1, 2. ¿Toni tataman tachiualismej techtajyouiltia, uan toni netajtanilmej miakej mochiuiliaj?

ITECH se ueyi altepet kampa onkatoya neteuilismej, mochiuak se ueyi neteuilis kampa momikilijkej tel miakej siuamej uan konemej. Nochin nejin kinsenpachojkej itech se ueyi taltekoch tein kiyoualoltijkej kolotsitsin uan itech nochi ijkuiliujtoya: “¿Keyej?”. Yejua nejon netajtanil tein okachi kichiuaj akin kipanouaj se ueyi tayokol kemej nejin. Ijkon tajtanij ika tayokol keman se tachiualis tein tel amo kuali, se neteuilis, se tachiualis ika eliuisyot oso se kokolis, kinmiktia ininchankauan, kiuejueloua ininchan oso kinualkuilia okseki taman tajyouilis. Kinekij kimatiskej keyej kinpanoua nejon tein tel amo kuali.

² ¿Keyej kikaua Jiova Dios maj onka tajyouilis? Komo kipia nochi uelilis, tetasojtakej, tamatkej uan yolmelauak, ¿keyej onkak netauelitalis uan tein amo melauak nikan taltikpak? ¿kemansa tionmochiuiliani nejin netajtanilmej?

3, 4. 1) ¿Toni neskayot techmachtia ke kuali maj se tajtani keyej kikaua Dios maj onka tajyouilis? 2) ¿Keniuj kiita Jiova nochi tein amo kuali uan tajyouilis?

 ³ ¿Kuali maj se tajtani keyej kikaua Dios maj onka tajyouilis? Sekin kinemiliaj komo tajtanij kinextiaj ke amo takuaujtamatij iuan Dios oso amo kipoujkaitaj. Sayoj ke, keman tikonixtajtoltis Biblia, tikonitas ke miakej itekitikauan Dios akin amo kikaujkej kichiujkej netajtanilmej kemej nejin. Se neskayot, tanauatijkej Habacuc kitajtanij Jiova: “¿Keyej tinechitaltia tein teijtakoua uan sayoj tikita tajyouilis? ¿Uan keyej onkak teikamauiltilis uan eliuisyot noixpan, uan keyej motajtolteuiaj uan keyej moteuiaj?” (Habacuc 1:3).

⁴ ¿Kiajuak Jiova tanauatijkej Habacuc akin yolmelauak, keman kichiuak nejon netajtanil? Amo. Ta okachi kuali, kichiuak maj no moijkuilouani itech Biblia nejon tajtolmej tein kisak itech iyolo. Uan no, kipaleuij maj okachi kiajsikamatini nejon, uan maj okachi mochikauani itakuaujtamatilis. Jiova no ijkon kineki kichiuas mouan. Xikonelnamiki, Biblia tamachtia ke yejuatsin kinejneki ‘techyekpixtinemis [oso toka motekipachoua]’ (1 Pedro 5:7). Maski taltikpaknenkej kitauelita tein amo kuali uan tajyouilis tein kiixualtia nejin, Dios okachi kitauelita (Isaías 55:8, 9). Komo ijkon, ¿keyej tel onkak tajyouilis nikan taltikpak?

5. ¿Toni tanankiliaj tamachtianij oso tayekananij itech taneltokalis keman kimelauaj keyej titajyouiaj, sayoj ke toni tamachtia Biblia?

⁵ Miakej akin pouij itech tataman taneltokalismej, kintajtaniaj inintayekankauan oso inintamachtijkauan keyej titeltajyouiaj. Uan yejuan nochipa tanankiliaj  ke Dios ijkon kinekik, uan miak xiujmej achtoya kiixtalij nochi tein mochiuati, yeski kuali oso tein tel amo kuali. Miakej kiniluiaj ke iojuan Dios amo ueli se kimelaua, oso Dios kinuika iluikak taltikpakneminij ijkon kemej konemej maj nemitij iuan. Sayoj ke, kemej timomachtijkejya, Jiova amo keman kiixualtia nion teyi tein amo kuali. Biblia kijtoua: “¡Nion ueli tiknemiliaj maj Dios akin melauak kichiua tein tel amo kuali, uan akin kipia nochi uelilis maj kichiua tein amo melauak!” (Job 34:10).

