1-3. 1) ¿Toni timotajtaniaj keman momikilia se taltikpaknenkej? 2) ¿Toni kijtouaj itech seki taneltokalismej ke techpanoua keman timomikiliaj?

BIBLIA kijtoua ke ejkos tonal keman “amo aken momikilis ok” (Apocalipsis 21:4). Itech tamachtilis 5 timomachtijkej ke kemej Jesús kitemakak inemilis uelis tinemiskej nochipaya. Sayoj ke tiksentokaj timomikiliaj (Eclesiastés 9:5). Yejua ika, se taman tein okachi timotajtanianij yejua nejin: “¿Toni techpanoua keman timomikiliaj?”.

² Okachi tiknekij tikmatiskej itanankilil nejin netajtanil keman momikilia se tochankauj oso se akin kuali iuan timouikayaj. Xa timotajtaniaj: “¿Kani yetok? ¿Tajyouijtok? ¿Uelis tikpaleuiskej? ¿Uelis techpaleuis? ¿Oksepa tikitaskej?”.

³ Itech taneltokalismej tataman kemej kinankiliaj nejin netajtanilmej. Itech seki tamachtiaj ke akin yolkualmej youij iluikak uan akin amo yolkualmej youij kampa nochipaya tajyouijtoskej itech tit. Itech okseki kijtouaj ke keman timomikiliaj timochiuaj espíritus uan timoajsitij iniuan tochankauan akin momikilijkejya. Uan itech okseki tamachtiaj ke keman timomikiliaj oksepa tinemij sayoj ke itech okse taltikpaknenkej oso hasta itech se tapial.

4. ¿Toni tamachtiaj itech miak taneltokalismej?

⁴ Itech nochi taneltokalismej tataman tein kijtouaj ke techpanoua keman timomikiliaj. Sayoj ke itech miakej tamachtiaj sayoj se taman: ke keman timomikiliaj, teisa kisa totech tein kisentoka yoltok. ¿Melauj nejon?

5, 6. ¿Toni techpanoua keman timomikiliaj?

⁵ Jiova kimati tein techpanoua keman timomikiliaj. Yejuatsin techmachtia itech Biblia ke keman timomikiliaj tami tonemilis. Keman timomikiliaj amo titachiajok, amo titakakijok, amo titanemiliajok nion tikelnamikijok nion teyi. Amo tikpiaj teisa tein kisentoka yoltok okseko. *

⁶ Biblia kijtoua ke “akin momikilijkejya amo teyi kimatijok”. Yejua ika amo tetasojtajok nion tetauelitajok. Biblia no kijtoua ke “amo onkak tekit nion teisa tein monemilia mochiuas nion taixmatilis nion tamatilis itech Miketekoch” (xikonixtajtolti Eclesiastés 9:5, 6, 10). Uan Salmo 146:4 kijtoua ke keman momikilia se taltikpaknenkej no momikiliaj “itanemililuan”.

7. ¿Toni kijtoj Jesús keman ika tajtoj mikilis?

⁷ Keman Lázaro momikilij, Jesús kiniluij imomachtijkauan: “Totasojikniu Lázaro, yejua axkan kochtok”. Sayoj ke yejuan kinemilijkej ke yekmelauj moseuijtoya. Yejua ika Jesús kijtoj: “Lázaro miyik ya” (Juan 11:11-14). Jesús kiteajsikamatiltij ke keman se momikilia kemej yeskia sayoj se kochtok. Yejua amo kijtoj ke Lázaro yetoya iluikak oso iniuan ichankauan akin momikilijkajya. Amo no kijtoj ke Lázaro tajyouijtoya itech tit nion ke oksepa yolka itech okse taltikpaknenkej oso itech se tapial, ta Lázaro kemej yeskia kuali kochtoya. Okse tonal Jesús no kiteajsikamatiltij ke keman se momikilia kemej yeskia sayoj se kochtok. Keman  oksepa kimakak inemilis isiuapil Jairo, Jesús kijtoj: “Siuapiltsin amo miyik. Ta, sayo kochtok” (Lucas 8:52).

8. ¿Keniuj tikmatij ke Dios amo kiixtalijka maj timomikilikan?

⁸ ¿Kiixtalijka Dios maj timomikilikan? Amo. Jiova kinchijchiujka Adán uan Eva maj neminij nochipaya uan maj amo keman kokolispeuanij. Uan no, kinchijchiuak kemej kinekiskiaj nemiskej nochipaya (Eclesiastés 3:11). Tetatmej kintayokoltia kiitaskej ke ininkoneuan kokolispeuaj uan momikiliaj. No ijkon, toTajtsin Jiova kitayokoltia kiitas ke tikokolispeuaj uan timomikiliaj. Sayoj ke, komo Dios techchijchiuak maj tinemikan nochipaya, ¿keyej timomikiliaj?

