Komo tikontemoua seki taman tein mitsonpaleuis xikonxiko tayokol, uelis tikonajsis miak taman uan seki okachi mitsonpaleuis ke okseki. Xa porin kemej tikitakejya, tataman kemej momachiliaj keman kipanouaj se tayokol. Yejua ika, xa se taman tein uelis kipaleuis aksa xa amo uelis kipaleuis okse.

Maski ijkon, miakej kinpaleuiani kichiuaskej seki taman tein kijtouaj akin kuali momachtiaj tayokol tein se kimachilia, uan nejin kinextia tamatilis tein kipia se amatajkuilol tein uejkaujya moijkuiloj, Biblia.

• Seki motelmachtianij kijtouaj ke yejua nejin tein okachi tapaleuia para se kixikos tayokol. Maski ijkon, xa tejuatsin tikonnekis tionyetos moselti uan xa hasta tionkualanis iniuan akin kitemouaj mitsonpaleuiskej. Ipa ijkon se momachilia.

• Amo xikonnemili ke nochipa moneki mouan yetoskej, sayoj ke amo no nochipa xionyeto moselti. Xa satepan monekis maj mitsonpaleuikan. Xikonilui oksekin ika poujkaitalis tein mitsonpoloua.

• Xikonixejeko kanachi tiempo tionyetos moselti uan iniuan oksekin, ijkon kemej kuali tionmomachilis.

TEIN BIBLIA KIJTOUA: “Okachi kuali omen uan amo se [...]. Porin komo se uetsi, okse uelis kiajokuis” (Eclesiastés 4:9, 10).

• Komo kuali tiontakua mitsonpaleuis amo semi ika xionmotekipacho tayokol. Xikonkua takilomej, kilmej uan tein amo semi chiauak.

• Xiontayi miak at uan okseki taman tein mitsonpaleuis.

• Komo amo semi tionmayana, miakpa xiontakua maski tepitsin. No xikonilui tapajtijkej maj mitsonmaka tein mitsonchikauas. *

• Komo tiontsitsikuini oso tikonchiua okseki taman, uelis mitsonpaleuis amo ika xiontanemili tein amo kuali. Keman sekin kichiujtokej nejin, ika tanemiliaj tein kinpanok uan oksekin kichiuaj para amo itech tanemiliskej.

TEIN BIBLIA KIJTOUA: “Amo akin kitauelita inakayo ta kitamaka uan kiyekpia” (Efesios 5:29, Santa Biblia: Dios habla hoy).

• Tinochin moneki kuali tikochiskej, sayoj ke akin momikilij aksa akin kitasojta moneki okachi kuali kochis porin tayokol semi tesioujtij.

• Amo semi xiontayi tein kipia kafeína uan tayil tein teuintij porin amo mitsonkauas xionkochi.

TEIN BIBLIA KIJTOUA: “Okachi kuali maj se moseui ke chikauak se motekitiltis uan se kitojtokas ejekat” (Eclesiastés 4:6).

• Tataman kemej tikxikouaj ueyi tayokol, yejua ika tejuatsin xikonita tein okachi mitsonpaleuis.

• Miakej kinpaleuia kijtoskej tein kimachiliaj keman semi tayokoxtokej uan oksekin okachi kinpaleuia komo amo kijtouaj. Motelmachtianij kijtouaj keyej semi moneki maj tikijtokan tein tikmachiliaj itech ueyi tayokol. Komo tejuatsin tikonneki tikonijtos keniuj tionmomachilia sayoj ke tikonita ke ouij, ¿keyej amo peua tikontapouia aksa akin kuali iuan tionmouika?

• Sekin moneki chokaskej uan sekin amo semi chokaj keman kiixnamikij tayokol.

TEIN BIBLIA KIJTOUA: “Sejse yolo kiixmati itayokol” (Proverbios 14:10, Nueva Versión Internacional).

• Sekin akin tayokoxtokej porin momikilij aksa akin kitasojtaj semi tayij tein teuintij uan kikuij drogas para kuali momachiliskej. Mitsonijtakos komo no ijkon tikonchiua. Maski tikonitas ke tepitsin mitsonpaleuia uelis kichiuas okachi xiontajyoui. Xikontemo okseki taman tein uelis mitsonyolseuis uan amo mitsonijtakos.

TEIN BIBLIA KIJTOUA: “Moneki ma tiksentokakan tichipaukanentinemikan” (2 Corintios 7:1).

• Miakej kinpaleuia kipapataskej tein kichiuaj para kuali momachiliskej, yejua ika kichiuaj okseki taman tein kinpaleuis maj amo itech tanemilijtokan inintayokol.

• Xa mitsonpaleuis kuali xionmomachili komo peua tionmouika iniuan oksekin oso okachi tikonixmati akin ipa iniuan kuali tionmouika, komo tikonchiua okse taman oso tionmoixpetania.

