1. Keman miakej takamej uan siuamej tajtankej toni monekia kichiuaskej, ¿toni kinnankilijkej?

MIAKEJ takamej uan siuamej yajkaj Jerusalén. Katkaj kayomej itech miak tataman altepemej uan tajtouayaj tataman tajtolmej. Nejon tonal panok se taman tein semi kimoujkakakkej: seki judíos peuak tajtouaj itech inintajtol nejon taltikpakneminij. Sayoj ke amo yejua nejon tein okachi kimoujkakakkej, ta tein kijtojkej nejon judíos uan tein satepan kiniluij tatitanil Pedro. Kiniluij ke ueliskia makisaskej komo iuan takuaujtamatiaj Jesucristo. Nejon tajtolmej semi kinyololinij uan yejua ika tajtankej: “¿Toni moneki tikchiuaske axkan?”. Uan Pedro kinnankilij: “Ma namechauijkan” (Hech. 2:37, 38).

2. ¿Toni tikitaskej itech nejin tamachtilis? (Xikonita taixkopin ipeujyan amaix).

² Tein panok satepan semi kualtsin: kemej eyi mil taltikpakneminij moauijkej nejon tonal uan ijkon mochiujkej imomachtijkauan Cristo. Ijkon peuak tanojnotsalis tein Jesús kinnauatij imomachtijkauan maj kichiuanij. Uan nejon tekit kisentoka mochiua hasta axkan. Itech nejin tonalmej, se taltikpaknenkej amo sayoj momachtia seki horas uan ueli moauiaya, ta xa monekis panos seki metsti, se xiuit oso okachi. Kemej kiitanij akin kimachtijtokej ika Biblia se taltikpaknenkej, moneki se kichiuas miak taman uan ijkon uelis se kinpaleuis akin momachtijtokej Biblia maj mochiuakan itatojtokakauan Jesús. Itech nejin tamachtilis tikitaskej keniuj uelis tikinpaleuiskej akin momachtijtokej Biblia maj moauikan.

3. Kemej kijtoua Mateo 28:19, 20, ¿toni moneki kichiuas akin momachtijtok Biblia achto ke uelis moauis?

³ Achto ke se taltikpaknenkej uelis moauis moneki kichiuas tein momachtijtok itech Biblia (xikonixtajtolti Mateo 28:19, 20). Keman kichiua, kemej yeskia “tagat ten yek yolmajsitok”, akin Jesús ika tajtoj itech se neskayot. Nejon takat “achto tachkua uejkatan [...] uan kitalij in tatsineualonime tech se ueyi tesouil” (Mat. 7:24, 25; Luc. 6:47, 48). Maj tikitakan eyi taman kemej uelis tikpaleuiskej akin momachtijtok Biblia maj kichiua tein momachtia.

4. ¿Keniuj uelis tikpaleuiskej akin momachtijtok Biblia maj ueli moaui? (No xikonita recuadro “ Xikonpaleui akin momachtijtok Biblia maj kiixtali kichiuas seki taman uan maj ueli kichiua”).

⁴ Maj tikpaleuikan maj kiixtali kichiuas seki taman. ¿Keyej moneki tikchiuaskej nejin? Maj tiknemilikan ke tiouij itech tocarro uan uejka kampa tiajsitij, yejua ika xa miakpa timoketsaj kampa tikitaj ke takualtsinkan. Nejon techpaleuia maj amo tikitakan ke uejkaok techpoloua. No ijkon, keman akin momachtijtok Biblia kiixtalia seki taman tein niman ueli kichiua, xa kipaleuis maj kiita ke komo kiixtalia moauis amo ouij kikisas kichiuas. Ika recuadro “Xikonixtali tikonchiuas nejin” tein kipia amatajkuilol Tiyolpakiskej nochipaya uelis tikpaleuiskej maj kiixtali kichiuas seki taman. Itamian sejse tamachtilis maj tikiluikan keniuj tein ijkuiliujtok itech recuadro uelis kipaleuis maj kichiua tein momachtij. Komo tiknekij maj kiixtali kichiuas okseki taman uelis tikijkuiloskej kampa kijtoua “No nikchiuas nejin”. Nochipa keman tiajsiskej itech nejin recuadro maj ika titajtokan tein kiixtalijtok niman kichiuas uan tein amo niman.