6. ¿Keyej miakej kitajtakoltiaj Dios nochi tajyouilis tein onkak nikan taltikpak?

⁶ ¿Tikonmati keyej miakej kitajtakoltiaj Dios nochi tajyouilis tein tikpanouaj? Tein okachi kinuika maj ijkon kijtokan, porin kinemiliaj ke Dios akin kipia nochi uelilis kinixyekantok taltikpakneminij. Amo kiixmatij se tamachtilis melauak tein tamachtia Biblia uan amo ouij, sayoj ke motelneki. Uan nejon tikitakej itech capítulo 3 nejin amaix, kampa kijtoua ke akin yekmelauj taixyekana yejua Satanás.

7, 8. 1) ¿Keniuj no ijkon monejnemiltiaj taltikpakneminij kemej inintaixyekankauj? 2) ¿Keyej kiualkui tajyouilis taltikpak tajtakolis ijkon kemej “tonal uan tachiualis tein amo momattok”?

 ⁷ Biblia kiyekijtoua: “Nochi in taltikpakuani kinyekana ok yejua in amokuali Satanás” (1 Juan 5:19). ¿Melauj ke nejin kimelaua nochi? Taltikpakneminij no ijkon monejnemiltiaj kemej espíritu akin “kinkajkayautinemi nochi in taltikpakuani” (Apocalipsis 12:9). Satanás takajkayaua, tetauelita uan tetajyouiltia. Yejua ika nochin akin moajsij imaixko, no takajkayauaj, tetauelitaj uan tetajyouiltiaj. Yejua nejon yekinika taman keyej onkak miak tajyouilis.

⁸ Ojpatika, kemej tikitakej itech capítulo 3, ijkuak yekinika takat taixnamikik itech xochital tein moajsia Edén uan satepan, nochin taltikpakneminij tajtakolejkej uan tajtakolchiuaj. Yejua ika kinejnekij kipiaskej ueyi tanauatil uan mochikauaj kipiaskej, uan nejon kiualkui neteuilis, tachikaujkauilis uan tajyouilis (Eclesiastés 4:1; 8:9). Expatika taman keyej titajyouiaj, yejua tein Biblia kitokaytia “tonal uan tachiualis tein amo momattok” (xikonixtajtolti Eclesiastés 9:11). Kemej taltikpakneminij amo kinixyekana Jiova, amo kipiaj inepaleuil. Yejua ika uelis moajsiskej kansaika kampa uelis mochiuas teisa tein amo momattok.

9. ¿Keyej uelis senkis tikneltokaskej, ke Jiova kipia se taman tein motelneki yejua ika kikaujtok maj onka tajyouilis?

⁹ Semi techyolseuia tikmatiskej ke Dios amo kiixualtia tajyouilis. Amo itajtakol maj mochiua neteuilismej, temiktilis, tachikaujkauilis nion no tetsaujmej tein techualkuiliaj tajyouilis. Sayoj ke techpoloua maj tiknankilikan netajtanil keyej kikaua Jiova maj onka nochi nejon tajyouilis. Komo yejuatsin kipia nochi  uelilis, amo tiomeyolouaj ke uelis kijkuanis. Komo ijkon, ¿keyej amo kichiua? Kemej tikixmatkejya Jiova uan tikitakejya ke se Dios tetasojtakej, senkis tikneltokaj ke kipia se taman tein motelneki yejua ika kikaujtok (1 Juan 4:8).

10. ¿Toni ika taomeyolotij Satanás uan keniuj kichiuak?

