1. ¿Katiyejua netataujtil ika titajtotij itech nejin tamachtilis?

MIAKEJ kiixmatij netataujtil padrenuestro. Ika nejin netataujtil, Jesús kinmachtij itatojtokakauan keniuj kitataujtiskej Dios. ¿Toni tajtanik Jesús itech nejin netataujtil? ¿Keyej moneki maj tikajsikamatikan tein kijtosneki nejin netataujtil?

2. ¿Toni eyi taman techmachtij Jesús maj titajtanikan keman timotataujtiskej?

² Jesús kijtoj: “Namejuan moneki nankichiuaskej netataujtil ijkuin: ‘ToTajtsin akin tiyetok iluikak, maj mochipaua motokay. Maj uiki moTekiuajyo. Maj mochiua motanejnekilis, ne iluikak uan no nikan taltikpak’” (Mateo 6:9, 10, TNM) (xikonixtajtolti Mateo 6:9-13). ¿Keyej techmachtij Jesús maj titajtanikan nejin eyi taman? (Xikonita tajtolmelaualis 19.)

3. Xikonmelaua toni tikitaskej itech nejin tamachtilis.

³ Timomachtijkejya ke Dios monotsa Jiova. No tikitakejya keniuj kiixtalijtok maj tinemikan uan tein kineki maj mochiua nikan taltikpak. Sayoj ke ¿toni kijtosnekik Jesús keman kijtoj: “Maj uiki moTekiuajyo”? Itech nejin tamachtilis tikitaskej toni iTekiuajyo Dios, toni kichiuas uan keniuj kichiuas maj mochipaua itokay Dios.

4. ¿Toni iTekiuajyo Dios, uan akoni Tekiuaj?

⁴ ITekiuajyo Dios se taixyekanalis tein Jiova kiixtalij ne iluikak. Dios kiixtalij Jesús kemej Tekiuaj itech nejon Tekiuajyot. Biblia kijtoua ke Jesús “tayekantinemi ipan nochi okseki tekome. Uan Cristo Yejuatsin in ueyi Tayekanke inpan nochi oksekin tayekanani” (Apocalipsis 17:14).  Jesús uelis okachi techpaleuis ke se tekiuaj nikan taltikpak. Uan no, kipia okachi tanauatil ke nochin tekiuanij akin moajsij nikan taltikpak.

5. ¿Akonimej kinixyekanas iTekiuajyo Dios, uan kani moajsi?

⁵ Jesús mokepak iluikak 40 tonalmej satepan ke Dios oksepa kimakak inemilis. Satepan, Jiova kimakak tanauatil kemej Tekiuaj itech iTekiuajyo (Hechos 2:33). ITekiuajyo Dios moajsi ompa iluikak uan kinixyekanas akin nemiskej nikan taltikpak (Apocalipsis 11:15). Yejua ika, Biblia kijtoua ke iTekiuajyo Dios se taixyekanalis tein moajsi “eluiyaktsinko” (2 Timoteo 4:18).

6, 7. ¿Keyej amo moajsi okse tekiuaj kemej Jesús?

⁶ Biblia kijtoua ke amo moajsi nion se tekiuaj akin okachi kuali taixyekana ke Jesús, porin sayoj yejua “amo keman kipias tamilis” (Romanos 6:9). Nochin tekiuanij momikiliaj, sayoj ke Jesús amo keman momikilis. Yejua ika, nochi tein kuali tein Jesús ika techpaleuis uejkauas nochipaya.

⁷ Uan no, Jesús yeski se Tekiuaj akin amo techichikouis uan teiknelis. Itech Biblia moijtojka: “Ichikaualis Jiova itech moajsis. Yejua ika yeski tamatkej, nochi kiajsikamatis, semi kuali tayolmajxitis, yeski chikauak, nochi kimatis uan kimoujkatokas Jiova”. Uan no moijtojka: “Amo tamelauas sayoj ika tein kiitas, nion taajuas sayoj ika tein kikakis. Amo kinchichikouis akin amo ueli mopaleuiaj keman kinmelauas” (Isaías 11:2-4). ¿Tikonuelitaskia maj mitsonixyekana nejin tekiuaj?