5. Kemej kijtoua Marcos 10:17-22, ¿toni kiluij Jesús se takat akin kipiaya miak tomin, uan keyej?

⁵ Maj tikpaleuikan maj kipata seki taman  (xikonixtajtolti Marcos 10:17-22). Jesús kiluij se takat akin kipiaya miak tomin maj kinamakani nochi tein kipiaya, maski kimatia ke ouij kikisaskia kichiuas nejon (Mar. 10:23). ¿Keyej kiluij maj kichiua nejon? Porin kitasojtaya. Kemansa xa amo tiknekij tikiluiskej akin tikmachtiaj ke moneki kichiuas tein momachtijtok porin xa tiknemiliaj ke ayamo uelis. Melauj ke ouij tekisa se kipatas seki taman uan se kichiuas tein Biblia tamachtia (Col. 3:9, 10). Sayoj ke komo niman iuan titajtouaj uan tikiluiaj ke moneki kipatas teisa, uelis niman kichiuas uan ijkon tiknextiliskej ke tiktasojtaj (Sal. 141:5; Prov. 27:17).

6. ¿Keyej moneki tikchiuaskej netajtanilmej tein techpaleuiskej maj tikmatikan toni kinemilia akin tikmachtiaj?

⁶ Moneki tiktajtaniskej akin tikmachtiaj keniuj kiita tein momachtia. Nejin techpaleuis maj tikmatikan toni kiajsikamati uan toni kineltoka. Komo nochipa tikchiuaj nejin, okachi amo ouij techkisas ika titajtoskej seki taman tein ouij kikisa kichiuas. Amatajkuilol Tiyolpakiskej nochipaya kipia miak netajtanilmej tein tapaleuiaj maj se kimati toni kinemilia akin se kimachtia. Kemej neskayot, tamachtilis 4 kipia nejin netajtanil: “¿Keniuj momachilia Jiova keman tikontokaytia?”. Uan itech tamachtilis 9 kijtoua nejin: “¿Toni tikonuelitaskia tiontajtanis keman tionmotataujtis?”. Akin tikmachtiaj yekinika xa ouij kikisas kimatis toni tanankilis. Uelis tikpaleuiskej komo tikmachtiaj maj itech tanemili tajkuilolmej uan taixkopimej tein kipia tamachtilis.

7. ¿Keniuj ininneskayo seki tokniuan uelis kipaleuis akin tikmachtiaj?

⁷ Keman akin tikmachtiaj kiajsikamatisya toni moneki kichiuas, maj tiktapouikan ininneskayo seki tokniuan uan maj ika tikyolchikauakan maj kichiua tein kiajsikamatik. Kemej neskayot, komo ouij kikisa yas nechikolmej, uelis tiknextiliskej video Jiova noka motekipachoua, tein nesi itech taxelol “No xikonita nejin” itech amatajkuilol Tiyolpakiskej nochipaya tamachtilis 14. Itech miak tamachtilismej tein kipia nejon amatajkuilol moajsi ininneskayo seki tokniuan itech taxelolmej “Maj okachi timomachtikan” oso “No xikonita nejin”. * Maj amo tikiluikan akin tikmachtiaj “komo yejua ueli, tejuatsin no tionuelis”, porin tikiluijtoskiaj ke moneki kichiuas kemej nejon tokniuj, ta maj tikauakan maj yejua iselti kiajsikamati tein moneki kichiuas. Okachi kuali maj tikiluikan toni kipaleuij nejon tokniuj maj kichiua tein Biblia tamachtia, xa se tajkuilol oso teisa tein kichiuak. Nochipa keman uelis, maj tikijtokan keniuj kipaleuij Jiova akin ika motajtoua itech video.

