1, 2. ¿Keyej moneki tikitaskej netataujtil kemej se tatiochiualis, uan keyej moneki tikitaskej toni tamachtia Biblia kemej moneki se kichiuas netataujtil?

KOMO tein onkak iluikak tiktamachiuaj iuan taltikpak, nejin moita tel tsitsikitsin. Tein melauj, Jiova akin ‘kichijchiuak iluikak uan taltikpak’, kinita altepemej kemej se tachalan at itech se atakuiloni (Hechos 14:15; Isaías 40:15). Maski ijkon, Biblia kijtoua ke “Jiova amo moajsi uejka iniuan nochin akin kinotsaj, nochin akin kinotsaj ika melaujkayot”, uan kichiuas “inintanejnekilis akin kimoujkatokaj, uan kinkakis keman kitsajtsiliskej maj kinpaleui” (Salmo 145:18, 19). Xionmonemili tein kijtosneki nejin tajtolmej. Tachijchiujkej akin kipia nochi uelilis amo yetok uejka, uan techkakis komo ‘tiknotsaj ika melaujkayot’. ¡Se ueyi tatiochiualis maj tiuelikan tikchiuakan netataujtil iuan Dios!

² Axkan, komo tiknekij maj Jiova techkaki, moneki tikchiuaskej tonetataujtil kemej yejuatsin kineki. ¿Keniuj uelis tikmatiskej? Moneki tikitaskej toni tamachtia  Biblia kemej moneki se kichiuas netataujtil. Uan motelneki, ta ika nejon uelis timotokiskej iuan Jiova.

3. Xikonijto se taman keyej motelneki tikchiuaskej netataujtil iuan Jiova.

³ Yekinika, porin Jiova techyoleua maj tikchiuakan. ITajtol kijtoua: ‘Amo teyi ika ximoyolkuejmolokan. Ta, nochipa ximoteixpantikan iixpantsinko Totajtsin Dios ika namonetatataujtilis uan xiktasojkamatilikan. Uan no xiktajtanikan nochi ten namechpoloa. Uan namechtayokolijtiyas ne yolseuilis ten kachi kuika uelilis hasta amo uelis se kajsikamatis ok keniuj. Uan yejua kinyekantinemis namoyolojuan uan namotamachilisuan’ (Filipenses 4:6, 7). Amo tiknekij tikixtopeuaskej se tayoleualis, tein ika miak pakilis techchiuilia tel Ueyi Tekiuaj itech iluikak uan taltikpak.

4. ¿Keyej tikonijtoskia tejuatsin komo mojmostaj tikchiuaj netataujtil okachi kuali timouikaj iuan Jiova?

⁴ Uan okse taman, komo mojmostaj tikchiuaj netataujtil okachi kuali timouikaj iuan Jiova. Akin kuali tasojiknimej amo monojnotsaj sayoj keman kinpoloua teisa, ta keman yeski, porin moitaj se iuan okse toni kinpanoua. Okachi kuali mouikaj, ijkon kemej motapouiaj tein kinemiliaj, tein kintekipachoua uan tein kimachiliaj. No ijkon mochiua iuan Jiova. Ika inepaleuil nejin amaix, tejuatsin tikonmatikya miak taman tein tamachtia Biblia akoni Jiova, ikualneskayouan uan itanejnekilis. Axkan tikonita Dios kemej aksa akin yekmelauj nemi. Uan itech netataujtil, uelis tikontapouis toTajtsin akin nemi iluikak, nochi tein tikonnemilia uan tein tikonmachilia. Uan ijkon okachi tionmotokis iuan (Santiago 4:8).

5. ¿Keniuj tikmatij ke Jiova amo kikaki nochi netataujtilmej?

⁵ ¿Kikaki Jiova nochi netataujtilmej? Xikonita tein kiniluij israelitas taixnamikinij akin nemiaj itech itonaluan tanauatijkej Isaías: “Maski nankichiuaskej miak netataujtilmej, amo namechkaki; ta nanmomauan kitoyaujtokej tel miak esti” (Isaías 1:15). Kemaj, komo timonejnemiltiaj kemej Dios amo kiyolpaktia, amo kikakis tonetataujtiluan. Sayoj kikakis komo tikchiuaj seki taman tein motelneki.

