1, 2. Xikonijto kemej akonimej Jiova kinitak kemej iteltasojikniuan.

¿AKONI tikonixpejpenaskia tejuatsin kemej motasojikniuj? Xa tikontemoskia aksa akin chipaujkanemi, akin kiyoltilana tein tejuatsin mitsonyoltilana, uan akin kiita teisa kemej tejuatsin tikonita. Uan no tikonixpejpenaskia aksa akin kipia kualneskayomej, kemej maj yolmelauak uan kualtakat.

² Itech xiujmej tein kiuikaj nentokej taltikpakneminij, Dios kinixpejpenak sekin maj mochiuakan iteltasojikniuan. Tikajsij kemej Abrahán akin kitokaytij itasojikniuj (xikonixtajtolti Isaías 41:8; Santiago 2:23, TNM). No kijtoj ke David ‘kiyolpaktiaya’, porin katka se aksa akin kitasojtaya (Hechos 13:22). Uan no kijtoj ke “kiteltasojtaya” tanauatijkej Daniel (Daniel 9:23).

3. ¿Keyej kinixpejpena Jiova seki taltikpakneminij maj mochiuakan itasojikniuan?

³ ¿Keyej Jiova kinitak Abrahán, David uan Daniel kemej itasojikniuan? Dios kiluij Abrahán: “Tikakini notajtol”  (Génesis 22:18). Nejin kinextia ke Jiova motokia iniuan akin, ika yolyemanilis kichiuaj tein kintajtania. Israelitas kiniluij: “Xiktakamatikan notajtol, uan yekmelauj nimochiuas nanmoDios, uan namejuan nanmochiuaskej nanotekitikauan” (Jeremías 7:23). Komo tikontakamati Jiova, tejuatsin no uelis tionmochiuas tionitasojikniuj.

4, 5. ¿Keniuj kinextia Jiova ichikaualis tein ika kinpaleuia itekitikauan?

⁴ Xionmonemili tein kijtosneki tionmochiuas tionitasojikniuj Dios. Biblia kijtoua ke Jiova kitemoua keniuj uelis “kinextis ichikaualis uan ika kinpaleuis akin kipiaj ininyolo ajsitok iuan yejuatsin” (2 Crónicas 16:9). ¿Keniuj uelis kinextis Dios ichikaualis uan ika mitsonpaleuis? Salmo 32:8 kinextia se taman: “[Nejua, Jiova,] nikchiuas xikpia taajsikamatilis nepakaok tein moita, uan nimitsnextilis ojti kampa moneki tiyas. Nejua yekmelauj nimitsitstos uan ijkon nimitsyolmajxitis”.

⁵ ¡Tel kualtsin mitsoniluia Jiova keniuj mitsonyekpias! Yejuatsin mitsonmakas yolmajxitilis tein mitsonpaleuis, uan komo tikonchiua, mitsonyekpias maj kuali xionyeto. Dios kineki mitsonpaleuis xikonxiko tayejyekolismej uan ouijkayomej tein tikonpanos (xikonixtajtoti Salmo 55:22). Yejua ika, komo tikontekitilia ika nochi moyolo, no uelis tikonijtos ijkon: “Nachipa noixpantsinko yetika. Uan Notajtsin nachipa yetika noyekmakopaka para ma amo aken nechyolmoutis” (Hechos 2:25; Salmo 63:8). Kemaj, Jiova uelis mitsonpaleuis xionnemi kemej kipaktia. Sayoj ke,  kemej tikmatij, moajsi se aksa akin kiteltauelita Dios, uan amo kineki xionnemi ijkon.

6. ¿Toni Satanás kinijtouilij taltikpakneminij?

⁶ Kemej tikitakej itech capítulo 11, Satanás kiixnamikik iueyitayekanalis Dios. Kijtouilij Jiova ke se takajkayaujkej uan kiteajsikamatiltij ke katka se tekiuaj akin amo yolmelauak, yejua ika amo kinkauilij Adán uan Eva maj yejuan kiixejekouanij tein kuali uan tein amo kuali. Satepan, keman yekinika takat uan yekinika siuat tajtakojkej, nikan taltikpak peuak momiakiliaj ininkoneuan. Ompa, Satanás taomeyolotij ika tein kinolinia nochin maj kitekitilikan Jiova. Kemej yeskia kijtoj: “Taltikpakneminij amo kitekitiliaj Dios ika netasojtalis. Komo nechkauaj, uelis nikchiuas akin yeski maj kinekepili Dios”. Kampa ika motajtoua Job kinextia ke ijkon kinemiliaya Amokuali. ¿Akoni katka Job, uan toni kipia ke kiitak iuan itaixnamikilis Satanás?

7, 8. 1) ¿Keyej katka taman Job itech itonaluan? 2) ¿Keniuj Amokuali taomeyolotij ika tein kioliniaya maj kitekitiliani Jiova?

