Tein ika peua
“Xikinnejneuililtilikan de keniu ne oksekin taneltokani chipaukanentinemij. Porin yejuan takuautamatinemij uan kiyolikaxikojtinemij nochi tataman tajyouilis para ijkon kiselijtiyoue nochi tatiochiualisme tenika Dios moyektenkauka.” (HEBREOS 6:12)
1, 2. ¿Keniuj kinitaya se tokniuj takalpanojkej taltikpakneminij akin ininka tajtoua Biblia, uan keyej tel kualtsin yeskia komo tikinpiaskiaj kemej totasojikniuan?
“ININKA tajtoua taltikpakneminij akin ixnesij itech Biblia kemej yeskia itasojikniuan akin uejkaujya iniuan mouika.” Yejua nejin kijtoj se tokniuj siuat satepan ke kikakik itanojnots se tokniuj takalpanojkej akin xiuejya. Uan melauak tein kijtouaya, ta tokniuj miak xiujmejya momachtijtoya Biblia uan tamachtijtoya, yejua ika takamej uan siuamej akin ininka tajtoua ompa kemej yeskia kinitaya ke yoltoyaj uan kemej yeskia mochiujkaj itasojikniuan.
2 ¿Melauj ke kualtsin yeskia komo taltikpakneminij akin ininka tajtoua Biblia yeskiaj totasojikniuan? ¿Tikonita tejuatsin kemej yeskia motasojikniuan? Xionmonemili keniuj tionmomachiliskia komo ueliskia iniuan tiontajtos, iniuan tionyetos uan okachi tikonixmatis itekitikauan Dios kemej Noé, Abrahán, Rut, Elías uan Ester. ¿Keniuj mitsonpaleuiskiaj itech monemilis? ¡Xionmonemili keniuj tel kuali mitsonyolmajxitiskiaj uan mitsonyolchikauaskiaj! (Xikonixtajtolti Proverbios 13:20.)
3. 1) ¿Keniuj uelis techtelpaleuiskej takamej uan siuamej akin kinextijkej takuaujtamatilis akin ininka motajtoua itech Biblia? 2) ¿Toni netajtanilmej tiknankilitij?
3 Keman akin yolmelaujkej moajokuiskej, uelis tiyolpakiskej porin iniuan tiyetoskej uan kuali timouikaskej (Hech. 24:15). Sayoj ke axkan, takamej uan siuamej akin kinextijkej takuaujtamatilis akin ininka motajtoua itech Biblia uelis techtelpaleuiskej. ¿Keniuj? Tatitanil Pablo techiluia toni moneki tikchiuaskej: “Xikinnejneuililtilikan de keniu ne oksekin taneltokani chipaukanentinemij. Porin yejuan takuautamatinemij uan kiyolikaxikojtinemij nochi tataman tajyouilis para ijkon kiselijtiyoue nochi tatiochiualisme tenika Dios moyektenkauka” (Heb. 6:12). Achto ke peuas timomachtiskej keniuj kinextijkej takuaujtamatilis nejin takamej uan siuamej, maj tiknankilikan seki netajtanilmej tein kisaj ika tein kijtoj Pablo: ¿Toni takuaujtamatilis, uan keyej moneki tikpiaskej? ¿Keniuj uelis tiktojtokaskej ininneskayo itekitikauan Dios akin nenkej ne uejkauj uan amo keman kikaujkej?
¿Toni takuaujtamatilis, uan keyej moneki tikpiaskej?
4. ¿Toni kinemiliaj miakej taltikpakneminij ke kijtosneki takuaujtamatilis, uan keyej mopolojtokej?
4 Takuaujtamatilis se tel kualtsin kualneskayot tein nochin taltikpakneminij akin ininka titajtotij itech nejin amatajkuilol kitelpatiuitakej. Sayoj ke axkan, miakej taltikpakneminij amo kiajsikamatij toni yekmelauj takuaujtamatilis. Kinemiliaj ke kijtosneki se kineltokas nochi. Sayoj ke ¿yekmelauj ijkon? Amo, takuaujtamatilis tein melauak amo tikpiaj sayoj porin tikmatkej teisa uan techyolpaktij oso porin tepitsin tikixmatij Dios. Nejon uelis techkajkayauas, porin tein tikmachiliaj nochipa mopapatatok. Uan amo no sayoj moneki tikneltokaskej ke nemi Dios, porin Biblia kijtoua ke hasta “amokuali ejekame kineltokaj de ke ongak sayo se Dios. Ika ya nojon yejuan moukauiuiyokaj” (Sant. 2:19).
