BIBLIA amo semi kimelaua kemanian yolik Jesús. Sayoj ke kemaj kijtoua seki taman tein kichiua maj tiknemilikan ke amo yolik diciembre.

 Itech xolal Belén kampa yolik Jesús, ¿keniuj yetoya tonalmej diciembre? Calendario judío kipia se metsti tein itokay kislev, peua itajkotian noviembre uan tami itajkotian diciembre, taseseyaya uan kiouia. Ompa, kitojtoka metsti tebet, tein peua itajkotian diciembre uan tami itajkotian enero, ijkuak nejon metsti okachi taseseyaya uan kemansa no tasekuetsia kampa okachi uejkapan tal. Maj tikitakan toni kijtoua Biblia kemej yetoya tonalmej ompa.

Esdras, semej akin kijkuiloj Biblia, kinextia ke kislev katka se metsti keman taseseyaya uan kiouia. Kijtoua ke itech “chiknaui metsti [kislev], tonal sempoual”, tel miakej mosentilijkej ompa Jerusalén, uan “uiuiyokatoyaj [...] porin tel kiouia”. Uan no, kijtoua ke akin ompa moajsiaj, kijtojkej keniuj katka tonalmej ijkuak: “Nejin tonalmej tel kiouataj uan amo uelis tiksentokaskej tiyetoskej kalampa” (Esdras 10:9, 13; Jeremías 36:22). Uan keman ajsitiyaya diciembre, ichkatajpianij akin ompakauin moajsiaj, kineuayaj ininichkauan uan ijkon amo kipanoskiaj youal kalampa.

 Axkan, Biblia techiluia ke youal keman Jesús yolik, ichkatajpianij akin kintakualtijtoyaj ininichkauan moajsiaj ixtauat. Kemaj, Lucas, semej akin kijkuiloj Biblia, techtapouia ke ompakauin Belén, ichkatajpianij “tatakualtijtinemiaj ika ninichkauan uan kipanoayaj in youal tech nojon ixtauat” (Lucas 2:8-12). Kemej tikitaj, ompa ixtauat kipanouayaj youal uan kintakualtiayaj ininichkauan. Komo ompa Belén tel taseseyaya diciembre uan kiouia, ¿yetoskiaj ixtauat ichkatajpianij itech nejon metsti? ¡Amo! Yejua ika, tein mochiujtoya keman Jesús yolik, kinextia ke amo yolik diciembre. *

ITajtol Dios kinextia miak taman kemanian momikilij Jesús, sayoj ke amo semi kimelaua kemanian yolik. Nejin techelnamiktia itajtoluan tekiuaj Salomón: “Okachi kuali se tokayit uan amo se kuali aceite, uan tonal keman se momikilia uan amo tonal keman se yoli” (Eclesiastés 7:1). Ika nejon, moajsikamati keyej Biblia semi ika tajtoua itanojnotsalis uan imikilis Cristo, uan amo semi kimelaua kemanian yolik.