6. Komo tiknekij maj Dios kikaki tonetataujtiluan, ¿toni motelneki maj tikpiakan, uan keniuj tiknextiaj?

⁶ Yekinika, moneki tikpiaskej takuaujtamatilis (xikonixtajtolti Marcos 11:24). Tatitanil Pablo kijkuiloj: “Komo se aksa amo takuautamatinemis iuan Dios, ijkuakon amo uelis kiyolpaktijtinemis Dios. Porin komo se yejua kineki se motokitiu iuan Dios, ijkuakon moneki ma kiyekneltoka ke ongak se Dios uan [...] kinpaleuis nekes ten kiyoltemoske” (Hebreos 11:6). Tikpiaskej yekmelauj takuaujtamatilis, amo sayoj kijtosneki maj tikneltokakan  ke nemi Dios uan kinankilia netataujtilmej, ta monextia ika tachiualismej. Ika tein tikchiuaj mojmostaj moneki nesis ke tikpiaj takuaujtamatilis (Santiago 2:26).

7. 1) ¿Keyej moneki titajtoskej ika poujkaitalis iuan Jiova itech netataujtil? 2) Keman tikchiuaskej netataujtil, ¿keniuj tiknextiskej ke tikchiuaj ika yolyemanilis uan tein tikijtouaj kisa itech toyolo?

⁷ Uan no, Jiova techtajtania maj tikchiuakan netataujtil ika yolyemanilis uan maj kisa itech toyolo. Tein melauj, moajsi miak taman keyej moneki tiknojnotsaskej Dios ika yolyemanilis. Keman se taltikpaknenkej kemansa ueli tajtoua iuan se tekiuaj, kichiua ika poujkaitalis, ta kimati ke kipia se ueyi tanauatil. Axkan, Jiova kinamiki maj tiknojnotsakan ika okachi poujkaitalis (Salmo 138:6). Kemaj, ta yejuatsin “Dios akin kipia nochiuelilis” (Génesis 17:1). Kemej tiknojnotsaskej, moneki nesis ke tikitaj tel ueyichiujkej uan tejuan amo. Nejon yolyemanilis no techolinis maj tikijtokan itech netataujtil tein kisas itech toyolo, uan amo sayoj tikekeptoskej tein tikmattoskej (Mateo 6:7, 8).

8. ¿Keniuj uelis tikchiuaskej ijkon kemej titajtanij itech tonetataujtiluan?

⁸ Okse taman tein moneki tikchiuaskej uan ijkon techkakis Dios, moneki maj timochikauakan tikchiuaskej ijkon kemej titajtanij. Komo tiktajtaniaj Jiova maj techmaka “axkan totaxkaltsin ten techpoloa”, moneki titekitiskej chikauak itech tein yeski tekit tein tikajsiskej uan komo ueli tikchiuaj (Mateo 6:11; 2 Tesalonicenses 3:10). No ijkon, komo tiktataujtiaj maj techpaleui maj senkis tikauakan se tajtakol, moneki maj amo timoajsikan kampa uelis techuikas maj titajtakokan (Colosenses 3:5). Uan no, amo sayoj moneki tikmatiskej tein motelneki tikchiuaskej uan ijkon Dios kikakis tonetataujtiluan, ta moajsi seki netajtanilmej ika netataujtil tein moneki tikmatiskej itanankililuan.

9. ¿Akoni iuan moneki timotataujtiskej, uan akoni itokaykopa?