⁷ Job nemik kemej 3,600 xiujmej achtoya. Katka se takat tel yolkuali uan yejua ika Jiova kijtoj: “Amo moajsi okse kemej yejua itech taltikpak, se takat akin amo kipia tein ika kiteluiliskej uan yolmelauak, kimoujkatoka Dios uan kitalkauijtok tein amo kuali” (Job 1:8). Job kiyolpaktiaya Jiova.

⁸ Amokuali taomeyolotij ika tein kioliniaya Job maj kitekitiliani Dios. Kiluij Jiova: “¿Amo tejua tiktatsakuijtok maj amo teyi kipano [Job] uan ichankauan uan nochi tein kipia [...]? Tiktiochiujtok nochi tein kichiua, uan itapialuan momiakilijkejya itech taltikpak. Sayoj ke, axkan xikpata. Ximomamelaua uan xikuili  nochi tein kipia, uan yejua yekmelauj mitsuijuikaltis moixpan” (Job 1:10, 11).

9. ¿Keniuj kinankilij Jiova itaixnamikilis Satanás uan keyej?

⁹ Satanás kiyekijtoj ke Job kitekitiliaya Dios sayoj ika tein kiseliaya. No kiyekijtoj komo kitaliliaj tayejyekolis, kinekepilis Dios. ¿Keniuj kinankilij Jiova itaixnamikilis Amokuali? Kemej Satanás taomeyolotij ika tein Job kioliniaya maj kitekitiliani Jiova, Dios kikauilij maj kitaliliani tayejyekolis. Ijkon, moitaskia ox Job kitasojtaya Dios oso amo.

10. ¿Toni tayejyekolismej kipanok Job, uan keniuj tanankilij?

¹⁰ Satepan, Amokuali kitalilij Job tataman tayejyekolis. Kichiuak maj kiichtekilianij seki itapialuan, uan tein mokaujkej maj mikinij, uan miakej itekitikauan kinmiktijkej. Nochi nejin kiualkuilij tatasojtilis. Satepan, Satanás kiualkuilij okse taman tein tel amo kuali: kichiuak maj momikilianij majtakti ikoneuan itech se chikaujkaejekat. Maski kipanok nochi nejon tein tel amo kuali, “Job amo tajtakoj, nion no kijtouilij Dios tein amo kualtsin” (Job 1:22).

11. 1) ¿Toniok kinekia kinextis Satanás tein kichiuaskia Job, uan keniuj tanankilij Jiova? 2) ¿Keniuj tanankilij Job keman kipanotoya se kokolis tein tel tekokoj?

¹¹ Satanás amo ijkon mokauak. Xa kinemilij, maski Job kixikoj kipolos nochi tein kipiaya ijkon kemej itekitikauan uan ikoneuan, komo kokolispeua kinekepilis Dios. Yejua ika, Jiova kikauak maj Amokuali kichiuani maj kikuini se kokolis tel pitsotik uan tein tel tekokoj. Maski Job kipanok nejon, kisentokak takuaujtamatik iuan Dios. Uan no kijtoj ika yolchikaualis: “¡Niksentokas nikpias se nemilis melauak hasta maj niijyokotoni!” (Job 27:5).

12. ¿Keniuj tapaleuij Job maj monankiliani itaixnamikilis Amokuali?

 ¹² Job amo kimatia ox Satanás kichiuak maj kipanouani nochi nejon tein tel amo kuali. Kemej amo senkis kiixmatia taixnamikilis tein Amokuali kitalilij iueyitayekanalis Jiova, kimouiliaya maj yekmelauj Dios kichiujtoni maj kipiani nejon kuejmolmej (Job 6:4; 16:11-14). Maski ijkon, kisentokak kipiak se nemilis melauak iixpan Jiova uan amo keman kikauak. Uan ika nejon no kinextij ke amo melauak tein kijtoj Satanás ke Job kiseliaya miak taman yejua ika kitekitiliaya Dios.

13. Kemej Job amo kikauak Dios, ¿toni uelik mochiuak ika nejon uan toni kiselij?

¹³ Ika imelaujkayo Job, Jiova uelik kiixiluij Satanás ke amo melauak itajtoluan tein ika kiyolkokoj. Job yekmelauj katka itasojikniuj Jiova, uan kemej amo keman kikauak, kitatiochiuij (Job 42:12-17).

14, 15. ¿Keyej uelis tikijtoskej ke itaixnamikilis Satanás kipia ke kiitas iniuan nochin taltikpakneminij, uan amo sayoj iuan Job?

