Pablo kijkuiloj: “Timosekokauke ya den tanauatil de Moisés keme yeskia timomikilijke ya. Uan [...] nimosekokaua ya de yejua, para ke nejua ma niueli niyoltinemis uan niktakamatinemis Totajtsin Dios” (Gál. 2:19).

Seki tokniuan akin nemiaj Galacia ompa Roma kineltokakaj inintamachtilis seki takamej akin kijtouayaj ke komo kinekiaj makisaskej monekia kitakamatiskej nochi tein kijtouaya Tanauatil tein kiselijka Moisés, okachiok tein kijtouaya ke monekia moneskayotiskej itech ininnakayo. Sayoj ke Pablo kimatia ke Dios amo kintajtaniayaok nejon. Pablo kintanemililtij uan kinextij ke tein nejon takamej tamachtiayaj amo melauak katka uan kinpaleuij tokniuan maj okachi takuaujtamatinij itech inemilis Jesucristo tein kitemakaka (Gál. 2:4; 5:2). Keman Pablo kiniluijtoya tokniuan ke amo monekiaok kitakamatiskej Tanauatil tein kiselijka Moisés, kijkuiloj tein kijtoua Gálatas 2:19.

Pablo kijtoj: “Timosekokauke ya den tanauatil de Moisés keme yeskia timomikilijke ya”. ¿Toni kijtosnekia? Biblia senkis kijtoua ke keman se momikilia, amo se kimatiok nion teyi, nion teyolpaktia nion tetajyouiltia tein panoua (Ecl. 9:5). Yejua ika, keman Pablo kijtoj nejon, kijtosnekia ke Tanauatil tein kiselijka Moisés amo kiyekanayaok, ta kimatia ke kemej takuaujtamatia itech inemilis Jesús tein kitemakak peujka ‘yoltinemi uan kitakamattinemi Totajtsin Dios’.

¿Keyej “Tanauatil de Moisés” kipatak nejon itech inemilis Pablo? Yejua kijtojka: “Dios kipouas yolchipauak se tagat [...] komo yejua takuautamati iuan Cristo. Uan Dios amo keman kinpouas ke yolchipauke nekes ten sayo kinekij kitakamatinemij in tanauatilme de Moisés” (Gál. 2:16). Tanauatil semi tapaleuijka. Pablo kiniluij tokniuan akin nemiaj Galacia: “Dios techmaktilij ya in tanauatil de Moisés para ika technextilijtiuala ke titajtakolejke [...] hasta in tonalme kuak uala ne tekoneu [...] ten Dios moyektenkauka ya iuan Abraham de kualtitanis” (Gál. 3:19). Tanauatil senkis kinextij ke taltikpakneminij tajtakolejkej amo uelia senkis kitakamatiaj nejon Tanauatil uan ke monekia motemakas se netetayokolil tein amo tajtakolej uan tein kinpaleuiskia nochipaya. Yejua ika, Tanauatil kinpaleuij taltikpakneminij maj kiajsikamatinij ke Jesús katka “ne tekoneu”. Komo titakuaujtamatij iuan Jesucristo, Dios uelis “techpoua[s] ke tiyolchipauke” (Gál. 3:24). Dios kiitak ke Pablo katka yolchipauak porin Tanauatil kipaleuij maj kineltokani Jesús uan maj iuan takuaujtamatini. Yejua nejon kijtosnekia ika nejin tajtolmej: “Timosekokauke ya den tanauatil de Moisés keme yeskia timomikilijke ya. Uan [...] nimosekokaua ya de yejua, para ke nejua ma niueli niyoltinemis uan niktakamatinemis Totajtsin Dios”. Tanauatil amo kipiayaok chikaualis itech inemilis Pablo, sayoj ke Dios kemaj.

Pablo no kijtoj se taman kemej nejon itech amat tein kintitanilij tokniuan akin nemiaj Roma: “Notasojikniuan, in tanauatil de Moisés amo techmapachojtinemi ok porin Totajtsin Dios techpoua ke timomikilijke ya de tosoltiktalnamikilis kuak Yejuatsin techtepoualtij iuan Cristo. [...] Uan axkan xikmatikan ke ne tanauatil de Moisés amo techmapachojtinemi ok porin Dios techpoua ke timomikilijke uan ne tosoltiktalnamikilis tami kuetauik ya” (Rom. 7:4, 6). Nejin tajkuilolmej uan Gálatas 2:19 kinextiaj ke Pablo amo kijtosnekia ke kinamikia momikilis porin amo uelia senkis kitakamatia Tanauatil, ta kijtosnekia ke Tanauatil amo kiyekanaskiaok, nion yejua nion okseki tokniuan. Kemej takuaujtamatiaj itech inemilis Cristo tein kitemakak, amo monekiaok kitakamatiskej nejon Tanauatil.