ITekiuajyo Dios tein uejkaujya tikchixtokej, amo uejkaua kichiuas maj tinochin kuali tinemikan uan maj amo tixexeliujtokan. Salmo 72:7 kijtoua ke onkas “ueyi yolseuilis” itech taltikpak. Sayoj ke ¿kemanian peuas taixyekanas iTekiuajyo Dios? ¿Keniuj kichiuas? Uan ¿keniuj uelis mitsonpaleuis?

Biblia kijtoua tein kinextiskia ke iTekiuajyo Dios amo uejkaua taixyekanas. Noyampa taltikpak onkaskia neteuilismej, mayan, kokolismej, talolinilis uan okachi mochiuaskia tein amo kuali (Mateo 24:3, 7, 12; Lucas 21:11; Apocalipsis 6:2-8).

Biblia no kijtoua: “Ne takuitapan tonalme topan uetsikiu ne ueyi tajyouilis. Uan nemiske in tagayot ijkuin: Motasojtatinemiske yejuan san, uan yejuan xijxikuintinemiske ika tomin san [...] uan amo kintakamatiske ok nintatuan. Uan amo no teyi ika motasojkamachiliske [...] uan hasta amo no kimouiskapouaske totakuautamatilis iuan Dios. Uan [...] nion no teiknelijtinemij. Uan yejuan sayo tepajpantinemiske san tensa ten sayo nenkajti san, uan amo ueli motsakuiliaj ok den nintanejnekilis ten kualkui tajtakol. Uan nojonkes no kuelitaj san kintajyouiltiske aksame ika toneukayot, uan no kitauelitstinemij nochi ten kuali [...] uan mopoutinemij ke semi ueyi chiuanime. Uan yejuan sayo kitemojtinemij kenin moyolpaktijtinemiske pero amo kitemojtinemij kenin para kiyolpaktijtinemiske Dios” (2 Timoteo 3:1-4). Maski nochipa moajsinij akin ijkon monejnemiltiaj, axkan okachi tikitaj nejon.

Tein Biblia kijtoua peuak mochiua itech xiuit 1914. Miakej motelmachtianij uan políticos no kijtouaj ke nochi peuak mopata nejon xiuit. Peter Munch, se motelmachtijkej kayot Dinamarca, kijkuiloj ke achto ke peuaskia xiuit 1914 nochin kinemiliayaj ke okachi kuali nemiskiaj, sayoj ke okachi peuak mochiua neteuilis, tetsaujmej, tamojmoujtilis, netauelitalis uan noyampa timoujkanemij.

Sayoj ke no onkak tein kinextia ke satepan kuali tinemiskej. Ika titajtojkejya tein kinextia ke iTekiuajyo Dios amo uejkaua taixyekanas itech taltikpak. Sayoj ke, Jesús no kijtoj ke mochiuaskia nejin taman tein kuali: “Nejin kuali tanauatilmej ika Tekiuajyot motetapouis semanauak taltikpak kampa nemij uan ijkon nochin kimatiskej, uan ompa ejkos tamilis” (Mateo 24:14, TNM).

Itaixpantijkauan Jiova kiteixmatiltiaj iTekiuajyo Dios. Amaix Tanejmachtijkej. Kiteixmatiltijtok iTekiuajyo Jiova yejua tein okachi tikmoyauaj. Ika tajtoua tein kichiuas iTekiuajyo Dios itech taltikpak uan keniuj techpaleuis tinochin.

Maj tikitakan naui taman tein kinankilia nejin netajtanil:

1. Itech nejin Tekiuajyot amo pouiskej tekiuanij tein moajsij nikan taltikpak.

2. Tekiuanij kinekiskej kisentokaskej taixyekanaskej uan kiixnamikiskej iTekiuajyo Dios (Salmo 2:2-9).

3. Kemej tekiuanij kinekiskej kisentokaskej taixyekanaskej, iTekiuajyo Dios kinixpolos (Daniel 2:44; Apocalipsis 19:17-21). Nejin tein mochiuas Biblia kitokaytia Armagedón (Apocalipsis 16:14, 16).

4.   Akin kinekiskej maj iTekiuajyo Dios kinixyekana makisaskej keman mochiuas Armagedón uan kuali nemiskej satepan. Biblia kijtoua ke yeskij “uel miak tagayot” oso miakej millones (Apocalipsis 7:9, 10, 13, 14).

Uelis techixyekanas iTekiuajyo Dios komo timomachtiaj Biblia. Keman Jesús kitataujtij Dios, kijtoj: “Nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan [...] ma nechixmatikan Nejuatsin ke ni Jesucristo ten Tejuatsin tinechonualtitanik” (Juan 17:3).

Semi techpaleuia tikixmatiskej Dios. Maj tikitakan ome taman. Yekinika, techpaleuia maj okachi titakuaujtamatikan iuan Dios. Titakuaujtamatij porin onkak tein kinextia ke iTekiuajyo Dios yekmelauj moajsi uan ke amo uejkaua taixyekanas (Hebreos 11:1). Ojpatika taman, techpaleuia maj okachi tiktasojtakan Dios uan oksekin. Komo tiktasojtaj Dios tiktakamatiskej uan komo tikintasojtaj oksekin tikchiuaskej nejin tein Jesús tanauatij: “Xikinchiuilikan mopueblojkauan ijkon keme no namejuan nankinekiske ke yejuan ma namechchiuilikan” (Lucas 6:31).

ToTachijchiujkauj kemej yeskia se kuali tepopaj porin kineki maj kuali tinemikan. Kineki maj tikpiakan tein Biblia kitokaytia “ne ten melau nemilis” (1 Timoteo 6:19). Axkan amo ijkon tinemij. Miakej tel ouij tein kipanouaj. Sayoj ke, ¿onkas yekmelauj nemilis? Maj tikitakan seki taman tein kichiuas iTekiuajyo Dios uan ijkon tikonitas keniuj tinemiskej.