Seki telpochmej akin momachtiayaj itech se kuali kaltamachtiloyan ompa Canadá, ika mauiltijkej se telpoch akin iniuan momachtiaya keman paxalotoj iniuan tamachtianij. Satepan ke panok nejon, itech se periódico tein mokixtia ompa Canadá, Leonard Stern kijkuiloj ke maski telpochmej kipiaskej kuali tamachtilis oso tominpiaskej amo kintsakuilia maj amo kichiuakan tein amo kuali.

Leonard Stern no kijtoj: “Tetatmej monekiskia kinmachtiskej ininkoneuan tein kuali uan tein amo kuali. Sayoj ke, miakej tetatmej okachi kitemouaj maj ininkoneuan motelmachtikan kaltamachtiloyan uan maj kipiakan se kuali tekit”.

Maski aksa kipias se kuali tamachtilis, amo kipaleuis maj moijkuanili tein amo kuali tein kinejneki. ¿Toni tamachtilis uelis techpaleuis maj kuali timoixyekanakan?

Se teskat techpaleuia maj ueli timoixitakan. No ijkon, keman tikixtajtoltiaj Biblia techpaleuia maj tikitakan tein techouijmaka tikchiuaskej uan tein amo ueli tikchiuaj (Santiago 1:23-25). Uan no, Biblia techpaleuia maj timopatakan uan maj tikchiuakan seki taman tein kuali, kemej tikinpaleuiskej oksekin, kuali tikinnojnotsaskej, amo niman tikualaniskej uan titetasojtaskej. Nejon techpaleuia maj kuali timouikakan iniuan oksekin. Biblia kijtoua ke keman timotasojtaj “techsepanpoualtia se uan okse” (Colosenses 3:14). ¿Keyej semi tapaleuia titetasojtaskej? Xikonita tein kichiua akin tetasojta.

• “Naken kipixtinemi tetasojtalis [...] kixikoa tajyouilis [...], kipia teiknelilis uan amo no kiyolmachilia nexijkolot. Uan ne naken tetasojtatinemi, yejua ne amo moueyinektinemi uan [...] amo kinpinautia ika nitajtoluan uan amo no kinemilijtinemi sayo ten niaxka. Uan [...] amo moyolkualantijtinemi uan amo no kielnamiktinemi tetajtakoluan. Uan ne naken tetasojtatinemi, yejua ne amo ika paki ne naken motajtakolmaka. Uan ne naken tetasojtatinemi, yejua ne sayo moyolpaktijtinemi ika in yek melauak Tajtoltsin [...] uan nachipa kijyouijtinemi tataman ouijkayome. [...] Uan in tetasojtalis, yejua ne amo keman tamis.” (1 Corintios 13:4-8.)

• “Ten tetasojtatinemij, yejuan nojonkes amo kitajyouiltijtinemij inikniu.” (Romanos 13:10.)

• “Ximosepantasojtakan se uan okse ika nochi namotanejnekilis porin ika ne tetasojtalis namejuan kachi uelis nankintapojpoluiske aksame.” (1 Pedro 4:8.)

 Keman tiyetokej iniuan akin tikintasojtaj kuali timomachiliaj. Nejon panoua porin tikmatij ke yejuan kinekij maj kuali tiyetokan uan amo keman techtajyouiltiskej.

Keman titetasojtaj, tikpataj seki taman maski techouijmakas. Maj tikitakan tein kipanok se takat akin tiktokaytiskej George. Yejua semi kinekia yetos iuan iixuitsin akin yekin yolka. Kemej George semi tachichinaya, imontikauj amo kinekia maj tachichina kampa moajsia konetsin. Yejua ika, maski kiuikayaya cincuenta xiujmej ke tachichinaya, kikauak uan ijkon ueliskia yetos iuan iixuitsin. Kemej tikitaj ¡semi timopataj keman titetasojtaj!

Moneki tikmatiskej keniuj titetasojtaskej. Tetatmej yejuan akin okachi kuali uelis kinnextiliskej ininkoneuan maj tetasojtakan porin kintamakaj, kinyekpiaj uan kinpaleuiaj keman kinpanoua teisa. No kuali kinojtokaltiaj keman iniuan tajtouaj. Uan no, kinmachtiaj maj kichiuakan tein kuali uan amo tein amo kuali porin yejuan kuali monejnemiltiaj.

Sayoj ke, seki tetatmej amo kinmachtiaj ininkoneuan. Komo ijkon ¿uelisok kuali monejnemiltiskej ininkoneuan? Kemaj. Miakej kipatanij tein kichiuayaj uan momachtianij tetasojtaskej uan kichiuaskej tein kuali maski keman moskaltijkej inintatuan kipiakej kuejmolmej. Hasta akin kinemiliayaj ke amo mopataskiaj uelik mopatakej, kemej tikitaskej itech okse tamachtilis.