Yejuatsin  kinkauak Noé uan ichankauan maj kinkuakan tapialmej. Kiniluij: “Uelis nankikuaskej tein yeski tapial tein moolinia uan yoltok. Ijkon kemej namechmakak nochi xiujtsitsin kemej takual, no namechmaka tapialmej”. Sayoj ke kinmakak se tanauatil: “Sayoj amo xikuakan nakat ika inemilis, oso iesyo” (Génesis 1:29; 9:3, 4).

11. ¿Toni monekia kichiuaskej itekitikauan Jiova ika ininesyo tapialmej?

¹¹ Kemej 800 xiujmej satepan ke Jiova kinauatij Noé maj amo kikuani esti, Jiova kiniluij akin pouiaj itech ixolal: “Komo se israelita oso se akin uejka kayot akin nemi namouan kintemojtok tapialmej uan kikitskia se koujtajtapial oso se totot tein uelis se kikuas, moneki kimimilos [oso kitoyauas] iesyo uan kipantemilis tal”. Uan no kijtoj: “Amo xikuakan iesyo” (Levítico 17:13, 14). Jiova kinnauatijka itekitikauan maj amo kikuanij esti, sayoj ueliskia kikuaskej nakat. Keman kimiktiayaj se tapial tein kikuaskiaj, monekia kieskixtiskej.

12. ¿Keniuj kiitaj esti itatojtokakauan Cristo?

¹² Seki xiujmej satepan ke momikilij Jesús, tatitanilmej uan tayekananij mosentilijkej ompa Jerusalén uan kiixejekojkej toni tanauatilmej tein Jiova kinmakaka israelitas no monekia kitakamatiskej itatojtokakauan Cristo (xikonixtajtolti Hechos 15:28, 29; 21:25). Jiova kinpaleuij maj kiajsikamatinij ke yejuatsin kisentokaya kipatiuitaya esti uan ke yejuan no monekia kipatiuitaskej. Monekia amo kikuaskej nion tayiskej esti. No monekia amo kikuaskej nakat tein amo kiyekeskixtijkaj. Nochi nejon semi amo kuali katka, porin komo kikuayaj kemej yeskia kinueyichiuaskiaj tiotsitsin oso auilnemiskiaj. ¿Uan axkan? Jiova kisentoka kineki maj tikpatiuitakan esti. Yejua ika, akin yekmelauj kichiuaj kemej Cristo amo kikuaj nion tayij esti.

13. ¿Keyej itatojtokakauan Cristo amo motaliliaj esti?

 ¹³ Itatojtokakauan Cristo no moneki amo motaliliskej esti. Jiova kijtoua maj amo tikuakan nion maj titayikan esti. Xikonnemili nejin: komo tapajtijkej mitsoniluiskia amo xiontayi tayil tein teuintij, ¿tionmotaliliskia itech motaluayo? Amo. No ijkon, keman Dios technauatia maj amo tikuakan nion maj titayikan esti, no kijtosneki ke amo timotaliliskej nion titemakaskej toesyo. (Xikonita tajtolmelaualis 28.)

14, 15. Maski tiitekitikauan Dios tikpatiuitaj tonemilis, ¿toni amo keman tikchiuaskej, uan keyej?

¹⁴ ¿Toni tikchiuaskej komo se tapajtijkej techiluia ke timomikiliskej komo amo techtaliliaj esti? Tisejsemej moneki tikixejekoskej ox tiktakamatiskej Jiova. Akin tikchiuaj kemej Cristo tikitaj tonemilis kemej se netetayokolil tein Dios techmaka uan semi tikpatiuitaj. Amo tiknekij timomikiliskej, yejua ika tiktemouaj okseki taman tapajtilis, sayoj ke amo tikauaj maj techtalilikan esti.

