2 ¿Totajtakol maj titajyouikan?
¿Keyej moneki tikmatiskej nejin?
Komo tejuan yeskia totajtakol maj titajyouikan, no ueliskia tikchiuaskej seki taman tein techpaleuiskia maj amo semi titajyouikanok.
Xikonnemili nejin:
Xikonita seki taman tein kichiua maj titajyouikan, uan xikonnemili ox tejuan tikchiuaj nejon taman.
-
Keman ininka mauiltiaj oksekin uan kintajyouiltiaj
Itech se nechikol tein moixmati kemej Organización Mundial de la Salud, moijtoua ke 25% akin nemij itech nochi taltikpak semi kintajyouiltijkej keman katkaj nojnelmej, uan ke 33% siuamej ininka mauiltijkej oso kinteuijkej.
-
Keman momikilia se akin tiktasojtaj
Itech Organización Mundial de la Salud moteixmatiltij ke itech xiuit 2016 momikilijkej kemej 477,000 itech nochi taltikpak porin kinmiktijkej. Uan no, itech nejon xiuit momikilijkej kemej 180,000 porin mochiuak neteuilis (Estadísticas sanitarias mundiales 2018).
-
Kokolismej
Itech se amaix, se siuat akin motokaytia Fran Smith kijkuiloj ke panoua mil millones tachichinaj itech nochi taltikpak. Akin tachichinaj yejuan akin okachi momikiliaj porin kinkui kokolis itech ininyolo, ininkuatixyo, ininyekatsol, inintoskak, amo uelij mijyotiaj uan kinkui cáncer itech ininpulmón (National Geographic).
-
Tachikoitalis
Se siuat tapajtijkej akin motokaytia Jay Watts, kijtoua ke miakej motayokoltiaj oso semi motekipachouaj porin kipanouaj tatasojtilis, kinchichikouiaj, kinchikoitaj porin siuamej oso takamej, motatanij uan porin moneki mokaltalitiuij okseko.
XIKONTEMO OKACHI
Itech jw.org, xikonita video ¿Keyej Dios kichijchiuak taltikpak?
Tein tamachtia Biblia
Miakpa tejuan totajtakol keman titajyouiaj
Miakej tekiuanij semi techtajyouiltiaj maski kijtouaj ke kinekij techpaleuiskej.
“Taltikpaknenkej kiixyekana taltikpaknenkej uan kitajyouiltia.” (ECLESIASTÉS 8:9.)
Tein techpaleuis maj amo semi titajyouikanok
Tein Biblia kijtoua uelis techpaleuis maj amo semi tikokolispeuakan uan maj okachi kuali timouikakan iniuan oksekin.
“Akin yolseujtok kipaleuia maj kuali moajsi. Sayoj ke, akin nexikol kipalantia iomiyouan.” (PROVERBIOS 14:30.)
“Ximosekokautiyakan de nochi ne yolchichikayot uan ne yolkualanilis uan ne tauelot. Uan no ximosekokautiyakan de ne mouispololis uan ne uijuikaltilis uan nochi ten miak tataman tajtolme ten teyolxokolia.” (EFESIOS 4:31.)
