1. ¿Keyej tikijtouaj ke Jiova techtasojta?

JIOVA kichiuak maj iuan timotokikan (Juan 6:44). Maj tiknemilikan toni kijtosneki nejon. Keman kinitstoya millones taltikpakneminij, kiitak ke tejuan tiknekiaj tikixmatiskej uan ke ueliskia tiktasojtaskej, uan yejuatsin semi kipatiuita nejon (1 Crón. 28:9). Jiova techixmati, techajsikamati uan techtasojta. Nejon semi techyolseuia.

2. ¿Toni kijtoj Jesús tein techpaleuia maj tikajsikamatikan ke Jiova techtasojta?

² Jiova semi mitsontasojta, uan no semi kintasojta okseki tokniuan. Jesús kijtoj se neskayot tein techpaleuia maj tikajsikamatikan nejin. Yejua kijtoj ke Jiova kemej yeskia se ichkatajpixkej. Komo se ichkatajpixkej akin kipia 100 ichkamej kipoloua se, ¿toni kichiuas? “In tapixke kinkaua ne kuouta in oksekin nauipoal uan kaxtolo naui ichkame uan youi kitemoti in ichkatsin ten poliuik”. Keman kiajsis, amo kualanis porin poliujka, ta yolpakis. ¿Toni kijtosneki nejin? Ke Jiova kintasojta nochin iichkauan. Jesús kijtoj: “Toueyitajtsin Dios [...] amo no kimonekiltia de ke ma xiixpoliuikan senme de namejuan” (Mat. 18:12-14).

3. ¿Toni tikitaskej itech nejin tamachtilis?

³ Amo tiknekij tikchiuaskej nion tikijtoskej teisa tein kinyolkokos tokniuan. Itech nejin tamachtilis tiknankiliskej nejin netajtanilmej: ¿toni techpaleuis maj amo tikinyolkokokan tokniuan? ¿Uan toni uelis tikchiuaskej komo se tokniuj techyolkokoj? Sayoj ke achto maj tikitakan akonimej “nijin konetsitsin” akin ininka motajtoua itech Mateo capítulo 18.

4. ¿Akonimej “nijin konetsitsin”?

⁴ “Nijin konetsitsin” yejuan imomachtijkauan Jesús. Maski tataman  xiujmej kipiaj yejuan kemej yeskiaj “koneme” porin mokauaj maj Jesús kinmachti (Mat. 18:3). Nochin takuaujtamatij iuan Cristo maski seseko kayomej, maski tataman tein kiuelitaj uan maski tataman kemej tanemiliaj. Uan Jesús semi kintasojta (Mat. 18:6; Juan 1:12).

5. ¿Keniuj kiita Jiova keman kiyolkokouaj semej itekitikauan?

⁵ Jiova semi kintasojta nochin “nijin konetsitsin”. Tikajsikamatiskej keniuj kinita komo tiknemiliaj keniuj tejuan tikinitaj konemej. Semi tikintasojtaj uan tiknekij tikinyekpiaskej, porin amo kipiaj chikaualis uan ayamo kimatij miak taman kemej akin uejueykejya. Melauj ke amo tikuelitaj keman kitajyouiltiaj se taltikpaknenkej. Sayoj ke okachi amo tikuelitaj oso hasta tikualanij keman kitajyouiltiaj se konetsin. Jiova no kineki kinyekpias itekitikauan. Uan keman semej kiyolkokouaj amo kiuelita oso hasta kualani (Is. 63:9; Mar. 9:42).

6. Ika tein kijtoua 1 Corintios 1:26-29, ¿keniuj kinitaj taltikpakneminij imomachtijkauan Jesús?

⁶ ¿Keyej no “konetsitsin” imomachtijkauan Jesús? Porin taltikpakneminij kinitaj ke ueyichiuanimej akin tominpiaj, akin semi kinixmatij uan akin kipiaj tanauatil. Sayoj ke miakej imomachtijkauan Jesús amo tominpiaj, amo semi kinixmatij nion kipiaj tanauatil. Yejua ika taltikpakneminij kinitaj ke “konetsitsin” oso ke amo teyi chiuanimej (xikonixtajtolti 1 Corintios 1:26-29). Sayoj ke Jiova amo ijkon kinita.

7. ¿Keniuj kineki Jiova maj tikinitakan tokniuan?