¹⁰ Tein techpaleuis maj tikmatikan keyej kikaua Dios maj onka tajyouilis, oksepa tikelnamikitij keman peuak nochi kuejmolmej. Keman Satanás uelik kichiuak maj Adán uan Eva amo kitakamatinij Jiova, mochiuak se ueyi kuejmol. Satanás amo taomeyolotij ox kipia uelilis Jiova, ta kimatia ke amo akin kitanilia. Tein kemaj, taomeyolotij ox kinamiki maj taixyekana. Keman Amokuali kiyekijtoj ke Dios se takajkayaujkej uan kintsakuiltilia tein kuali nochin akin kinixyekana, kijtouilijtoya ke se tel amo kuali tekiuaj (xikonixtajtolti Génesis 3:2-5). Uan no kiteajsikamatiltijtoya ke taltikpakneminij okachi kuali nemiskiaj komo amo kinixyekana Dios. Ika nejon, kiixnamikik iueyitayekanalis Jiova, oso itayekanalis tein kinamiki.

11. ¿Keyej Jiova amo kinixpoloj taixnamikinij itech xochital tein moajsia Edén?

¹¹ Keman Adán uan Eva kinekepilijkej Jiova, kemej yeskia kijtojkej: ‘Amo moneki maj Dios techixyekana. Toselti uelis tikixejekoskej toni kuali uan toni amo kuali’. ¿Keniuj kimelauaskia Jiova nejon kuejmol? ¿Keniuj kinnextiliskia nochin ángeles uan taltikpakneminij, ke tein kijtouayaj taixnamikinij amo melauak, uan nochi tein Dios kichiua yejua tein okachi kuali? Sekin kinemiliaj ke Dios monekia kinixpolos  taixnamikinij uan maj kichijchiuani okse takat uan okse siuat. Sayoj ke yejuatsin kijtojkaya ke itanejnekilis katka maj mochiuani se xochital nikan taltikpak uan maj pexonikan ika ininkoneuan Adán uan Eva (Génesis 1:28). Uan Jiova nochipa kichiua tein motenkaua (Isaías 55:10, 11). Uan no, komo kinixpoloskia taixnamikinij itech xochital tein moajsia Edén, amo momelauaskia kuejmol keman taomeyolotijkej ox Dios kinamiki maj taixyekana.

12, 13. ¿Ika toni neskayot uelis tikmelauaskej keyej Jiova kikaujtok maj Satanás kinixyekana taltikpakneminij uan no maj sayoj yejuan moixyekanakan?

¹² Maj tiktalikan se neskayot. Se tamachtijkej kinmelauilijtok akin kinmachtia keniuj uelis kichiuaskej seki cuentas tein tel ouij. Sayoj ke, se momachtijkej tel tamattok sayoj ke taixnamikkej, kiyekijtoua ke kemej yejua tamachtijtok amo kuali yetok, uan ijkon kiteajsikamatiltia ke amo kuali tamachtia. Momachtijkej kijtoua ke yejua kimati okse taman tein okachi kuali  keniuj kimelauas. Sekin imomachtijkaikniuan kinemiliaj ke melauak tein kijtoua uan no taixnamikij. ¿Toni monekia kichiuas tamachtijkej? Ueliskia kinkixtis momachtianij taixnamikinij itech kaltamachtiloyan. Sayoj ke, ¿toni kinemiliskiaj oksekin? Xa kinemiliskiaj ke ininmomachtijkaikniuj uan akin kipaleuijkej, melauak tein kijtouaj. Uan xa amo kipoujkaitaskiajok tamachtijkej uan kinemiliskiaj moui maj kiitakan ke yekmelauj mopolojtok. Axkan maj tikijtokan ke tamachtijkej kikaua maj nejon momachtijkej taixnamikkej, kinnextili oksekin keniuj yejua kimelauaskia kuejmol.

¹³ Jiova no ijkon kichiujtok kemej tamachtijkej. Xikonelnamiki, akin taixnamikkej itech xochital tein moajsia Edén, amo sayoj yejuan ompa moajsiaj itech kuejmol. Tel miakej ángeles kiitakej tein mochiuak (Job 38:7; Daniel 7:10). Kemej Jiova kimelauaskia taixnamikilis kinpaleuiskia oso kinijtakoskia nejon ángeles, uan satepan, nochin oksekin taltikpakneminij. Yejua ika ¿toni kichiujtok Jiova? Kikaujtok maj Satanás kinexti keniuj taixyekanaskia. Uan no kinkaujtok maj taltikpakneminij sayoj yejuan moixyekanakan uan maj moajsikan imaixko Satanás.