¹⁴ Satanás amo sayoj taomeyolotij ika tein kioliniaya Job maj amo kikauani Dios, ta no tejuan tisejsemej. ITajtol Dios kiyeknextia itech Proverbios 27:11, kampa kijtoua: “Nokonetsin, xitamatkej uan xinechyolpakti uan ijkon uelis niknankilis akin nechkejkelojtok”. Nejin tajtolmej, tein moijkuiloj miak xiujmej satepan keman momikilij Job, kinextia ke Satanás kisentokaya kiixnamikia Dios uan kintapantijtoya Itekitikauan. Keman tinemij kemej Jiova kipaktia, tikpaleuiaj maj kinankili itapantilis Satanás uan tikyolpaktiaj Dios. ¿Keniuj tikonita nejin? Maski moneki  tikonpatas motachiualisuan, ¿melauj ke tel kualtsin yeskia xiontapaleui maj monankili itakajkayaualis Amokuali?

¹⁵ Xikonita tein Satanás kiyekijtoj: “Nochi tein [taltikpaknenkej] kipia, kitemakas uan ijkon mopaleuis” (Job 2:4). Ijkuak kijtoj “taltikpaknenkej”, Satanás kiyeknextij ke amo sayoj kitapantijtoya Job, ta nochin taltikpakneminij. Nejin tajtolmej motelneki. Amokuali taomeyolotijtok ika tein tejuatsin mitsonolinia amo xikonkaua Dios. Keman tikonpanotos ouijkayomej, Satanás kiuelitaskia amo xikontakamati Dios uan amo xionmonejnemiltiok kemej moneki. ¿Kemej toni uelis kikuis Satanás uan ika kichiuas tein yejua kineki?

16. 1) ¿Kemej toni kikui Satanás tein ika kiyejyekoua kinxelos taltikpakneminij iuan Dios? 2) ¿Keniuj uelis kikuis mouan nejon tein ika kinxeloua iuan Dios?

¹⁶ Kemej tikitakej itech capítulo 10, Satanás kikui miak taman tein ika kiyejyekoua kinxelos taltikpakneminij iuan Jiova. Se taman, taixnamiki kemej se tekuani tein nanalkatinemi “ten kitemotinemi akoni kixixikos” (1 Pedro 5:8). Yejua ika, tikonitas ichikaualis Satanás komo motasojikniuan, mochankauan oso oksekin, amo kinekij xionmomachti Biblia oso amo xikonchiua ijkon kemej tionmomachtijtok (Juan 15:19, 20). * Uan okse taman, Satanás nochipa “motekitiltijtinemi ijkon keme yeskia se ángel [...] ten kualkui tanextsin de Dios” (2 Corintios 11:14). Kemej tikitaj, Amokuali uelis kikuis miak taman keniuj  mitsonkajkayauas, uan ika nejon kichiuas maj amo xikonsentoka xionnemi kemej Dios kipaktia. Se taman, uelis kichiuas xionmotsinkixti. Xa kichiuas xionmonemili ke amo keman uelis tikonyolpaktis Dios (Proverbios 24:10). Yeski mochiuas Satanás kemej se ‘tekuani tein tsajtsitinemi [“nanalkatinemi”, TNM]’ oso kemej se “ángel [...] ten kualkui tanextsin de Dios”, itaixnamikilis sayoj se: kiyekijtoua ke amo tikonsentokas tikontekitilis Dios keman tikonpanos kuejmolmej oso tayejyekolismej. ¿Keniuj uelis tiontapaleuis maj monankili itaixnamikilis, uan tikonnextis ke amo tikonkaua Dios maski tikonpanoua ouijkayomej kemej kichiuak Job?

17. ¿Toni yekinika taman techolinia maj tiktakamatikan itanauatiluan Jiova?

¹⁷ Tejuatsin uelis tiontapaleuis maj monankili itaixnamikilis Satanás komo tionnemi kemej Dios kipaktia. ¿Toni kijtosneki nejon? Biblia technankilia: “Xiktasojta Moueyitekotsin Dios ika nochi moyolo, uan no ika nochi motalnamikilis, uan no ika nochi mochikaualis” (Lucas 10:27). Keman okachi tikontasojtas Dios, okachi tikonnekis tikonchiuas tein mitsontajtania. Tatitanil Juan kijkuiloj: “Melau tikpiaj ne tetasojtalis de Dios, kuak no tiktakamatij ya in tanauatil ten Dios technauatilia ma tikchiutinemikan”. Komo tikontasojta Jiova ika nochi moyolo, tikonitas ke “tanauatilme de Dios amo techmachililtia ke kox semi oui para se kintakamatinemis” (1 Juan 5:3).

18, 19. 1) Xikonijto seki itanauatiluan Jiova (xikonita recuadro “ Maj tiktalkauikan tein Jiova kitauelita”). 2) ¿Keniuj tikmatij ke Dios amo techtajtania tein amo uelis tikchiuaskej?