⁷ Jiova kintasojta nochin itekitikauan, maski uejkaujya peuak kitekitiliaj oso yankuixtokok. Komo Jiova kinpatiuita nochin tokniuan, tejuan no moneki tikinpatiuitaskej. Tiknekij tikintasojtaskej “nochi in tokniuan taneltokani”, amo sayoj sekin (1 Ped. 2:17). Moneki tikchiuaskej maj kimachilikan nejon netasojtalis uan maj amo tikinyolkokokan. Komo tikmatij ke tikyolkokojkej se tokniuj maj amo tiknemilikan ke amo moneki tikyektaliskej tein panok porin tokniuj ipa niman moyolkokoua, nion maj tiknemilikan ke moneki techtapojpoluis uan kielkauas tein panok. ¿Keyej seki tokniuan niman moyolkokouaj? Xa porin keman moskaltijtoyaj kipanokej seki taman tein kichiuak maj kimachilikan ke amo teyi chiuanimej. Oso xa yankuixtok mochiujkej itekitikauan Jiova uan ouijok kinkisa kintapojpoluiskej oksekin keman mopolouaj. Komo yejua nejin oso okseki taman kichiua maj seki tokniuan niman moyolkokokan, maj tiktemokan tikyektaliskej tein panok. Uan no, komo se tokniuj kiita ke niman moyolkokoua, moneki kiajsikamatis ke nejon se taman tein amo kuali tein moneki mochikauas kipatas. Moneki kichiuas nejin porin kipaleuis maj yolpaki uan maj kuali mouika iniuan tokniuan.

8. ¿Toni tanemilil tein kipiayaj miakej judíos no kipiakej imomachtijkauan Jesús?

⁸ ¿Keyej Jesús ininka tajtoj “nijin konetsitsin”? Imomachtijkauan kitajtanijkaj: “¿Akoni okachi ueyichiujkej itech Tekiuajyot tein moajsi iluikak?” (Mat. 18:1, TNM). Itech nejon tonalmej, miakej judíos kinekiaj maj oksekin kinemilianij ke yejuan katkaj ueyichiuanimej. Se takat akin momachtia tein panok ne uejkauj kijtoua: “Semi kitayekanaltiayaj maj oksekin kinueyitalianij uan maj miakej kinixmatinij”.

9. ¿Toni monekia kichiuaskej imomachtijkauan Jesús?

⁹ Jesús kimatia ke imomachtijkauan monekia mochikauaskej amo tanemiliskejok kemej miakej judíos akin kitemouayaj yeskij okachi ueyichiuanimej. Kiniluij: “Ne tagat ten kachi ueyi chiuke namotsalan, yejua nojon ma mopoua uan ma motekitilti keme se telpokat san. Uan ne tagat ten tayekantinemi namouan,  yejua nojon ma mochiuaki [...] se tetekitilijke” (Luc. 22:26). Timochiuaskej kemej “se telpokat” komo tiknemiliaj ke “in oksekin tokniuan [...] kachi ueyi chiuanime” (Filip. 2:3). Komo timochikauaj ijkon tikinitaskej tokniuan amo tikchiuaskej oso tikijtoskej teisa tein kinyolkokos.

10. ¿Toni tein Pablo tayolmajxitij moneki tikelnamikiskej?

¹⁰ Nochin tokniuan takamej uan siuamej okachi ueyichiuanimej ke tejuan itech seki taman. Amo ouij techkisa tikajsikamatiskej nejin keman tikitaj ininkualneskayouan. Moneki tikelnamikiskej tein tatitanil Pablo kinyolmajxitij tokniuan akin nemiaj Corinto: “¿Akoni namechtalij de ke namejuan kachi nanuejueyinme uan ke oksekin tokniuan? [...] Uan tejua, ¿toni tikpixtok ten Dios amo mitstayokolij? [...] Uan komo Dios mitstayokolij ya nochi nijin, ¿keye timochiua semi tiueyichiuke? [...] Uan, ¿keye tikpoua nochi ten tikpixtinemi ke amo uitsa de Dios?” (1 Cor. 4:7). Yejua ika, maj amo keman tiknemilikan ke okachi tiueyichiuanimej ke oksekin nion maj tiktemokan tikchiuaskej maj ijkon techitakan. Komo se tokniuj takat semi kuali tamachtia itech nechikolmej oso komo se tokniuj siuat kipia miak nemachtilmej ika Biblia, nochipa moneki kiueyitaliskej Jiova.

11. ¿Toni techmachtia neskayot kampa Jesús ika tajtoj se tekiuaj uan semej itakeualuan?