⁹ ¿Akoni moneki tiktataujtiskej? Jesús kinnextilij imomachtijkauan maj kichiuakan netataujtil ijkon: ‘Toueyitajtsin ten tiyetok iluikak’ (Mateo 6:9). Kemej tikitaj, moneki tikchiuaskej netataujtil sayoj iuan Jiova Dios. Uan no, kineki maj amo tikixpanauikan ueyi tanauatil tein kipia iyoj Konetsin, Jesucristo. Kemej tikitakej itech capítulo 5, Jiova kiualtitanik Jesús nikan taltikpak maj motemakaki kemej se taxtauil, tein ika techmakixtiskia itech tajtakol uan mikilis (Juan 3:16; Romanos 5:12). No kimakak tanauatil kemej Tayekankej Tiopixkat uan Tamelaujkej (Juan 5:22; Hebreos 6:20). Yejua ika, Biblia techiluia maj tikchiuakan netataujtil itokaykopa Jesús. Yejua kijtoj: “Nejuatsin ya keme niyeskia niojtsin [...,] uan namechnojnotsas sayo ika ten melau. Uan sayo Nejuatsin nitemakas nemilis. Ika ya nojon amo aken uelis kajsis Notajtsin Dios komo amo Nejuatsin nikyekantiyas” (Juan 14:6). Komo tiknekij maj Jiova kikaki tonetataujtiluan, moneki tikchiuaskej sayoj iuan Jiova uan itokaykopa iKonetsin.

10. ¿Keyej amo moneki maj sayoj se taman tiyetokan keman tikchiuaskej netataujtil?

¹⁰ ¿Nochipa sayoj se taman moneki tiyetoskej? Amo. Jiova amo techiluia keniuj maj tiyetokan tejuan nion no tomauan. Biblia kinextia ke moajsi miak taman keniuj uelis tiyetoskej keman tikchiuaskej netataujtil. Uelis se tokotsyetos, ixpilkatos, tankuaijkatos oso se ijkatos (1 Crónicas 17:16; Nehemías 8:6; Daniel 6:10). Tein okachi moneki, amo maj timoajsikan kampa uelis techitaskej, ta tein tikijtoskej maj kisa itech toyolo. Kemej tikitaj, uelis tikchiuaskej netataujtil itech toyolosaj uan kampa yeski, uelis tikchiuaskej itech totekiuj uan keman  tikpanouaj teisa tein amo momattoya. Xa amo akin kiitas ox tikchiujtokej netataujtil, sayoj ke Jiova kemaj kikaki (Nehemías 2:1-6).

11. ¿Toni tein tejuan techpoloua uelis titajtaniskej itech tonetataujtiluan?

¹¹ ¿Toni uelis titajtaniskej itech tonetataujtiluan? Biblia tanankilia: ‘Komo tiktajtaniaj Dios teisa ijkon kemej yejuatsin itanejnekilis, ijkuakon Totajtsin Dios [Jiova] techkakilia’ (1 Juan 5:14). Kemaj, uelis tiktajtaniskej Dios tein yeski tein mouika iuan itanejnekilis. Maj tikitakan seki taman. ¿Kineki Dios maj tiktapouikan tein techtekipachoua? ¡Kemaj! Tikchiuaskej netataujtil iuan Jiova kemej yeskia titajtoskiaj iuan se toteltasojikniuj. Uelis ‘tiktapouiliskej toyolo’, tein kijtosneki, tikiluiskej nochi tein tikmachiliaj (Salmo 62:8). No semi kuali maj tiktajtanikan maj techpaleui ika iyektikatsin espíritu maj tikchiuakan tein kuali (Lucas 11:13). Uan no, uelis tiktataujtiskej maj techpaleui maj kuali tiknemilikan tein tikchiuaskej, uan maj techmaka chikaualis tein ika tikxikoskej ouijkayomej (Santiago 1:5). Keman titajtakoskej, moneki tiktataujtiskej maj techtapojpolui, sayoj ke moneki tikneltokaskej inemilis Cristo tein kitemakak (Efesios 1:3, 7). Uan no, keman tikchiuaskej netataujtil, maj amo sayoj tejuan timotatajtanilikan, ta no oksekin, kemej tochankauan oso oksekin tokniuan akin kichiuaj kemej Cristo (Hechos 12:5; Colosenses 4:12).

12. ¿Keniuj uelis tiktayekanaltiskej itech tonetataujtiluan nochi taman tein mouika iuan toTajtsin akin nemi iluikak?