8. ¿Keniuj uelis tikpaleuiskej akin tikmachtiaj maj kitasojta Jiova?

⁸ Maj tikpaleuikan maj kitasojta Jiova. Keman tikitaskej ke uelis maj ika titajtokan ikualneskayouan Jiova. Maj tikpaleuikan akin tikmachtiaj maj kiita ke Jiova se Dios akin yolpaki uan ke nochipa kinpaleuia akin kitasojtaj (1 Tim. 1:11, TNM; Heb. 11:6). Maj tikiluikan keniuj kipaleuis komo kichiua tein momachtia uan no maj tikiluikan ke nejon kinextia ke Jiova kitasojta (Is. 48:17, 18). Komo netasojtalis tein kipialia Jiova okachi moskaltia, okachi kinekis kichiuas tein Biblia tamachtia (1 Juan 5:3).

9. Kemej kijtoua Marcos 10:29, 30, ¿toni kipaleuis akin kineki moauis maj kikaua seki taman?

⁹ Akin momachtijtok Biblia moneki kikauas seki taman komo kineki moauis. Sekin akin  momachtijtokej Biblia xa monekis kikauaskej seki taman tein kipiaj, ijkon kemej monekia kichiuas takat akin kipiaya miak tomin akin ika titajtojkej itech párrafo 5. Xa hasta monekis kikauaskej tekit tein kipiaj komo tein ompa kichiuaj kitapanauilia tein Biblia tamachtia. Sekin xa monekis amo iniuan mouikaskejok akin amo kitasojtaj Jiova. Ininchankauan sekin akin momachtijtokej Biblia kintauelitaj itaixpantijkauan Jiova, uan yejuan xa no kintauelitaskej. Jesús kijtoj ke sekin ouij kinkisaskia kikauaskej nochi nejon. Sayoj ke no kijtoj ke akin mochiuaskej imomachtijkauan, Jiova kintatiochiuis porin okseki itekitikauan mochiuaskej kemej ininchankauan (xikonixtajtolti Marcos 10:29, 30). ¿Keniuj uelis tikpaleuiskej akin tikmachtiaj maj kiseli nejin tatiochiualis?

10. ¿Toni techmachtia tein kijtoj Manuel?

¹⁰ Maj tiktemokan kuali iuan timouikaskej. Akin tikmachtiaj moneki kiitas ke ika timotekipachouaj. ¿Keyej? Maj tikitakan tein kijtoj se tokniuj kayot México akin monotsa Manuel keman kielnamiki tonalmej keman momachtijtoya Biblia: “Achto ke peuaskia timomachtiskej, tokniuj akin nechmachtiaya nochipa nechtajtaniaya keniuj nietoya. Nejon nechpaleuiaya maj niyolseuini uan maj uelini niktapouiani tein yeski. Nikmachiliaya ke yekmelauj noka motekipachouaya”.

11. ¿Keyej moneki tikchiuaskej seki taman iuan akin tikmachtiaj?

¹¹ Jesús kichiuaya seki taman iniuan imomachtijkauan, uan tejuan no moneki tikchiuaskej nejon iuan akin tikmachtiaj (Juan 3:22). Komo kichiujtokya seki taman tein momachtia uan tikitaj ke uelis, maj tikyoleuakan maj takuati tochan oso maj tayiti kafen oso maj touan kiitati tein mejmetstika kisa itech JW Broadcasting^®. Xa okachi motasojkamatis komo tikyoleuaj keman ichankauan uan akin kuali iniuan mouikaya iluichiuaj porin itech nejon tonalmej xa momachilis iselti. Kazibwe, se tokniuj takat akin nemi Uganda, kijtoua: “Nikchiuas seki taman iuan tokniuj akin nechmachtiaya no nechpaleuij maj nikixmatini Jiova  ijkon kemej tamachtilis tein nikseliaya. Nikitak ke Jiova semi kintasojta itekitikauan uan ke yejuan semi yolpakij. Nejua no niknekia nejon”.