¹¹ Satepan ke Jesús kiniluij imomachtijkauan maj amo kinyolkokokan oksekin, kintapouij se neskayot kampa ika tajtoj se tekiuaj uan semej itakeualuan. Takeual kitauikiliaya tekiuaj miak tomin tein amo keman ueliskia kikepilis, sayoj ke tekiuaj amo kitaxtaualtijok. Satepan nejon takeual amo kinekik kitapojpoluis okse takeual akin no kitauikiliaya tomin tein amo miak katka. Yejua ika, tekiuaj tanauatij maj kitsakuanij takeual akin amo teiknelij. ¿Toni techmachtia nejin? Jesús kijtoj: “No ijkon in Toueyitajtsin Dios ten yetika nepa eluiyaktsinko namechchiuilis cada senme de namejuan, komo amo nankintapojpoluiske namokniuan” (Mat. 18:21-35).

12. ¿Keniuj momachiliaj oksekin keman amo tiknekij titetapojpoluiskej?

¹² Tein kichiuak nejon takeual kiualkuilij tein amo kuali, uan no kintajyouiltij oksekin. Yekinika porin amo kiiknelij okse takeual uan “kitsakuato tech in cárcel para ma kitaxtauiliani nochi ten kitauikiliaya”. Uan no, kinyolkokoj okseki takeualmej akin kiitakej tein panok. Jesús kijtoj: “In okseki takeualme kuak kikakke ke ijkon mochiuak, ijkuakon yejuan semi kintelyolkokoj”. No ijkon, tein tikchiuaj no kinyolkokoua oksekin. ¿Toni uelis panos komo se tokniuj techchiuilia tein amo kuali uan amo tiknekij tiktapojpoluiskej? Yekinika, tikyolkokouaj yejua porin amo tiknekij tiktapojpoluiskej uan amo tiknextiliaj ke tiktasojtaj, uan xa hasta nion tiknotsaj. Uan no, tikchiuaj maj tokniuan amo kuali momachilikan porin kiitaj ke amo kuali timouikaj iuan nejon tokniuj.

13. ¿Toni mitsonmachtia tein kipanok se precursora?

¹³ Keman tikintapojpoluiaj tokniuan kuali timomachiliaj uan titapaleuiaj maj oksekin no kuali momachilikan. Yejua nejon kipanok se precursora akin monotsa Crystal. * Se tokniuj siuat itech nechikol kichiuaya maj amo kuali momachili. Crystal kielnamiki: “Itajtoluan kemansa semi nechyolkokouayaj kemej yeskia nechtokiliskia se cuchillo. Keman tiayaj titanojnotsatij nion niknekia maj iuan nechtitaninij itech carro. Amo semi nikuelitayaok tanojnotsalis nion niyolpakiaok”. Maski Crystal kinemiliaya ke katka taixejekol maj ijkon momachiliani, kiixtalij amo kualantos iuan tokniuj nion sayoj itech tanemilis tein kipanouaya. Kinextij yolyemanilis uan kichiuak tein motayolmajxitij itech tamachtilis “Perdonemos de corazón”,  tein kisak itech amaix La Atalaya 15 de octubre de 1999. Crystal kitapojpoluij tokniuj. Yejua kijtoua: “Axkan nikajsikamati ke tinochin timochikaujtokej timopataskej uan ke Jiova mojmostaj techtapojpoluia. Axkan niyolseujtok uan oksepa niyolpaki”.

14. 1) Kemej kijtoua Mateo 18:21, 22, ¿toni nesi ke ouij kikisaya kichiuas tatitanil Pedro, uan toni mitsonmachtia tein Jesús kinankilij? 2) ¿Toni uelis techpaleuis komo no ouij techkisa titetapojpoluiskej?