9. ¿Keyej Adán uan Eva amo ouij kinkisaskia kitakamatiskej tanauatil tein Dios kinmakaka?

⁹ Itech xochital tein moajsia Edén, Jiova kiluij Adán: “Uelis tikuas nochi itakilo koujmej tein moajsij itech xochital hasta tiixuis. Sayoj ke amo xikua itakilo kouit tein kiixnextia taixmatilis ika tein kuali uan tein amo kuali, porin itech tonal keman tikuas, timomikilis” (Génesis 2:9, 16, 17). Nejon tanauatil niman moajsikamatia uan amo ouij katka. Uan kemej Jiova kinchijchiujka, kinamikia kiniluis toni kuali uan toni amo kuali. Komo Adán uan Eva kitakamatiskiaj Jiova, kinextiskiaj ke mokauayaj maj kinixyekana uan ke kitasojkamatiaj nochi tein yejuatsin kinmakaka.

10, 11. 1) ¿Keniuj Satanás kichiuak maj Adán uan Eva amo kitakamatinij Dios? 2) ¿Keyej semi amo kuali tein kichiujkej Adán uan Eva?

¹⁰ Sayoj ke Adán uan Eva amo tatakamatkej. Satanás kitajtanij Eva: “¿Yekmelauj namechiluij Dios amo xikuakan itakilo nochi koujmej tein moajsij itech xochital?”. Uan Eva kinankilij: “Uelis tikuaskej itakilo koujmej tein moajsij itech xochital. Sayoj ke, itakilo kouit tein moajsi tatajko itech xochital, Dios kijtoj: ‘Amo xikuakan; amo, amo xikmatokakan, porin nanmikiskej’” (Génesis 3:1-3).

¹¹ Ompa, Satanás kiluij Eva: “Amo nanmikiskej. Dios kimati ke itech tonal keman nankikuaskej nanixtajtapouiskej uan nanmochiuaskej kemej Dios: nankiixmatiskej tein kuali uan tein amo kuali” (Génesis 3:4-6). Satanás kinekia maj Eva kinemiliani ke iselti ueliskia kiixtalis tein kuali uan tein amo kuali. Uan no kikajkayauak porin kiluij ke amo momikiliskia komo amo kitakamatia Dios. Yejua ika Eva kikuaj nejon takilot. Satepan no kimakak inamik uan yejua no kikuaj. Adán uan Eva kimatiaj ke Jiova kiniluijka  maj amo kikuanij nejon takilot. Keman kikuajkej, amo kinekkej kitakamatiskej se tanauatil tein niman moajsikamatia uan tein taixejekol. Adán uan Eva kinextijkej ke amo kinekiaj maj kinixyekana ininTajtsin. ¡Semi amo kuali tein kichiujkej!

12. ¿Keyej semi kiyolkokoj Jiova tein kichiujkej Adán uan Eva?

¹² Tein kichiujkej Adán uan Eva semi kiyolkokoj Jiova. Yejuatsin katka ininTajtsin, uan yejuan kiixnamikkej. Xikonnemili ke tionmochikaua kuali tikoniskaltis mokoneuan, se okichpil uan se siuapil. Sayoj ke yejuan amo mitsontakamatij uan kichiuaj tein kinekij. ¿Melauj ke semi mitsonyolkokoskia?

13. ¿Toni kijtosnekia Jiova keman kiluij Adán ke oksepa mokepaskia talnex?

¹³ Kemej Adán uan Eva amo tatakamatkej, amo ueliskiajok nemiskej nochipaya. Jiova kiluij Adán: “Titalnex uan talnex timokepas” (xikonixtajtolti Génesis 3:19). Adán chijchiujtoya ika talnex, yejua ika Jiova kijtosnekia ke Adán oksepa mokepaskia talnex, kemej yeskia amo keman yolka (Génesis 2:7). Keman momikilij, senkis ixpoliuik.

14. ¿Keyej timomikiliaj?

¹⁴ Komo Adán uan Eva kitakamatiskiaj Dios, axkan yoltoskiajok. Sayoj ke, keman amo tatakamatkej, tajtakojkej uan satepan momikilijkej. Tajtakol kemej yeskia se ueyi kokolis oso kokoxkayot tein yejuan techpanoltilijkej.  Tinochin tiyolij titajtakolejkejya, yejua ika timomikiliaj (Romanos 5:12). Sayoj ke Jiova amo kiixtalijka maj timomikilikan (1 Corintios 15:26).