12. ¿Keyej semi tapaleuia komo tikinuikaj tataman tokniuan keman titamachtitij ika Biblia?

¹² Maj tikinyoleuakan okseki tokniuan keman titamachtitij. Kemansa xa tikitaskej ke okachi kuali komo tiouij toselti oso komo nochipa tikuikaj sayoj se tokniuj. Maski kuali yetok maj kemansa tikchiuakan nejin, akin tikmachtiaj okachi kipaleuis komo tiouij iniuan tataman tokniuan. Dimitri, se tokniuj takat akin nemi Moldavia, kijtoua: “Tokniuan akin iuan yayaj tokniuj akin nechmachtiaya tataman kemej tamachtiayaj. Nejon nechpaleuij maj nikitani okseki taman kemej ueliskia nikchiuas tein nimomachtijtoya. Uan no, nechpaleuij maj amo semi nipinauani keman yekinika niajki se nechikol porin nikinixmatiaya miakej tokniuan takamej uan siuamej”.

13. ¿Keyej moneki tikpaleuiskej akin tikmachtiaj maj peua youi nechikolmej?

¹³ Maj tikpaleuikan maj peua youi nechikolmej. ¿Keyej? Porin Jiova technauatia maj tiakan nechikolmej uan no ika tikueyichiuaj (Heb. 10:24, 25). Uan no, tokniuan itech nechikol mochiuaj kemej tochankauan. Keman iniuan timosentiliaj itech nechikolmej kemej yeskia tiksenkuaskiaj se takual tein semi uelik. Keman tikpaleuiaj akin tikmachtiaj maj peua youi nechikolmej, tikpaleuiaj maj kichiua se taman tein semi moneki tein kipaleuis maj ueli moaui. Sayoj ke xa ouij kikisa yas nechikolmej. ¿Keniuj uelis tikpaleuiskej ika amatajkuilol Tiyolpakiskej nochipaya?

14. ¿Keniuj uelis tikpaleuiskej akin tikmachtiaj maj kineki yas nechikolmej?

¹⁴ Uelis tikpaleuiskej akin tikmachtiaj maj kineki yas nechikolmej ika tamachtilis 10 tein kipia amatajkuilol Tiyolpakiskej nochipaya. Achto ke kisaskia nejin amatajkuilol kiniluijkej seki tokniuan maj kiitanij nejin tamachtilis iniuan akin kinmachtiayaj, uan kijtojkej ke semi kinpaleuij porin akin kinmachtiayaj peuak youij nechikolmej. Sayoj ke amo moneki timochiaskej hasta tiajsiskej tamachtilis 10, ta maj niman tikyoleuakan akin tikmachtiaj uan maj nochipa tikchiuakan. Akin tikinmachtiaj tatamamej uan tataman ouijkayomej kipanouaj. Yejua ika maj tikitakan itech toni moneki tikinpaleuiskej uan maj tiknemilikan keniuj uelis tikchiuaskej. Maj amo timosenkauakan komo akin tikmachtiaj amo niman peua youi nechikolmej, ta maj timochiakan uan maj tiksentokakan tikyoleuakan.

15. ¿Toni xa kimouilia akin tikmachtiaj?

¹⁵ Keman tejuan timomachtijtoyaj Biblia xa tikelnamikij ke timouiaj timochiuaskej itaixpantijkauan Jiova. Xa tiknemiliayaj ke amo keman ueliskia tikinnojnotsaskej oksekin ika Biblia. Oso xa tikmouiliayaj maj tochankauan oso akin kuali iniuan timouikayaj techixnamikinij. Komo techpanok nejon, ueli tikajsikamatij tein kimachilia akin tikmachtiaj. Jesús kijtoj ke sekin mouiskiaj. Sayoj ke kinyolchikauak imomachtijkauan maj nejon amo kintsakuiliani maj kitekitilianij Jiova (Mat. 10:16, 17, 27, 28). ¿Keniuj kinpaleuij imomachtijkauan maj amo mouinijok? Uan ¿keniuj tejuan no uelis tikinpaleuiskej akin tikinmachtiaj?