5, 6. 1) ¿Toni ome taman tein amo ueli tikitaj mouika iuan takuaujtamatilis? 2) ¿Toni neskayot kinextia ke totakuaujtamatilis moneki yeski chikauak?
5 Takuaujtamatilis tein melauak amo kijtosneki sayoj se kineltokas teisa. Maj tikitakan keniuj kimelaua Biblia nejin kualneskayot (xikonixtajtolti Hebreos 11:1). Pablo kijtoj ke onkak ome taman tein amo ueli tikitaj tein mouika iuan takuaujtamatilis. Se taman, yejua tein onkak sayoj ke “ayamo tikitstinemij”: tejuan amo ueli tikitaj tein onkak ne iluikak, kemej Jiova, iKonetsin uan iTekiuajyo tein taixyekantokya ompa. Uan okse taman, takuaujtamatilis mouika ika “nochi ne ten axkan tikyolikachixtokke”: tein ayamo mochiua. Kemej neskayot, amo ueli tikitaj yankuik taltikpak tein iTekiuajyo Dios amo uejkaua kiualkuis. Sayoj ke ¿kijtosneki nejon ke amo teyi techmatiltia ke yekmelauj onkak tein tikneltokaj uan ke amo mochiuas tein tikchiaj?
6 Amo. Tatitanil techmelauilia ke onkak tein kichiua maj yekmelauj titakuaujtamatikan. Keman kijtoj ke keman titakuaujtamatij “timoyekmatiltiaj” ke nochi tein tikchiaj mochiuas, kikuik se tajtol tein no ueli mokepa kemej “talamat” oso se amat kampa ixnesi ke moaxka se teisa. Xionmonemili ke aksa kineki mitsontayokolis se kali. Xa mitsonmakas amat tein kinextia ke moaxka nejon kali uan mitsoniluis: “Nikan yetok mochan”. Moyekita ke amo kineki xikonnemili ke tionnemiti itech se amat, sayoj ke nejon amat kinextia ke axkan nejon kali moaxka, uelis tikijtoskej ke kemej yeskia yejua kali. No ijkon, takuaujtamatilis techmatiltia ke nochi tein Dios motenkaua itech iTajtol mochiuas.
7. ¿Toni kijtosneki yekmelauj takuaujtamatilis?
7 Yejua ika, takuaujtamatilis tein melauak kijtosneki se kiyekneltokas uan senkis se takuaujtamatis iuan Jiova. Nejon takuaujtamatilis kichiua maj tikitakan Dios kemej toPopaj akin techtasojta uan maj titakuaujtamatikan ke kichiuas nochi tein motenkaua. Sayoj ke, amo moneki sayoj nejon. Ijkon kemej nochi tein yoltok moneki motamakas, takuaujtamatilis moneki tikchikauaskej oso kemej yeskia tiktamakaskej. Moneki tiknextiskej ika tein tikchiuaj, porin komo amo, uelis poliuis oso kemej yeskia mikis (Sant. 2:26).
8. ¿Keyej motelneki titakuaujtamatiskej?
8 ¿Keyej motelneki titakuaujtamatiskej? Tatitanil Pablo kitemaka se kuali tanankilil (xikonixtajtolti Hebreos 11:6). Komo amo titakuaujtamatij amo uelis timotokiskej iuan Jiova nion tikyolpaktiskej. Yejua ika, motelneki titakuaujtamatiskej uan ijkon uelis tikchiuaskej tein okachi kuali: timotokiskej iuan Jiova, toTajtsin akin moajsi iluikak, uan tikueyitaliskej.
9. ¿Keniuj kinextiani Jiova ke kimati ke motelneki titakuaujtamatiskej?