15. ¿Keniuj techpaleuia tikmatiskej tein yekmelauj techpanoua keman timomikiliaj?

¹⁵ Itech miak taneltokalismej tamachtiaj ke akin momikilijkejya kisentokaj nemij okseko uan ke tejuan uelis tikinpaleuiskej. Yejua ika, keman se taltikpaknenkej momikilia, kemansa ichankauan kintaxtauiaj akin taixyekanaj itech taneltokalis maj ika motataujtikan oso maj kichiuilikan se misa. Sayoj ke Biblia tamachtia ke mikemej amo tajyouijtokej nion motayokoltijtokej. Tejuan amo ueli tikinnojnotsaj nion tikinpaleuiaj. Yejuan amo no ueli technojnotsaj, amo ueli techpaleuiaj nion techchiuiliaj tein amo kuali. Yejua ika moneki amo tikinmouiliskej. Tikmatiskej tein yekmelauj techpanoua keman timomikiliaj techpaleuia maj amo tikneltokakan nochi nejon takajkayaualis.

16. ¿Toni takajkayaualis tamachtiaj itech miak taneltokalismej?

¹⁶ Ika taneltokalismej tein amo melaujkej, Satanás kineki techkajkayauas uan kitemoua maj tiknemilikan ke mikemej yoltokejok. Kemej neskayot, itech seki taneltokalismej tamachtiaj ke tikpiaj teisa tein kisentoka yoltok satepan ke timomikiliaj. ¿Yejua nejon tein tamachtiaj itech motaneltokalis, oso tamachtiaj tein kijtoua Biblia? Ika nejin takajkayaualis uan oksekiok, Satanás kitemoua kichiuas maj amo tikixmatikan Dios.

17. ¿Keyej kitakajkayauiliaj Jiova keman tamachtiaj ke akin amo yolkualmej nochipaya tatatoskej?

¹⁷ Itech miak taneltokalismej kitakajkayauiliaj Jiova  ika tein kijtouaj ke techpanoua keman timomikiliaj. Kemej neskayot, itech seki tamachtiaj ke akin amo yolkualmej nochipaya tatatoskej. Sayoj ke nejon amo melauj. ¡Jiova amo keman ijkon tetajyouiltiskia! (Xikonixtajtolti 1 Juan 4:8.) ¿Keniuj tikonitaskia se takat akin kimatajtatia ikonetsin porin amo tatakamati? Xa tikonnemiliskia ke semi amo yolkuali uan amo tikonnekiskia tionmouikas iuan. Satanás kineki maj tiknemilikan ke Jiova tetajyouiltia.

18. ¿Keyej moneki amo tikinmouiliskej mikemej?

¹⁸ Itech seki taneltokalismej tamachtiaj ke keman timomikiliaj timokepaj espíritus. No kijtouaj ke moneki amo tikinkualantiskej uan ke hasta moneki tikinmouiliskej nejon espíritus, porin uelis techpaleuiskej oso semi techtajyouiltiskej. Kemej miakej kineltokaj nejin takajkayaualis, kinmouiliaj mikemej. Yejua ika kinueyichiuaj yejuan uan amo Jiova. Sayoj ke xikonelnamiki ke mikemej amo teyi kimachiliaj uan amo teyi ueli kichiuaj. Yejua ika, maj amo tikinmouilikan. Jiova yejua akin techchijchiuak uan yejua yekmelauj Dios. Sayoj yejuatsin moneki tikueyichiuaskej (Apocalipsis 4:11).

19. ¿Keniuj techpaleuia tikmatiskej tein techpanoua keman timomikiliaj?

¹⁹ Tikmatiskej tein techpanoua keman timomikiliaj techpaleuia maj amo tikneltokakan takajkayaualis tein tamachtiaj itech miak taneltokalismej. No techpaleuia maj tikneltokakan ke yekmelauj mochiuas tein Dios kiixtalijtok.

20. ¿Toni netajtanil tiknankiliskej itech okse tamachtilis?

²⁰ Ne uejkauj, se itekitikauj Dios akin monotsaya Job tajtanik: “Komo se taltikpaknenkej momikilia, ¿uelis oksepa nemis?” (Job 14:14). Itech okse tamachtilis tikitaskej kualtsin tanankilil tein kitemaka Biblia.