¹⁴ Maski tikmatij ke moneki titetapojpoluiskej, kemansa ouij techkisa tikchiuaskej. Nesi ke tatitanil Pedro kemansa no ouij kikisak tetapojpoluis (xikonixtajtolti Mateo 18:21, 22). ¿Toni uelis techpaleuis maj titetapojpoluikan? Yekinika, komo tiknemiliaj ke Jiova miakpaya techtapojpoluiani (Mat. 18:32, 33). Maski amo technamiki maj techtapojpolui, yejuatsin techtapojpoluia (Sal. 103:8-10). Uan no, moneki “ma timosepantasojtakan se uan okse”. Yejua ika, amo ueli tikixpejpenaj ox titetapojpoluiskej oso amo, ta moneki tikchiuaskej (1 Juan 4:11). Ojpatika taman tein uelis techpaleuis yejua komo tiknemiliaj toni panoua keman titetapojpoluiaj. Tikpaleuiaj tokniuj akin techyolkokoj, titapaleuiaj maj tokniuan amo moxexelokan, tiksentokaj kuali timouikaj iuan Jiova uan tiyolseuij (2 Cor. 2:7; Col. 3:14). Uan expatika taman tein uelis techpaleuis yejua komo tiktataujtiaj Jiova, akin techiluia maj titetapojpoluikan. Maj amo tikauakan maj Satanás kichiua maj amo kuali timouikakan iniuan tokniuan (Efes. 4:26, 27). Moneki maj Jiova techpaleui maj Satanás amo kichiua maj amo onka yolseuilis itech nechikol.

15. Kemej kijtoua Efesios 4:32, ¿toni uelis tikchiuaskej komo se tokniuj kichiua teisa tein techkualantia?

¹⁵ Komo se tokniuj kichiua teisa tein semi techkualantia moneki timochikauaskej amo tikualantoskej iuan. Maj tiktataujtikan Jiova uan maj tiktapouikan nochi tein tikmachiliaj.  Maj tiktajtanikan maj kitiochiua tokniuj akin techyolkokoj uan maj techpaleui maj tikitakan ikualneskayouan, kualneskayomej tein yejuatsin kiitak uan tein semi kipatiuita (Luc. 6:28). Komo amo ueli tikelkauaj tein tokniuj kichiuak, maj tiknemilikan keniuj uelis titajtoskej iuan. Nochipa keman se tokniuj kichiuas teisa okachi kuali maj tiknemilikan ke amo kitemouaya techyolkokos (Mat. 5:23, 24; 1 Cor. 13:7). Uan keman iuan titajtoskej, maj amo tiknemilikan ke amo yolkuali. Sayoj ke ¿toni uelis tikchiuaskej komo tokniuj amo kineki ika tajtos tein panok? Maj amo tiyolijsiuikan. Biblia kijtoua: “Ximotapojpoluikan se uan okse” (xikonixtajtolti Efesios 4:32). Uan tein okachi moneki, maj amo iuan tikualantokan, porin nejon kichiuas maj amo kuali timouikakanok iuan Jiova. Maj amo tikauakan maj nion teyi kichiua maj timoyolkokojtokan. Ijkon tiknextiskej ke okachi tiktasojtaj Jiova (Sal. 119:165).

16. ¿Toni moneki tikchiuaskej tinochin?

¹⁶ ¡Semi tiktasojkamatij tatiochiualis tein tikpiaj maj ueli tiktekitilikan Jiova iniuan tokniuan kemej ‘sayo se sen oloch yetolis de ichkamej’ akin techixyekana “se tapixke san”! (Juan 10:16). Amatajkuilol Organizados para hacer la voluntad de Jehová itech página 165, kijtoua: “Moneki titapaleuiskej maj ueli tiksentokakan tisentekitikan”. Uan no kijtoua: “Nochipa kuali timouikaskej iniuan tokniuan komo timochikauaj tikinitaskej kemej Jiova kinita”. Yejuatsin techita tinochin kemej ‘ikonetsitsin’ uan semi techtasojta. Uan tejuan no moneki tikinitaskej tokniuan kemej Jiova kinita. Yejuatsin kiita uan kipatiuita nochi tein tikchiuaj porin tiknekij tikinpaleuiskej tokniuan uan tikinyekpiaskej (Mat. 10:42).

17. ¿Toni tikixtalijtokej tikchiuaskej?

¹⁷ Kemej tikintasojtaj tokniuan tikixtalijtokej tiktakamatiskej nejin tajtolmej: “Amo xikintepotamikan ok namokniuan taneltokani [...]. Uan amo no xikintopeuakan ma uetsitij tech in tajtakol” (Rom. 14:13). Tiknemiliaj ke tokniuan okachi ueyichiuanimej uan tiknekij tikintapojpoluiskej. Maj amo tikauakan maj techyolkokojto tein oksekin kichiuaj, ta okachi kuali “ma tiksentokakan ne ojtsin [...] ten kualkui yolseuilis [...] para ijkon timoyekyolmajxitijtiyoue tech totakuautamatilis” (Rom. 14:19).