8. ¿Keniuj tikmatij ke Jesús amo tekiuajtis iselti?

⁸ Biblia kijtoua ke Dios kinixpejpenak seki takamej uan siuamej maj tekiuajtikan iuan Jesús. Kemej neskayot, tatitanil Pablo kiluij Timoteo: “Komo tejuan tikijyouijtiyoue  in ouijkayome [...,] se tonal titayekanatiue iuan in ueyi tayekanke Cristo” (2 Timoteo 2:12). ¿Kanachimej tekiuajtiskej iuan Jesús?

9. 1) ¿Kanachimej tekiuajtiskej iuan Jesús? 2) ¿Kemanian Jiova peuak kinixpejpena 144,000?

⁹ Kemej timomachtijkej itech tamachtilis 7, Dios kichiuak maj tatitanil Juan kiitani Jesús kemej Tekiuaj ompa iluikak iniuan okseki 144,000 tekiuanij (xikonixtajtolti Apocalipsis 14:1). ¿Akonimej nejon 144,000? Juan kitemaka tanankilil: “Yejuan nojonkes kitoktiliayaj Cristo ten tamati keme ichkatsin uan kiseuikayaj kampa yeski yaya”. Uan no kijtoj ke “Dios kinkouak [...] intsalan in taltikpakuani” (Apocalipsis 14:4). Ichkatsin yejua Jesús. Uan 144,000 yejuan akin amo keman kikaujkej Dios akin kinixpejpenak maj tekiuajtikan iuan Jesús “keme tayekanani reyes”. Keman momikiliaj, Dios oksepa kinmaka ininnemilis uan youij iluikak (Apocalipsis 5:10). Itech xiuit 33, Jiova peuak kinixpejpena nejon 144,000.

10. ¿Toni kinextij Jiova keman kiixtalij maj techixyekanakan Jesús uan 144,000, uan keyej?

¹⁰ Jiova semi techtasojta, yejua ika kiixtalij maj seki takamej uan siuamej tekiuajtikan iuan Jesús. Jesús yeski se kuali tekiuaj porin yejua no nemik nikan taltikpak uan semi tajyouij. Tatitanil Pablo kijtoj ke Jesús kimati keniuj timomachiliaj uan ueli kiajsikamati ke “uelis tikuetautiuetsiske” porin yejua “kixijxikojtiuala ya nochi tataman tajyouilisme [...] ijkon keme tejuan” (Hebreos 4:15; 5:8). Uan 144,000 no techajsikamatij porin no kipianij nepololmej uan no kokolispeuanij. Nejin techpaleuia maj tikmatikan ke Jesús uan 144,000 kiajsikamatiskej tein tikmachiliaj uan kuejmolmej tein tikpanouaj.

11. ¿Keyej Jesús kinmachtij itatojtokakauan maj tajtaninij maj mochiuani itanejnekilis Dios ompa iluikak?

¹¹ Jesús kinmachtij itatojtokakauan maj tajtaninij maj mochiua itanejnekilis Dios nikan taltikpak uan ne iluikak. ¿Keyej monekia tajtaniskej maj mochiuani itanejnekilis Dios ompa iluikak? Itech tamachtilis 3 timomachtijkej ke Satanás kiixnamikik Dios. Jiova kikauak maj Satanás uan ángeles akin amo tatakamatkej mokauanijok iluikak. Nejin ángeles no moixmatij kemej amokuali ejekamej. Yejua ika amo nochin akin nemiaj iluikak kichiuayaj itanejnekilis Dios. Itech tamachtilis 10 okachi timomachtiskej tein kichiuaj Satanás uan amokuali ejekamej.

12. ¿Toni ome taman moijtoua itech Apocalipsis 12:10 ke mochiuaskia?

¹² Biblia kijtojka ke tepitsin satepan ke Dios kimakaskia Jesús tanauatil kemej Tekiuaj itech iTekiuajyo, moteuiskia iuan Satanás (xikonixtajtolti Apocalipsis 12:7-10). Itech Apocalipsis 12:10 moijtoua ome taman tein semi moneki. Yekinika, ke Jesús peua tekiuajti. Uan ojpatika, ke kiualpantamotaj Satanás nikan taltikpak. Kemej tikitaskej, nejin ome taman mochiuakya.