¹⁸ ¿Katiyejuan itanauatiluan Jiova? Seki techiluia  maj tikauakan tachiualismej tein amo kuali. Kemej tein tikajsij itech página 140, kampa kijtoua, “ Maj tiktalkauikan tein Jiova kitauelita”. Ompa tekpantok tachiualismej tein Biblia senkis techiluia ke amo kuali. Seki tein ompa ixnesi, yekinika xa tikonitas ke amo semi tel amo kuali. Sayoj ke satepan keman tiontanemilis itech textos, xa tikonitas ke itanauatiluan Dios yejua tein okachi kuali. Xa monekis tikonpatas motachiualisuan, uan xa yejua tein okachi ouij mitsonkisas kemej amo keman ijkon tikonpanotoya teisa. Sayoj ke,  akin nemij kemej Dios kipaktia, tel kualtsin momachiliaj uan no tel yolpakij (Isaías 48:17, 18). Uan tejuatsin no uelis tikonchiuas nejon. ¿Keniuj tikmatij?

¹⁹ Porin Jiova amo keman techtajtania teisa tein amo uelis tikchiuaskej (xikonixtajtolti Deuteronomio 30:11-14). Yejuatsin kiixmati okachi kuali ke tejuan, tein uelis tikchiuaskej uan tein amo (Salmo 103:14). Uan no, ueli techmaka chikaualis tein techpaleuis maj tiktakamatikan. Tatitanil Pablo kijkuiloj: “Totekotsin Yejuatsin Yolmelauaktsin, uan Yejuatsin  namechyolchikautiyas uan namechyekpixtiyas” (2 Tesalonicenses 3:3). Jiova kineki techpaleuis maj titaxikokan, yejua ika no uelis techmakas ‘chikaujkauelilis tein ualeujtok imako uan amo tein ualeua tech tejuan san’ (2 Corintios 4:7). Ijkon kipanok Pablo, akin satepan keman kixikoj miak tayejyekolismej, kijtoj: “Nochi ueli nikchiua ika ichikaualis ne akin nechmakatok” (Filipenses 4:13, TNM).

20. ¿Toni kualneskayomej tein Dios kipaktia moneki tikonixualtis, uan keyej motelnekij?

²⁰ Tein melauj, amo sayoj moneki tiktalkauiskej tein Jiova kitauelita uan ijkon uelis tikyolpaktiskej. No moneki tiktasojtaskej tein yejuatsin kitasojta (Romanos 12:9). ¿Akonimej iniuan okachi kuali tionmomachilia tionyetos? ¿Melauj ke iniuan akin chipaujkanemij, akin kinyoltilana tein tejuatsin mitsonyoltilana, uan akin kiitaj teisa kemej tejuatsin tikonita? No ijkon Jiova. Yejua ika, xionmomachti tikontasojtas nochi tein yejuatsin kitasojta. Itech Salmo 15, kinextia akonimej kinita Dios kemej itasojikniuan (xikonixtajtoti Salmo 15:1-5). Itasojikniuan Jiova, kiixualtiaj ‘itakilo espíritu’, uan seki yejuan nejin: “ma se tetasojtatinemi; uan ma se yolpaktinemi; uan ma se yolseukanentinemi; uan ma se kipixtinemi paciencia; uan ma se teyoliknelijtinemi; uan ma se kichiutinemi ten kuali” (Gálatas 5:22, 23).

21. ¿Toni mitsonpaleuis xikonixualti kualneskayomej tein Dios kipaktia?

²¹ Komo mojmostaj tikonixtajtoltia uan tionmomachtia Biblia, yejua se taman tein mitsonpaleuis  xikonixualti kualneskayomej tein Dios kipaktia. Uan no, ijkon kemej tikonajsikamattiyas tein kichia Dios xikonchiua, no ijkon tiontanemilis kemej yejuatsin (Isaías 30:20, 21). Keman okachi tikontasojtas Jiova, okachi tikonnekis tionnemis kemej yejuatsin kipaktia.

22. ¿Toni uelis mochiuas komo tionnemi kemej Dios kipaktia uan toni tikonselis?

²² Moneki se chikaujkayot tionnemis kemej Jiova kipaktia. Biblia kijtoua ke keman tikpataj totachiualisuan, se moajchiuilia soltik talnamikilis uan se kipata ika se yankuik talnamikilis (Colosenses 3:9, 10). Sayoj ke, keman akin kijkuiloj Salmo ika tajtoj itanauatiluan Dios, kijtoj: “Se kitakamatis teualkuilia se ueyi taxtauil” (Salmo 19:11). Komo tionnemi kemej Dios kipaktia, no tikonselis miak tatiochiualismej. Uan no, tiontapaleuis maj monankili itaixnamikilis Satanás uan tikonyolpaktis Jiova.