9 Jiova kimati ke motelneki titakuaujtamatiskej, uan yejua ika techmakani ininneskayo taltikpakneminij uan ijkon uelis techmachtis keniuj tikpiaskej uan tiknextiskej. Se taman, tikpiaj ininneskayo tokniuan akin taixyekanaj itech nechikol. Yejua ika Biblia techyolmajxitia: “No ijkon [...] xitakuautamatiyakan” (Heb. 13:7). Okse taman, Pablo no ininka tajtoj “uel miakke taneltokani”, nejin yejuan itekitikauan Dios akin nenkej ne uejkauj akin kinextijkej tel ueyi takuaujtamatilis (Heb. 12:1). Yejua ininka tajtoj sekin itech Hebreos capítulo 11, sayoj ke moajsij tel miakejok. Itech Biblia moajsi ininneskayo tel miakej takamej uan siuamej akin tataman xiuit kipiayaj uan tataman tein kipanokej. Semi techpaleuis komo tikitaj ininneskayo, porin itech nejin tonalmej taltikpakneminij amo semi takuaujtamatij.
¿Keniuj uelis titakuaujtamatiskej kemej yejuan?
10. ¿Keniuj uelis techpaleuis nemachtil tein tikpiaskej toselti maj titakuaujtamatikan kemej takamej uan siuamej akin ininka motajtoua itech Biblia?
10 Amo uelis tiktojtokaskej ineskayo aksa komo amo achto kuali tikitaj tein kichiua. Yejua ika, keman mochijchiuak nejin amatajkuilol monekik mochiuas miak nemachtil uan ijkon tejuatsin kemej yeskia uelis tikonitas takamej uan siuamej akin ompa ininka motajtoua. Kuali yeskia komo okachi tikontemoua tamachtilis kampa okachi kimelaua tein tikonixtajtoltis. Keman tionmomachtis moselti, timitsonyoleuaj xikontekitilti amaixmej tein tikonpias. Uan no, xikonnemili tein tikonixtajtoltia, xikontemo tikonitas kani moajsiaj taltikpakneminij uan toni panotoya itech sejse tamachtilis. Xikonnemili ke ompa tionyetok, ke ueli tikonita tein kualtsin tein onkak, ueli tikonijnekui tein ajuiyaxtok uan tikonkaki tein mochiujtok. Uan tein okachi moneki, xikontemo tikonajsikamatis tein kimachiliaj taltikpakneminij uan toni kinemiliaj. Komo ueli tikonchiua nejin, tikonitas kemej yeskia yoltokej itekitikauan Dios akin nenkej ne uejkauj. ¡Kemej tel kuali tikonixmatis, tikonitas kemej yeskia motasojikniuan akin uejkaujya iniuan tionmouika!
11, 12. 1) ¿Keniuj uelis tikmachiliskej ke okachi kuali tikinixmatij Abrahán uan Sara? 2) ¿Keniuj uelis techpaleuis ininneskayo Ana, Elías uan Samuel?
11 Keman kuali tikonixmatis nejin itekitikauan Dios, okachi tikonnekis tikonchiuas kemej yejuan. Kemej neskayot, xionmonemili ke itech inechikol Jiova mitsonyoleuaj xiontapaleuiti itech okse nechikol kampa monekij okachi tanojnotsanij uan ijkon okachi tikontekitilis Dios, oso mitsoniluiaj xiontanojnotsa kemej amo keman tikonchiuani oso tein ouij mitsonkisa. Keman tikonnemilis ox tikonselis nejon tekit uan tikontataujtis Jiova, tikyekmatij ke komo tiontanemilia itech ineskayo Abrahán, mitsonpaleuis kuali xiontaixejeko. Yejua uan Sara kiixtalijkej kikauaskej nochi tein kuali tein kipiayaj Ur, uan yejua ika kiselijkej tel miak tatiochiualismej. Keman tikonchiuas kemej yejuan, tikonmachilis ke axkan okachi kuali tikonixmati.
