¿Tikonnemilia ke uelis tikyektaliskej kuejmolmej tein techtekipachouaj uan tein uelis techijtakos satepan? Se pajti techpaleuia komo senkis kijkuania kokolis uan amo sayoj komo techajchiuilia tein tikmachiliaj.

Maj tikitakan tein kipanok se takat akin itokay Tom. Yejua kokolispeuak uan momikilij. ¿Keyej momikilij? Achto ke momikiliskia, se tapajtijkej kijtoj: “Keman peuak amo kuali momachilia, amo akin kitemoj kimatis keyej ijkon momachiliaya”. Nesi ke tapajtianij akin yekinika kiitakej, kimakakej pajti tein sayoj kipaleuiskia maj kuali momachili.

Axkan no ijkon mochiujtok keman motemoua moijkuanis tein amo kuali. Miakej tekiuanij kiixtaliaj tanauatilmej, kitaliaj teposmej tein ika teitaj uan kinixtaliaj okachi policías. Maski nejon uelis tapaleuis, amo ueli kitsakuilia tein miakej kinemiliaj, kineltokaj uan kinejnekij, porin yejua tein kichiua maj amo kuali monejnemiltikan.

Daniel nemi Sudamérica. Itech iueyialtepeuj okachi tatasojti. Yejua ika kijtoua: “Achto, kuali tinemiaj. Amo timouiaj maj techtachtekikan. Sayoj ke axkan, noyampa se moui. Kemej okachi tatasojti, miakej kinekij tein oksekin kipiaj uan amo kintekipachoua keniuj se nemi nion kipoujkaitaj tein se kipia”.

Okse takat kisak kampa nemia itech se altepet tein moixmati kemej Oriente Medio porin ompa mochiujtoya neteuilis. Satepan ke peuak momachtia Biblia, kijtoj: “Itech noxolal, kalyetouanij, tekiuanij uan akin taixyekanaj itech taneltokalis kinchikaujkauiayaj miakej telpochmej maj tapaleuitij itech neteuilis uan maj tataninij. Akin taixnamikiaj no ijkon kichiuayaj. Yejua ika nikajsikamatik ke amo uelis titakuaujtamatiskej iniuan tekiuanij”.

Xikonita tein Biblia kijtoua:

• “Iyolo takat peua kinejneki kichiuas tein amo kuali keman konetok.” (Génesis 8:21.)

• “Se iyolo okachi takajkayaua ke okse taman uan yolijsiui. ¿Akoni ueli kiixmati?” (Jeremías 17:9.)

• “Itech iyolo in tagat ualeutok ne pitsotik tanemililis, ne temiktilis, [...] ne tasuapapatalis oso ne tagapapatalis, ne tachtekilis, oso ne takajkayaualis uan ne tauijuikaltilis.” (Mateo 15:19.)

Tejuan amo tiuelinij timokixtilianij tein amo kuali tein tikchiuaj. Uan nesi ke nejon tein amo kuali okachi mochiua, kemej tikitakej itech yekinika tamachtilis (2 Timoteo 3:1-5). Uan kisentoka mochiua maski axkan ueli tikmatij miak taman kemej moneki timonejnemiltiskej. Komo ijkon, ¿keyej tiksentokaj amo kuali tinemij? ¿Tikchiujkejya nochi tein tiuelkej? ¿Uelis tikyektaliskej?

Maski ueliskia tikchiuaskej maj akin kichiuaj tein amo kuali mopatakan, tiksentokaskiaj amo kuali tinemiskiaj. ¿Keyej? Porin onkak seki taman tein amo ueli tikchiuaj.

ITajtol Dios kijtoua: “Amo iaxka takat [...] kiyekanas itaksalis” (Jeremías 10:23). Ijkon kemej  amo tichijchiujtokej tinemiskej aijtik, amo no tichijchiujtokej timoixyekanaskej toselti.

Xikonnemili nejin: ¿kiuelitaj oksekin maj kiniluikan keniuj moneki monejnemiltiskej? ¿Oso keniuj moneki kiitaskej keman se siuat kimayoui ikonetsin, ke moneki amo auilnemiskej oso keniuj tetatmej moneki kiniskaltiskej ininkoneuan? Nejin kichiua maj miakej moxexelokan. Maski tiknemiliskej ke amo taixejekol, tein Biblia kijtoua melauak: tejuan amo tiuelij timoixyekanaskej toselti nion technamiki. Komo ijkon, ¿akoni uelis techpaleuis?

Dios uelis techpaleuis porin yejuatsin techchijchiuak. Uan amo techelkauani maski miakej kinemiliaj ke kemaj. Biblia techiluia keniuj kuali tinemiskej uan nejon kinextia ke Dios toka motekipachoua. Komo tikajsikamatij tein Biblia kijtoua, techpaleuis maj tikmatikan keyej ijkon timonejnemiltiaj uan keyej nochipa mochiuani tein amo kuali. Se motelmachtijkej kayot Alemania kijtoj ke itech altepemej uan tekiuanij amo kiitanij keniuj kiyektaliskej tein achto mochiuani uan yejua ika amo uelinij kichiuanij maj kuali tinemikan.

Se tonal, Jesús kijtoj ke tamatilis “monextijtiyas tech in chipaukanemilis” (Lucas 7:35). Maj tikitakan keniuj techpaleuia nejon. Salmo 146:3 kijtoua: “Amo xitakuaujtamatikan itech ueyichiuanimej nion itech ikoneuj takat, akin amo ueli temakixtia”. Nejin tajkuilol techpaleuia maj amo tikchiakan maj aksa tayektali. Kenneth, akin nemi itech altepet tein moixmati kemej Norteamérica uan kampa motelchiua tein amo kuali, kijtoua ke tekiuanij amo kichiuaj tein kijtouaj uan nejon kinextia ke melauak tein kijtoua Biblia.

Daniel, akin achto ika titajtojkej, kijtoua: “Okachi nikneltoka ke amo akin uelis kuali taixyekanas. Tikpiaskej tomin itech banco oso tikseliskej tomin keman amo titekitiskejok amo kijtosneki ke kuali tinemiskej keman tiyeskij tixiuejkejya. Nikinixmati miakej akin tajyouianij porin amo mochiuani tein kichiayaj”.

Biblia techpaleuia maj tikmatikan tein yekmelauj mochiuas uan no techiluia ke uelis tikchiaskej tein kuali satepan. Nejon tikitaskej itech okseki tamachtilismej.