ITECH Biblia moajsi sayoj seki textos kampa se ángel kitokaytiaj Miguel. Sayoj ke nochipa ixnesi kichiujtok teisa. Itech amaix Daniel, ixnesi moteuijtok iuan ángeles tein amo yolkualmej; itech iamaix Judas, motajtolteuijtok iuan Amokuali, uan itech amaix Apocalipsis, moteuijtok iuan Satanás uan iamokuali ejekauan. Nesi ke nochipa kipaleuia itayekanalis Jiova kemej Ueyi Tekiuaj, uan moteuia iniuan akin kitauelitaj Dios. Ijkon, tekiti kemej kijtosneki itokay “¿Akoni Kemej Dios?”. Axkan, ¿akoni Miguel?

Yekinika, maj tikelnamikikan ke sekin amo sayoj se tokayit kipiaj. Se neskayot, Jacob akin katka ininpopaj se ueyi kalyetouanij, no moixmatik kemej Israel, uan tatitanil Pedro, kemej Simón (Génesis 49:1, 2; Mateo 10:2). No ijkon, Biblia kinextia ke Miguel, yejua okse tokayit tein ipa ika moixmati Jesucristo, kemej achtopa keman ualaskia nikan taltikpak uan satepan keman oksepa yajki iluikak. Maj tikitakan seki textos itech Biblia tein techuika maj ijkon tikijtokan.

Tayekankej ángel. ITajtol Dios kiteixmatiltia Miguel kemej “tayekanke den ángeles” (Judas 9). Itech Biblia, tajtol “tayekanke ángel” amo keman kijtosneki miakej, ta nochipa sayoj se. Nejin kinextia ke sayoj moajsi se ángel akin kipia nejon tanauatil. Uan no, Jesús ixnesi ke kichiujtok tekit kemej tayekankej ángel. Ijkon tikitaj itech 1 Tesalonicenses 4:16, kampa kijtoua tein kichiuaskia Jesucristo akin oksepa kipiak nemilis: “Kuak Totekotsin moualuikas de ne eluiyaktsinko, ijkuakon Yejuatsin tachikaukanauatis ika ne tanauatil den tayekanke ángel”. Nikan kijtoua ke Jesús tajtos ika tanauatil kemej tayekankej ángel. Nejin techajsikamatiltia ke tayekankej ángel Miguel, yejua Jesús.

Inintayekankauj tateuianij. Biblia kinextia ke “Miguel, [...] iuan iángelikniuan kiteuiayaj ne amokuali [...] iuan itekitikaikniuan” (Apocalipsis 12:7). Moyekita ke Miguel kinixyekana se oloch tateuianij ángeles akin amo kikauaj Dios. Amaix Apocalipsis no kiteixmatiltia Jesús kemej akin kinixyekana se oloch tateuianij ángeles akin amo kikauaj Dios (Apocalipsis 19:14- 16). Uan tatitanil Pablo ika tajtoua “Totekotsin Jesucristo” uan “itakeualuan ángeles ten [...] chikauke” (2 Tesalonicenses 1:7). Kemej tikitaj, Biblia ika tajtoua kemej Miguel uan ‘iángeluan’ uan Jesús uan ‘iángeluan’ (Mateo 13:41; 16:27; 24:31; 1 Pedro 3:22). Itech iTajtol Dios amo kijtoua maj moajsikan ome oloch tateuianij ángeles akin amo kikauaj Dios, se maj kinixyekana Miguel uan okse Jesús. Ika nochi tein tikitakejya, techuika maj tikijtokan ke Miguel yejua Jesucristo akin tekititok kemej Tekiuaj ne iluikak. *