12 Okse taman, xikonnemili ke aksa akin kuali iuan tionmouika mitsonchiuilij teisa tein amo kuali, uan nejon kichiua tel amo kuali xionmomachili uan hasta amo tikonnekiok tionyas nechikolmej. Komo ijkon mitsonpanoua, xa mitsonpaleuis komo tiontanemilia itech ineskayo Ana, akin Peniná kichiuiliaya miak taman tein amo kuali, sayoj ke amo kikauak maj nejon kitsakuiliani maj amo kiueyichiuaniok Jiova. Ineskayo mitsonpaleuis kuali xiontaixpejpena, uan no tikonitas Ana kemej se moteltasojikniuj. No ijkon, komo peua tikonnemilia ke tein tikonchiujtok sayoj nenkaj, uelis mitsonpaleuis tein kipanok Elías keman tikonixtajtoltis ouijkayomej tein kijyouij uan keniuj Jiova kiyolseuij. Uan telpochmej uan ichpochmej akin kipanouaj ouijkayomej porin akin iniuan momachtiaj auilnemij uan kinchikaujkauiaj maj no ijkon kichiuakan, uelis kiitaskej ineskayo Samuel. Maski ikoneuan Elí kichiuayaj tein amo kuali itech tabernáculo, yejua amo kichiuak ijkon kemej yejuan.
13. Komo tiknextiaj takuaujtamatilis kemej kinextijkej itekitikauan Dios ne uejkauj, ¿kijtosneki ke totakuaujtamatilis amo semi kipia ipatiuj iixpan Jiova? Xikonmelaua motanankilil.
13 Komo tiknextiaj takuaujtamatilis kemej kinextijkej itekitikauan Dios ne uejkauj, ¿kijtosneki ke sayoj tikchiujtokej ijkon kemej yejuan uan ke totakuaujtamatilis amo semi kipia ipatiuj iixpan Jiova? Amo, ta yejua iTajtol Dios techyolchikaua maj tiktojtokakan ininneskayo nejin takamej uan siuamej (1 Cor. 4:16; 11:1; 2 Tes. 3:7, 9). Uan no, sekin taltikpakneminij akin ininka titajtotij itech nejin amatajkuilol kichiujkej ijkon kemej oksekin itekitikauan Dios akin nenkej achto ke yejuan. Kemej neskayot, itech tamachtilis 17 tikitaskej ke María kijtoj seki tanemililmej tein Ana kijtojka itech se netataujtil, tein kinextia ke kiitaya kemej se kuali neskayot. ¿Kichiuaya nejon maj itakuaujtamatilis María amo semi kipiani ipatiuj? Amo. Ineskayo Ana kipaleuij María maj okachi takuaujtamati iuan Jiova uan maj no kuali yeto iixpan.
14, 15. ¿Toni seki taman kipia nejin amatajkuilol, uan keniuj uelis okachi techpaleuis?
14 Nejin amatajkuilol mochijchiuak maj techpaleui maj mochikaua totakuaujtamatilis. Seki taman tein kipia, mokixtij itech tamachtilis “Kikaujkej neskayot ika takuaujtamatilis” itech amaix Tanejmachtijkej. Sayoj ke no kipia okseki taman. Netajtanilmej techpaleuis maj tikitakan tein techmachtia uan keniuj uelis techpaleuis itech tonemilis. Okse taman, mochijchiuak sayoj itech nejin amatajkuilol miak taixkopimej tein kualtsin chijchiujtok uan kualtsitsin tapal kipia, uan moyektalij oso mopatauak miak taixkopimej tein ipa yetoyajya. Uan no, nejin amatajkuilol kipia okseki taman tein techpaleuis, kemej kampa kinextia kemanian mochiuak uan ome mapa. Amatajkuilol Kikaujkej neskayot ika takuaujtamatilis uelis timomachtiskej toselti uan itech nechikol. No ijkon, kalyetouanij uelis kintelpaleuis komo mosenmachtiaj. Miakej kalyetouanij kintelyolpaktis keman kiixtajtoltiskej ika tajtol chikauak.
15 Tikyekmatij ke nejin amatajkuilol techpaleuis maj tiktojtokakan tel kuali neskayot tein kikaujkej itekitikauan Dios akin nenkej ne uejkauj. Keman tikixtajtoltiskej, totakuaujtamatilis mochikauas uan no okachi timotokiskej iuan toTajtsin akin moajsi iluikak, Jiova.