¹⁵ Nochipa timochikauaj tikajsiskej pajti tein techpaleuis. Sayoj ke, kemej esti kiixnextia tonemilis uan Dios semi kipatiuita, amo timotaliliaj esti. Maski timomikiliskej, tikitaj ke okachi moneki tiktakamatiskej itanauatiluan Jiova. Jesús kijtoj: “Nochi nekes ten kinekij [...] kimakixtiske yejuan san mismo ninnemilis, yejuan nojonkes nochi kipoloske ninnemilis. Uan nochi nekes ten kipoloske ninnemilis por nejua [...], yejuan nojonkes kajsiske ninnemilis” (Mateo 16:25). Tiknekij tiktakamatiskej Jiova porin tiktasojtaj. Uan no, yejuatsin kimati toni okachi techpaleuia. Ijkon kemej Jiova, semi tikpatiuitaj tonemilis (Hebreos 11:6).

16. ¿Keyej tikixtalijtokej tiktakamatiskej Dios?

¹⁶ Tiitekitikauan Dios senkis tikixtalijtokej tiktakamatiskej  tein yejuatsin technauatia. Yejua ika, amo tikuaskej nion titayiskej esti nion tikauaskej maj ika techpajtikan. * Sayoj ke kemaj tikseliskej okseki taman tapajtilis. Tikneltokaj ke Jiova kimati toni okachi techpaleuia porin yejuatsin techchijchiuak.

17. ¿Keniuj kikauaya Jiova maj kikuinij esti itech xolal Israel?

¹⁷ Itech tanauatil tein kiselij Moisés, Jiova kiniluij israelitas: “Inemilis tapial yetok itech iesyo, uan nejua niktalij esti itech altar maj kiixtsakua nanmotajtakoluan, porin esti yejua tein kiixtsakua tajtakol”, tein kijtosneki ke esti tapaleuia maj Dios techtapojpolui (Levítico 17:11). Keman israelitas kichiuayaj se tajtakol, ueliaj kitemouayaj maj Jiova kintapojpolui. Yejua ika yayaj templo kimakatij tiopixkat se tapial uan ijkon yejua kimiktiskia uan kimaktiliskia Jiova uan kitaliaya tepitsin esti itech altar. Sayoj ijkon kikauaya Jiova maj kikuinij esti ne uejkauj itech xolal Israel.

18. ¿Keniuj techpaleuia inemilis Jesús tein kitemakak?

¹⁸ Keman Jesús ualaj nikan taltikpak, kitemakak inemilis oso iesyo tein tapaleuiskia maj Dios techtapojpolui. Yejua ika, amo monekikok se kintemaktis tapialmej, kemej kinnauatijkaj israelitas (Mateo 20:28; Hebreos 10:1). Inemilis Jesús kipiaya miak ipatiuj, porin ijkon Jiova uelik kichiuak maj tinochin tikchiakan tinemiskej nochipaya (Juan 3:16; Hebreos 9:11, 12; 1 Pedro 1:18, 19).

19. ¿Toni moneki tikchiuaskej uan ijkon amo ‘totajtakol’ yeski maj sekin ixpoliuikan?

¹⁹ Semi tiktasojkamatiliaj Jiova porin techtayokolijtok  tonemilis. Yejua ika, tiknekij tikiniluiskej oksekin ke komo takuaujtamatij iuan Jesús, uelis nemiskej nochipaya. Kemej tikintasojtaj, timochikauaj tikinmachtiskej tein moneki kichiuaskej uan ijkon uelis nemiskej nochipaya (Ezequiel 3:17-21). Ijkon uelis tikijtoskej tein kijtoj tatitanil Pablo: “Amo nejua notajtakol ok komo senme de namejuan nanixpoliuij. Porin nejua namechyekajsikamatiltij ya xikseliani nochi ne tamachtilis ten Dios kimonekiltis xikpixtiyakan” (Hechos 20:26, 27). Keman tikinpaleuiaj oksekin maj kiixmatikan Jiova uan maj kimatikan ke yejuatsin semi kipatiuita tonemilis, tiknextiaj ke no tikpatiuitaj esti uan tonemilis uan ininnemilis oksekin.