¹² Itech tonetataujtiluan moneki tiktayekanaltiskej nochi taman tein mouika iuan Jiova Dios. Moajsi tel miak taman keyej moneki tikueyitaliskej Dios, uan ika nochi toyolo tiktasojkamatiliskej ueyi kualtakayot tein technextilia (1 Crónicas 29:10-13). Itech netataujtil kemej se neskayot tein Jesús kitemakak, technextilia maj  titajtanikan maj moueyitali itokay Dios, oso maj mopoujkaita. Ompa, motajtani maj uiki iTekiuajyo Dios, uan maj mochiua itanejnekilis kemej iluikak no ijkon taltikpak. Tikitaj ke Jesús achto tajtanik nochi tein mouika iuan Jiova, uan satepan tein techpoloua. Komo no ijkon tiktayekanaltiaj tein mouika iuan Dios itech tonetataujtiluan, tiknextiskej ke amo tiknekij maj sayoj tejuan kuali tiyetokan (Mateo 6:9-13, TNM).

13. ¿Toni techiluia Biblia tein kinextia kanachi uelis tiuejkauaskej itech tonetataujtiluan?

¹³ ¿Kanachi moneki uejkauas tonetataujtiluan? Biblia amo kijtoua kanachi uelis uejkauas tonetataujtiluan tein tikchiuaskej toselti oso iniuan oksekin. Uelis yeski sayoj se ome eyi tajtolmej, kemej ijkuak titakuatij, oso tiuejkauaskej, kemej ijkuak timoajsij toselti uan nochi tiktapouiaj Jiova (1 Samuel 1:12, 15). Tein kemaj, Jesús kinextij ke amo kuali tein kichiuayaj takamej akin tel uejkauayaj kichiuayaj ininnetataujtil, uan sayoj kinekiaj maj kinitakan (Lucas 20:46, 47). Nejon amo kiuelita Jiova, ta motelneki maj kisa itech toyolo. Yejua ika, tein techpolos uan kemej timoajsiskej, yejua kichiuas maj tiuejkauakan itech tonetataujtiluan oso maj ijsiujka.

14. Xikonijto toni kijtosneki tajtol tein kijtoua Biblia “ximotatatautilijtokan”, uan toni tatiochiualis tikpiaj.

¹⁴ ¿Kanachpa moneki tikchiuaskej netataujtil? Biblia techiluia: “Ximotatatautilijtokan”, ‘xiksentokakan ximotatataujtilikan iuan Dios’ uan ‘ximotatataujtilikan iuan Dios youalintonal’ (Mateo 26:41; Romanos 12:12; 1 Tesalonicenses 5:17). Nejin amo kijtosneki yekmelauj tikchiujtoskej netataujtil youal uan tonal. Ta kijtosneki mojmostaj moneki tikchiuaskej, uan ijkon tiktasojkamatiliskej kualtakayot tein technextilia, uan tiktajtaniskej maj techojtokalti, maj techyolseui uan maj techyolchikaua. ¡Se ueyi tatiochiualis! Jiova techkaua maj  tikchiuakan netataujtil iuan, nochipa keman tiknekiskej uan kemej tiknekiskej tiuejkauaskej. Komo tikitaj se tatiochiualis titajtoskej iuan toTajtsin akin nemi iluikak, amo tikauaskej maj pano nion se tonal.

15. ¿Keyej moneki tikijtoskej “ma ijkon mochiua” keman tami se netataujtil, tiyetoskej toselti oso iniuan oksekin?

¹⁵ ¿Keyej moneki tikijtoskej “amén” keman tami se netataujtil? Nejin tajtol kijtosneki “ma ijkon mochiua”. Itech Biblia, moajsij neskayomej tein technextilia ke moneki tikijtoskej “amén” oso “ma ijkon mochiua” keman tikchiuaskej netataujtil toselti oso iniuan oksekin (1 Crónicas 16:36; Judas 24, 25). Keman tikijtouaj “ma ijkon mochiua” keman tiyetokej toselti, tiknextiaj ke totajtoluan kisak itech toyolo. Uan iniuan oksekin (keman tikijtouaj chikauak oso sayoj itech toyolo), tiknextiaj ke tiknekij maj mochiua ijkon kemej moijtoj (1 Corintios 14:16, TNM).

16. ¿Itech toni uelis titakuaujtamatiskej keman tikchiuaj netataujtil iuan Dios?