13. ¿Toni panok ompa iluikak keman kikixtijkej Satanás?

¹³ Ángeles akin kitakamatij Dios semi yolpakkej keman kinkixtijkej Satanás uan iamokuali ejekauan. Biblia kijtoua: “Nankalyetoni de eluiyaktsinko, ximoueyiyolpaktijtinemikan” (Apocalipsis 12:12). Axkan amo akin kiixnamikiok Dios ompa iluikak uan kuali mouikaj porin nochin akin ompa nemij kichiuaj tein Dios kineki.

14. ¿Keniuj peuak tinemij keman kiualpantamotkej Satanás?

¹⁴ Sayoj ke semi taman kemej tinemij nikan taltikpak.  Semi titajyouiaj “porin ne amokuali Satanás ualpantemok” uan “mokualantijtinemi [...] porin kuali kimati ke amo kipia ok miak tonalme” (Apocalipsis 12:12). Satanás semi kualantok porin kikixtijkej ompa iluikak uan kimati ke amo uejkaua Dios kiixpolos. Yejua ika, kichiua maj semi titajyouikan uan maj semi tikpiakan kuejmolmej.

15. ¿Toni kineki Dios maj mochiua nikan taltikpak?

¹⁵ Sayoj ke amo mopatani tein Dios kineki maj mochiua nikan taltikpak. Yejuatsin kinekiok maj taltikpak mochiua se xochital uan maj amo titajtakolejkejok uan maj tinemikan nochipaya (Salmo 37:29). ¿Keniuj iTekiuajyo Dios kichiuas nochi nejin?

16, 17. ¿Toni techmachtia Daniel 2:44 ika iTekiuajyo Dios?

¹⁶ Daniel 2:44 kijtoua: “Itech inintonaluan nejon tekiuanij, Dios akin nemi iluikak kitalis se tekiuajyot tein amo keman kiixpoloskej nion panos imako okse xolal. Nejin tekiuajyot kinkuechos uan kinixpolos nochi nejon tekiuajyomej, uan sayoj yejua yetos nochipaya”. ¿Toni techmachtiaj nejin tajtolmej ika iTekiuajyo Dios?

¹⁷ Yekinika, techmachtia ke iTekiuajyo Dios peuaskia taixyekanaskia “itech inintonaluan nejon tekiuanij”. Nejin kijtosneki ke moajsiskiajok okseki tekiuajyomej itech taltikpak keman peuaskia taixyekanaskia iTekiuajyo Dios. Ojpatika, techmachtia ke iTekiuajyo Dios yetos nochipaya uan ke amo kiixpatas okse tekiuajyot. Uan expatika, techmachtia ke tekiuajyomej tein moajsij nikan taltikpak moteuiskej iuan iTekiuajyo Dios. ITekiuajyo Dios tatanis uan sayoj yejua taixyekanas itech nochi taltikpak. Keman mochiuas nejin tein moijtojka, techixyekanas tekiuajyot tein yekmelauj techpaleuis.

18. ¿Keniuj motokaytia neteuilis tein kipiaskej tekiuajyomej iuan iTekiuajyo Dios?

 ¹⁸ ¿Toni panos tepitsin achto ke moteuiskej tekiuajyomej tein moajsij nikan taltikpak iuan iTekiuajyo Dios? Amokuali ejekamej kinkajkayauaskej “nochi tataman tayekanani [...] para moteuiske ika guerra iuan Dios tech ne ueyi tonal”. Nejin ueyi neteuilis motokaytia Armagedón, uan ijkuak moteuiskej tekiuajyomej iuan iTekiuajyo Dios (Apocalipsis 16:14, 16). (Xikonita tajtolmelaualis 10.)

19, 20. ¿Keyej moneki maj taixyekana iTekiuajyo Dios?

¹⁹ ¿Keyej moneki maj taixyekana iTekiuajyo Dios? Maj tikitakan eyi taman. Yekinika, kemej titajtakolejkej, tikokolispeuaj uan timomikiliaj. Sayoj ke keman taixyekanas iTekiuajyo Dios tinemiskej nochipaya. Biblia kijtoua: “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa” (Juan 3:16).