14. ¿Keniuj tapaleuia maj Jiova kiixejekouani kinkauas taltikpakneminij maj moixyekanakan ininselti?

¹⁴ Tamachtijkej tein achto ika titajtojkej, kimati ke momachtijkej uan akin kipaleuijkej amo melauak tein kijtouaj. Sayoj ke no kimati komo kinkaua maj kiyejyekokan kimelauaskej kuejmol kemej yejuan kinemiliaj okachi kuali, nochin momachtianij kinpaleuis. Keman moitas ke taixnamikinij mopolojtokej, momachtianij yolmelaujkej kimatiskej ke sayoj tamachtijkej senkis  kimati keniuj tamachtis. Uan no, kiajsikamatiskej keyej satepan kinkixtia momachtianij taixnamikinij itech kaltamachtiloyan. No ijkon, Jiova kimati ke nochin ángeles uan taltikpakneminij yolmelaujkej, kinpaleuis keman kiitaskej ke Satanás uan okseki ángeles taixnamikinij amo melauak tein kijtouaj, uan taltikpakneminij amo uelij moixyekanaj ininselti . Kiajsikamatiskej nejin tanemilil tein melauak tein kijtoj tanauatijkej Jeremías: “Nejua kuali nikmati, Jiova, ke taltikpaknenkej amo iaxka iojtokalis. Amo iaxka taltikpaknenkej akin nejnentok nion kiyekanas itaksalis” (Jeremías 10:23).

15, 16. 1) ¿Keyej kikaua Jiova maj tel uejkaua tajyouilis? 2) ¿Keyej amo kitsakuilia maj amo mochiua uejueyi temiktilis uan okseki taman tein tel amo kuali?

¹⁵ Axkan, ¿keyej kikaua Jiova maj tel uejkaua tajyouilis? ¿Uan keyej amo kitsakuilia maj amo mochiua tein amo kuali? Maj titanemilikan itech ome taman tein tamachtijkej amo kichiuaskia. Yekinika, amo kitsakuiliskia momachtijkej taixnamikkej maj kinexti keniuj kimelauaskia kuejmol, uan ojpatika, amo kipaleuiskia maj kimelaua kuejmol. No ijkon, moajsi ome taman tein Jiova kinemilij amo kichiuas. Yekinika, kikaua maj Amokuali uan akin motalijkej itechkopa maj kiyejyekokan kinextiskej ke melauak tein kijtouaj. Sayoj ke moneki kikauas maj pano seki xiujmej. Itech nochi xiujmej tein kiuikaj nentokej taltikpakneminij, kitalijkejya miak tataman tekiuajyomej, uan motelmachtianij kichijchiujtokej okachi kuali pajti, okachi yankuik teposmej uan okseki tamanok. Sayoj ke, kisentoka okachi onkak tein amo melauak, tatasojtilis,  amo kuali tachiualismej uan neteuilismej. Senkis moita ke taltikpak tekiuajyomej amo kiualkuitokej tein kuali.

¹⁶ Ojpatika, Jiova amo kipaleuia Satanás maj taixyekana. Komo Dios kitsakuiliskia maj amo mochiua uejueyi temiktilis uan okseki taman tein tel amo kuali, ¿melauj ke kinpaleuijtoskia taixnamikinij? ¿Melauj ke timonemiliskiaj ke kemaj ueli timoixyekanaj uan amo teyi techpanoua tein amo kuali? Komo Jiova ijkon kichiuaskia, no takajkayaujtoskia. Uan tein melauj “Dios amo tekajkayaua” (Tito 1:2).

17, 18. ¿Toni kichiuati Jiova ika nochi tein kijtakojkejya taltikpak tekiuajyomej uan itaixyekanalis Satanás?

