Amo. Nion Biblia nion amatajkuilolmej tein ika tajtouaj tein panok ne uejkauj kinextiaj ke mochiuaya nejon.

Itech miak Biblias, nejin tajkuilol kiteajsikamatiltia ke itech itonaluan Pablo sekin ininka moauiayaj akin momikilijkajya. Kemej neskayot, seki Biblias kijtouaj nejin: “Komo mikemej amo oksepa nemiskej, ¿keyej taltikpakneminij ininka moauiaj akin momikilijkejya?”.

Sayoj ke, maj tikitakan tein kijkuilojkej ome takamej akin momachtiaj nochi tein mouika ika Biblia. Gregory Lockwood kijtoj ke nion teyi kinextia itech Biblia nion kampa ika motajtoua tein mochiuak ne uejkauj ke se taltikpaknenkej ika moauij se akin momikilijkaya. Tamachtijkej Gordon Fee no ijkon kijtoj. Kijkuiloj ke nion teyi kinextia itech Biblia nion kampa ika motajtoua tein mochiuak ne uejkauj maj se taltikpaknenkej ika moauiani se akin momikilijkaya. Kijtoj ke nejin amo ika motajtoua itech Nuevo Testamento, uan ke nion teyi kinextia ke yekinika itatojtokakauan Cristo kichiujkej oso ke kichiuayaj itech taneltokalismej tein neskej tepitsin satepan ke tatitanilmej momikilijkej.

Biblia tamachtia ke Jesús kijtoj: “Xikinnextilikan nochi in taltikpakuani ma yejuan no ma mochiuakan nomomachtijkauan. Uan xikinauijtinemikan [...]. Uan xikinmachtikan de ke ma tatakamatikan nochi [...] ten namechnajnauatiaj” (Mat. 28:19, 20). Nejin kinextia ke achto ke se taltikpaknenkej ueliskia moauis, monekia kiixmatis Jiova uan Jesús, monekia iniuan takuaujtamatis uan kintakamatis. Uan tein melauj, nejin amo uelia kichiuaya se akin momikilijkaya uan kitokkajya, nion uelia kiixpataya se akin yoltoya uan yejua kichiuaya nochi nejon (Ecl. 9:5, 10; Juan 4:1; 1 Cor. 1:14-16).

Komo ijkon, ¿toni kijtosnekik Pablo itech 1 Corintios 15:29?

Seki tokniuan akin nemiaj Corinto amo kineltokayaj ke mikemej oksepa nemiskej (1 Cor. 15:12). ¿Keniuj kinextij Pablo ke mopolojtoyaj? Yejua kiniluij: “Mojmostaj nimoixnamiki ika mikilis”. Tein melauj, Pablo yoltoyaok, sayoj ke kijtoj ke maski mojmostaj kipanouaya ouijkayomej tein ueliskia kichiuas maj momikili, takuaujtamatia ke satepan ke momikiliskia oksepa kiseliskia inemilis uan yaskia iluikak kemej se espíritu, ijkon kemej Jesús (1 Cor. 15:30-32, 42-44, TNM).

Tokniuan akin nemiaj Corinto monekia kiajsikamatiskej ke kemej katkaj taixpejpenalmej, mojmostaj kipanoskiaj ouijkayomej uan ke monekia amo kikauaskej Dios hasta keman momikiliskiaj, uan ijkon ueliskia oksepa kiseliskej ininnemilis uan yaskej iluikak. Yejua ika, keman ‘moauiayaj itech Cristo Jesúsʼ kijtosnekia ke ‘moauiayaj itech imikilisʼ (Rom. 6:3). Nejin kijtosnekia ke ijkon kemej Jesús, kipanoskiaj ouijkayomej uan momikiliskiaj achto ke ueliskia oksepa kiseliskej ininnemilis uan yaskej iluikak.

Seki xiujmej satepan ke Jesús kiauijkej itech at, kiniluij ome itatitaniluan: “Taauilis [...] ten Nejuatsin nikselis, namejuan no nankiseliske” (Mar. 10:38, 39). Jesús amo ika tajtojtoya keman moauiayaj itech at, ta keman moauiayaj itech imikilis. Nikan Jesús kijtosnekia ke nochipa kitakamatiskej Dios kinualkuiliskia mikilis. Pablo kijkuiloj ke taixpejpenalmej tajyouiskiaj iuan Cristo uan ijkon no ueliskia kinueyitaliskej iuan (Rom. 8:16, 17; 2 Cor. 4:17). Nejin kijtosnekia ke yejuan no monekia momikiliskej achto ke ueliskia oksepa kiseliskej ininnemilis uan yaskej iluikak.

Yejua ika, tein Pablo kijtoj uelis ijkon mokepas: “Komo mikemej amo oksepa nemiskej, ¿toni panos iniuan akin moauiaj itech mikilis? Komo mikemej amo oksepa nemiskej, ¿keyej ijkon moauiaj?” (1 Cor. 15:29, TNM).