²⁰ Ojpatika, porin semi miakej kichiuaj tein amo kuali. Miakej takajkayauaj uan auilnemij, uan tejuan amo ueli tikintsakuiliaj. Sayoj ke Jiova kemaj. Komo amo mopataj, yejuatsin kinixpolos itech Armagedón (xikonixtajtolti Salmo 37:10). Uan expatika, porin akin tekiuajtij semi amo yolkualmej, amo kitakamatij tanauatilmej uan amo ueli kiixpolouaj ininkuejmoluan taltikpakneminij. Uan no, amo kinekij kinpaleuiskej maj kitakamatikan Dios. Yejua ika Biblia kijtoua ke inintaixyekanalis sayoj kiualkui tajyouilis (Eclesiastés 8:9).

21. ¿Keniuj iTekiuajyo Dios tapaleuis maj mochiua tein Dios kineki itech taltikpak?

 ²¹ Satepan ke panos Armagedón, iTekiuajyo Dios tapaleuis maj mochiua tein Dios kineki nikan taltikpak. Kemej neskayot, Satanás uan iamokuali ejekauan kintsakuaskej mil xiujmej (Apocalipsis 20:1-3). Satepan, amo akin kokolispeuasok nion momikilisok. Ika inemilis Jesús tein kitemakak, nochin akin tatakamatiskej uelis nemiskej nochipaya itech Xochital (Apocalipsis 22:1-3). Uan no, iTekiuajyo Dios kichiuas maj mochipaua itokay. ¿Toni kijtosneki nejin? Ke keman iTekiuajyo Dios taixyekanasya itech nochi taltikpak, amo akinok amo kuali ika tajtos Dios. (Xikonita tajtolmelaualis 20.)

22. ¿Keniuj tikmatij ke Jesús amo peuak tekiuajti keman yetoya nikan taltikpak nion niman keman mokepak iluikak?

²² Keman Jesús yetoya nikan taltikpak kinmachtij itatojtokakauan maj tajtanikan itech netataujtil: “Maj uiki moTekiuajyo”. Nejin kijtosneki ke mochiuaskiaok. Achto, Jiova monekia kiixtalis nejon Tekiuajyot uan kiixtalis Jesús kemej Tekiuaj. ¿Kiixtalij niman keman mokepak iluikak? Amo. Jesús monekia mochias. Itech Salmo 110:1 Jiova kijtojka: “Ximoseui noyekmakopa hasta maj  nikintali akin mitstauelitaj kemej mometstapech”. Tepitsin satepan ke Dios oksepa kimakak Jesús inemilis, tatitanilmej Pedro uan Pablo kijtojkej ke Jesús kipanok nejon (Hechos 2:32-35; Hebreos 10:12, 13). Nejin kijtosneki ke Jesús monekia mochias hasta keman Jiova kiixtaliskia kemej Tekiuaj.

23. 1) ¿Kemanian peuak taixyekana Jesús itech iTekiuajyo Dios? 2) ¿Toni tikitaskej itech okse tamachtilis?

²³ ¿Kemanian peuak taixyekana Jesús? Itech xiuit 1914. Miak xiujmej achto, sekin akin yekmelauj kichiuayaj kemej Cristo kiajsikamatkej ke itech xiuit 1914 peuaskia mochiuaskia miak taman tein achto moijtojka itech Biblia. Tein peuak mochiua itech xiuit 1914 kinextij ke melauj tein kiajsikamatkaj. Jesús peuak taixyekana itech nejon xiuit (Salmo 110:2). Tepitsin satepan, Satanás kiualpantamotkej nikan taltikpak uan axkan “amo kipia ok miak tonalme” (Apocalipsis 12:12). Biblia kitokaytia nejin tonalmej kemej itamian tonalmej. Itech okse tamachtilis tikitaskej okachi taman tein kinextia ke yekmelauj tinemij itech nejon tonalmej. No timomachtiskej ke amo uejkaua iTekiuajyo Dios tapaleuis maj mochiua tein Dios kineki itech taltikpak. (Xikonita tajtolmelaualis 21.)