¹⁷ Axkan, ¿toni uelis tikijtoskej ika taijtakolis tein kiualkuitok taixnamikilis iuan Dios itech nochi xiujmej? Maj tikelnamikikan ke Jiova kipia nochi uelilis. Uan ika nejon, uelis kiyektalis nochi tein moijtakojya, uan ijkon kichiuati. Kemej timomachtijkejya, taltikpak tein axkan kijtakojtokej moyektalis uan mochiuas se xochital. Akin kineltokaj inemilis Jesús tein kitemakak, Dios kinijkuanilis nochi tein tajtakol kinualkuilia. Uan neajokuilis kijkuanis tayokol tein techualkuilia keman aksa momikilia. Ijkon, Dios kichiuas maj Jesús ‘kinuejuelo in chikaualismej den amokuali’ (1 Juan 3:8). Jiova kichiuas nochi nejin keman kiitas  ke okachi kuali. Moneki maj techyolpakti ke Jiova amo achtoya tachipauak, ta kemej yejuatsin semi moijyouijtok, tejuan tiuelij timomachtiaj tein melauak uan ueli tiktekitiliaj (xikonixtajtolti 2 Pedro 3:9, 10). Uan axkan, Dios kintemojtok akin yekmelauj kinekij kiueyichiuaskej, uan kinpaleuia maj kixikokan tajyouilis tein kiualkui kuejmolmej (Juan 4:23; 1 Corintios 10:13).

¹⁸ Sekin kinemiliaj ke nochi nejin tajyouilis, amo onkaskia komo Dios kinchijchiuaskia Adán uan Eva kemej maj amo uelinij taixnamikinij. Tein techpaleuis maj tikmatikan keyej amo ijkon kichiuak, maj tikelnamikikan se netetayokolil tel kualtsin tein Jiova techmakatok.

19. ¿Toni netetayokolil techmakatok Jiova uan keyej moneki tikitaskej ke tel kualtsin?

¹⁹ Kemej tikitakej itech capítulo 5, Dios techchijchiuak maj tejuan tikixpejpenakan toni tikchiuaskej. ¿Tikonita keyej tel kualtsin nejin netetayokolil? Dios no kinchijchiuak tel miakej tapialmej, sayoj ke yejuan moojtokaltiaj sayoj kemej kinchijchiuak (Proverbios 30:24). Uan taltikpakneminij no kinchijchiuaj teposmej tein tekitij sayoj kemej chijchiujtokej. ¿Tiyolpakiskiaj komo Dios no ijkon techchijchiuaskia? ¿Melauj ke amo? Yejua ika semi techpaktia maj tiuelikan tikixpejpenakan keniuj tiknekij maj techixmatikan, keniuj timonejnemiltiskej uan akonimej tiknekij maj mochiuakan totasojikniuan. Tejuan semi techpaktia maj tiuelikan tikixpejpenakan toni tikchiuaskej, uan Dios ijkon kineki.

20, 21. ¿Keniuj uelis tikuiskej netetayokolil tein Jiova techmakatok, maj tejuan tikixpejpenakan toni tikchiuaskej kemej okachi kuali techyas, uan keyej moneki tiknejnekiskej nejon?

 ²⁰ Jiova amo kineki maj tikmachilikan ke aksa techchikaujkauia uan yejua ika tiktekitiliaj (2 Corintios 9:7). ¿Toni okachi kiuelita se tepopaj oso se temomaj? Maj kijto konet “Tasojkamatik miak” porin kichikaujkauiaj oso porin kisa itech iyolo. Yejua ika, netajtanil tein moneki tionmochiuilis yejua nejin: “¿Keniuj nikuis nejua tein Jiova nechmakatok maj niueli nikixpejpena toni nikchiuas?”. Satanás, Adán uan Eva tel amo kuali kikuikej, ta kiixnamikkej Jiova. Uan tejuatsin, ¿toni tikonchiuas?

²¹ Uelis tikonkuis nejon tel kualtsin netetayokolil, kemej okachi kuali mitsonpaleuis. Uelis tionpouis iniuan tel miakej akin motalijtokej itechkopa Jiova. Yejuan kitelyolpaktiaj Dios porin kinextiaj ke Satanás se takajkayaujkej uan se tel amo kuali taixyekankej (Proverbios 27:11). Tejuatsin no ijkon uelis tikonchiuas komo tikonixpejpena okachi kuali nemilis. Itech okse capítulo kimelauas katiyejua nejin.