¹⁶ ¿Yekmelauj kinankilia Jiova tonetataujtiluan? ¡Kemaj! Moajsi miak taman keyej uelis titakuaujtamatiskej ke Dios ‘akin kikaki netataujtil’, kinankilia netataujtilmej tein timiakej tikchiuaj ika nochi toyolo (Salmo 65:2). Uan kikui miak taman keman technankilia.

17. ¿Keyej uelis tikijtoskej ke Dios kinkui ángeles uan taltikpakneminij keman technankilia tonetataujtiluan?

¹⁷ Se taman, keman Jiova kinankilia netataujtilmej, kinkui iángeluan uan itekitikauan akin nemij taltikpak (Hebreos 1:13, 14). Miakej akin kichiuaj netataujtil iuan Dios kampa kitajtaniaj maj kinpaleui maj kiajsikamatikan Biblia, niman kinkalpanoua se itekitikauj Jiova. Nejin kinextia ke ángeles kiixyekanaj tanojnotsalis ika  iTekiuajyo Dios (Apocalipsis 14:6). Axkan, keman techpolojtok teisa uan tiktajtaniaj Jiova, ¿keniuj technankilia? Yejuatsin kiolinia okse itekitikauj maj techpaleui (Proverbios 12:25; Santiago 2:16).

18. ¿Keniuj kikui Jiova iyektikatsin espíritu uan iTajtol keman kinankilia ininnetataujtiluan itekitikauan?

¹⁸ Jiova Dios no kikui iyektikatsin espíritu uan iTajtol, Biblia, keman kinnankilia ininnetataujtiluan itekitikauan. Keman tiktajtaniaj maj techpaleui itech se kuejmol,  uelis techojtokaltis uan techyolchikauas ika iyektikatsin espíritu (2 Corintios 4:7). Uan keman tiktajtaniaj maj techpaleui maj kuali tiknemilikan tein tikchiuaskej, kemansa kikui Biblia keman technankilia. Xa tikajsiskej tajtolmej tein techpaleuis, keman timomachtiskej Biblia oso tikixtajtoltiskej amaixmej kemej nejin, tein mokixtiaj itech Biblia. Keman tiyouij ininnechikoluan akin kichiuaj kemej Cristo, oso keman techyolmajxitia se tayekankej itech kalnechikol akin toka motekipachoua, xa techelnamiktiskej itayolmajxitilis Biblia tein moneki tikitaskej (Gálatas 6:1).

19. ¿Toni moneki tikelnamikiskej komo kemansa tikmachiliaj ke Dios amo kinankilia tonetataujtiluan?

¹⁹ Kemansa xa tikmachiliskej ke Jiova amo niman kinankilia tonetataujtiluan, maski nejon amo kijtosneki ke amo ueli kinankilia. Maj tikelnamikikan, Jiova technankilis kemej kiitas uan ijkuak kiitas okachi kuali. Yejuatsin okachi kuali kimati ke tejuan tein techpoloua, uan kimati kemanian uelisya tikpiaskej. Kemansa kikaua maj tiksentokakan ‘titajtanikan’, ‘tiktemokan’ uan ‘tinaltakakalatsakan’ (Lucas 11:5-10). Komo ijkon tikchiuaj, tiknextiskej ke tiktelnekij uan yekmelauj tikpiaj takuaujtamatilis. Uan no, Jiova xa technankilis kemej  tejuan amo tikitaskej. Se neskayot, komo tikpiaj se ouijkayot uan tikchiuaj netataujtil iuan, xa amo techijkuanilis, ta sayoj techmakas chikaualis maj titaxikokan (xikonixtajtolti 2 Timoteo 4:17).

20. Kemej tikpiaj nejon tatiochiualis, ¿keyej moneki maj nochipa tikchiuakan netataujtil?

²⁰ Semi tiktasojkamatiliaj Dios, akin kichijchiuak nochi tein onkak, maj amo uejka moajsi touan akin tiknotsaj keman tikchiuaj netataujtil kemej kineki (xikonixtajtolti Salmo 145:18). Kemej tikpiaj nejon tatiochiualis, maj nochipa tikchiuakan netataujtil. Komo ijkon tikchiuaj, tiyolpakiskej tikmatiskej ke okachi uelis timotokiskej iuan Jiova, akin kikaki netataujtil.