16. ¿Keniuj uelis tiknextiliskej akin tikmachtiaj maj kintapoui oksekin tein momachtijtok?

¹⁶ Maj tikmachtijtiakan keniuj kintapouis oksekin tein momachtijtok. Imomachtijkauan Jesús xa moujkej keman kintitanik maj tanojnotsatij. Sayoj ke Jesús kinpaleuij keman kiniluij akonimej ueliskia kinnojnotsaskej uan toni kijtoskej (Mat. 10:5-7). ¿Keniuj uelis tikchiuaskej kemej yejua? Maj tikpaleuikan akin tikmachtiaj  maj kiita akonimej uelis kinnojnotsas. Kemej neskayot, maj tiktajtanikan xa kiixmati se taltikpaknenkej akin uelis kipaleuis se tamachtilis. Ompa, maj tiknextilikan keniuj uelis kimelauas nejon tamachtilis kemej amo ouij moajsikamatis. Keman tikitaskej ke uelis, maj iuan timomamachtikan keniuj kinnojnotsas oksekin ika tein moajsi itech taxelolmej “Tein sekin kijtouaj” uan “Tein sekin uelis mitsontajtaniskej” tein kipia amatajkuilol Tiyolpakiskej nochipaya. Keman tikchiuaskej nejin, maj tikpaleuikan maj tanankili ika Biblia kemej amo ouij moajsikamatis uan kemej amo teyolkokos.

17. ¿Keniuj ika tein kijtoua Mateo 10:19, 20, 29-31 uelis tikpaleuiskej akin tikmachtiaj maj takuaujtamati iuan Jiova?

¹⁷ Maj tikpaleuikan maj peua takuaujtamati iuan Jiova. Jesús kiniluij imomachtijkauan ke Jiova kintasojtaya uan yejua ika kinpaleuiskia (xikonixtajtolti Mateo 10:19, 20, 29-31). Maj tikelnamiktikan akin tikmachtiaj ke Jiova no kipaleuis. Uelis tikmachtiskej maj kitemo inepaleuil Jiova keman iuan tikchiuaskej netataujtil uan tiktajtaniskej Jiova maj kipaleui maj ueli kichiua tein kiixtalijtok. Franciszek, se tokniuj takat akin nemi Polonia, kijtoua: “Keman akin nechmachtiaya kitataujtiaya Jiova, miakpa kitajtaniaya maj nechpaleuiani maj uelini nikchiuani tein nikixtalijtoya. Keman nikitak ke Jiova kinankiliaya no niman peuak niktataujtia. Nikitak ke Jiova nechpaleuij keman monekik nitajtanis seki tonalmej kampa yankuixtok peujka nitekiti porin niknekia nias nechikolmej uan no niknekia nias se ueyi nechikol tein mochiuaskia”.

18. ¿Keniuj kiita Jiova nochi tein kichiuaj tokniuan akin tamachtiaj ika Biblia?

¹⁸ Sayoj ke, ¿uelis tikinpaleuiskej maj moauikan akin momachtijtokej Biblia maski xa amo tikmachtijtokej nion akin? Kemaj. ¿Keniuj? Komo iniuan tiouij okseki tokniuan keman tamachtitij ika Biblia. Jiova semi ininka motekipachoua akin momachtijtokej Biblia. Uan no semi kipatiuita nochi tein tikchiuaj porin tiktemouaj tikinpaleuiskej maj motokikan iuan, uan yejua ika techtasojta (Is. 52:7).