• Yolik xa mopatas tein tikontayekanaltia tikonchiuas. Xa tikonitas ke amo semi tiontayokoyaok uan okachi tikonchiua okseki taman. Nejin kinextis ke okachi kuali tionmomachiliaya.

TEIN BIBLIA KIJTOUA: “Ixyetok keman mochiuas teisa [...]: tonal keman se chokas uan tonal keman se uetskas” (Eclesiastés 3:1, 4).

• Niman xikonixtali tikonchiuas tein ipa tikonchiuaya.

• Komo tikonixtalia se hora keman tionkochis, tiontekitis uan para tikonchiuas okseki taman, yolik peuas kuali tionmomachilis.

• Komo tikonchiua okseki taman, mitsonpaleuis amo semi xionmotayokoltiok.

TEIN BIBLIA KIJTOUA: “Amo semi kinemilis ke inemilis niman panoua porin akin yekmelauj Dios kichiua maj nochipa kinemili keniuj yolpakis” (Eclesiastés 5:20).

• Miakej kiixtaliaj kichiuaskej seki taman tein moneki niman ke momikilia aksa akin kitasojtaj, uan satepan kinemiliaj maj amo kichiuanij.

• Komo ueli, xikonkaua maj pano se tiempo achto ke tionnemitiuj okseko oso tikonpatas tekit tein tikonpia, oso tikonixtalis amo tikonpiasok tein iaxka katka akin tikontasojtaya.

TEIN BIBLIA KIJTOUA: “Akin ika nejmachkayot niman kiixtalia keniuj kichiuas teisa yekmelauj kuali kisas, sayoj ke nochin akin moijsiuiliaj yekmelauj kipiaskej tatasojtilis” (Proverbios 21:5).

• Miakej kichiuaj teisa tein kinpaleuia maj kielnamikikan akin momikilij.

• Xikonpia taixkopimej uan okseki taman, oso xikonijkuilo tonalmej keman nankisenchiujkej teisa tein tikonneki tikonelnamikis. Nejin uelis mitsonpaleuis xikonxiko tayokol.

• Xikoneua seki taman tein ika tikonelnamikis uan xikonita keman kuali tionmomachilisya.

TEIN BIBLIA KIJTOUA: “Xikelnamiki ne uejkauj tonalmej” (Deuteronomio 32:7).

• Xikonixtali tionmoseuis seki tonalmej.

• Komo amo ueli tionmoseuia miak tonalmej, xikonkui se oso ome tonal para tionyas atenoj, parques uan tionnemitiuj kansaika iniuan akin kuali tionmouika.

• Hasta komo tikonpata tepitsin tein mojmostaj tikonchiua uelis mitsonpaleuis xikonxiko tayokol.

TEIN BIBLIA KIJTOUA: “Xiualakan [...] namejuan namoseltij tech ne lugar kampa amo aka yetok uan ximoseuikan tepitsin” (Marcos 6:31).

• Amo xikonelkaua ke komo tikonpaleuia oksekin no kichiuas kuali xionmomachili.

• Uelis tikonpaleuis akin no tayokoxtokej porin momikilij akin tikontasojtaya, kemej akin kuali iuan mouikayaj oso ichankauan. Yejuan xa kinekiskej maj aksa kinkaki keniuj momachiliaj.

• Komo tikonpaleuia uan tikonyolchikaua oksekin, kichiuas oksepa xionyolpaki uan xikonmachili ke amo nenkaj tionnemi.

TEIN BIBLIA KIJTOUA: “Kachi yolpaktok [...] ten tapaleuijtinemi ika ten niaxka uan ke ne [...] ten sayo kiselia tapaleuilis” (Hechos 20:35).

• Tayokol uelis kichiuas xikonpata tein tikonita ke okachi moneki.

• No uelis tikonitas tein tikonchiujtok itech monemilis.

• Komo moneki, xikonpata tein tikontayekanaltijtok.

TEIN BIBLIA KIJTOUA: “Okachi kuali maj se youi kampa onkak tayokol ke maj se youi kampa onkak iluit, porin tinochin timomikiliaj uan akin yoltokej moneki ika tanemiliskej” (Eclesiastés 7:2).

 Tein melauj, nion teyi uelis kichiuas senkis amo xiontayokoyaok. Sayoj ke miakej akin momikiliani aksa akin kitasojtaj, kiitanij ke kichiuaskej seki taman kemej tein tikitakej itech nejin tamachtilis kinpaleuiani maj moyolseuikan. Tein melauj, amo sayoj nejin tayolmajxitilismej mitsonpaleuiskej amo semi xionmotayokoltiok. Sayoj ke, komo tikonchiua tein tikitakejya tikonitas ke no uelis mitsonyolseuis.